24 de xullo de 2014

As festas patronais celebraranse os próximos 8, 9 e 10 de agosto:::

Ouzande festexa ao seu patrón, San Lourenzo, a fin de semana do 8, 9 e 10 de agosto. As actividades comezan o venres 8 coa actuación de novo na parroquia da orquesta Galilea e cun monólogo do humorista Isi, no campo haberá un carro con servizo de polbo e churrasco. O sábado celébranse os actos relixiosos na honra do patrón ás 13.30h, a procesión estará amenizada polo grupo ouzandés Retrouso. Os actos continúan pola noite coa actuación de dous tríos musicais; Géminis e Togayán. Os actos relixiosos do domingo están dedidados ao Santísimo Sacramento, instalarase unha gran alfombra floral no adro e durante a mañá e a na sesión vermouth haberá animación a cargo da charanga Os Atrevidos. A festa continúa pola tarde, ás 18:30h cunha orixinal actividade deseñada pola Asociación Cultural A Fervenza de Ouzande, trátase dunha para actividade para descubrir a parroquia baixo o título "O Gran Xogo do Caldeiro Penzo".
A orquestra Galilea xa é unha veterana no Campo da Festa de Ouzande, de feito este mesmo ano fixeron a presentación da súa xira en Ouzande, nunha verbena organizada a tal efecto. O humorista Isi, natural de Arca, deuse a coñecer no programa da TVG "O Rei da Comedia" e é un habitual desta canle de televisión. Retrouso é o grupo de música tradicional de Ouzande, nacido no seo das clases de música tradicional da Fervenza de Ouzande, xa presentaron o seu primeiro disco "Ou" e son dos grupos máis activos do panorama musical tradicional actual con centos de actuacións. O Trío Géminis é outro habitual da parroquia, naturais de Caldas de Reis, son un trío de animación de vodas que no verán se enrolan no mundo das verbenas. Desde Portosín (Porto do Son) chega o Trío Togayán que actúa por vez primeira en Ouzande. A actividade dirixida aos nenos e nenas que organiza A Fervenza de Ouzande chámase "O Gran Xogo do Caldeiro Penzo " e consiste nunha actividade lúdica de descoberta da parroquia na que os participantes terán que "desencantar" aos turistas que quedaron prendados das belezas que lles ofrece Galicia, axudándolles a descubrir as belezas que hai na parroquia, polo que terán que percorrela, facer probas e responder enigmas relativos á historia e idiosincracia de Ouzande.
O humorista Isi.
Galilea abrirá as festas de Ouzande.
Retrouso animando o Festival Folk de San Xurxo de Vea.
Trío Geminis nunha actuación anterior en Ouzande.
Trío Togallán de Portosín.

21 de xullo de 2014

Callobre despide a Santa Margarida ao ritmo da Funçao Pública:::

Callobre rematou esta madrugada as festas de verán, unhas festas moi concurridas tradicionalmente que este ano tamén ateigaron o Campo da Festa a pesar de se celebraren en domingo e luns. Os grupos Canadá e Suavecito animaron a verbena do primeiro día e Olympus e Funçao Pública o segundo. Esta última, que repite en Callobre, é unha orquestra de moita sona en Portugal que está a acadar moito éxito en Galicia debido á orixinalidade do espectáculo que ofrece e a que se sae un pouco dos repertorios típicos das orquestas, aínda que mantén un espectáculo de luz e imaxe coma a maioría. Con ela Callobre pechou as súas festas que xa se iniciaran con moi bo pé co festival Folk de Raíz o pasado venres.
Espectáculo de luz e cor de Funçao Pública.
O campo volveu estar cheo de festeiros.

Funçao Pública.

Funçao Pública.

Ouzande ponlle freo á sangría poboacional que arrastra desde o ano 2000:::

Evolución da poboación ouzandesa
 desde 2000
O Instituto Nacional de Estatística (INE) vén de poñer ao descuberto a alarmante situación poboacional da parroquia. É moita a xente que se pregunta "Pero canta xente vive en Ouzande?" Pois segundo os datos que proporciona o propio INE, na última revisión de 2013 hai un total de 335 veciños (167 homes e 169 mulleres) Aínda sendo unha parroquia pequena, perdeu desde o ano 2000 a frioleira de 91 censados (21,36%) e desde aquel ano sempre minguou a poboación agás en 2009 que remontou un veciño. En 2013 a novidade está en que se recuperan dous veciños, símbolo do que posiblemente sexa o freo a esta decadencia prolongada no tempo. De feito, Ouzande é das poucas parroquias que aumentan poboación nese ano, pois a tendencia xeral do municipio é á perda paulatina de poboación en todas as parroquias, ata no casco urbano. Outras aldeas que frean a decadencia ou gañan poboación son Guimarei e A Somoza. 
En canto ás causas desta situación habería que facer un varrido polos distintos lugares de Ouzande para comprobar como moito dese censo que se perde é xente nova que se emancipa aínda que non marchen moi lonxe pois o casco urbano da Estrada soe ser o destino máis frecuente. Non é allea esta sangría poboacional á mala situación económica, a falta de datos máis detallados o destino de moitos que abandonan Ouzande continúa sendo a emigración, neste caso cara a outros puntos do estado ou países europeos como Inglaterra ou Alemaña.
Deste xeito a pirámide poboacional de Ouzande tende a envellecer, quedando as casas da aldea habitadas habitualmente pola xente de maior idade. Dos sete lugares que contabiliza o INE ningún deles está deshabitado, e son O Tallo, O Redondo e Alemparte os que rexistran unha concentración maior de veciños, quedando O Formigueiro, A aldea de Abaixo, O Castro, O Picoto e Penerada como as entidades que rexistran menos veciños debido ao seu tamaño.

Ouzande perdeu o 21% dos seus veciños no censo desde 2000

No ano 2000 había 426 censados fronte aos 335 do ano pasado.

Ouzande é das poucas parroquias da Estrada que non perderon poboación no censo de 2013.

13 de xullo de 2014

Treixadura arrasa no "Folk de Raíz":::

O pasado venres, o grupo Treixadura arrasou no festival "Folk de Raíz" de Callobre. A edición número XV do festival comezou co espectáculo de Cé, o home orquesta que foi rompendo o xeo ao tempo que o campo da festa se enchía de festivaleiros ansiosos de música tradicional. Seguiron os anfitrións, O Regato de Matamulleres intensificando a festa co seu repertorio. Trioliro animou a festa a pé de campo con música e o humor das súas regueifas. Unha das actuacións máis agardadas era a de Treixadura, e tanto o grupo como o orfeón non defraudaron, poñendo a cantar e bailar o auditorio. O peche foi para a Banda da Balbina que encantou ao público aínda que a festa xa se alongando ata moi entranda a madrugada. Moita afluencia de público, unha noite de luar moi agradable e a boa música dos grupos participantes fixeron que o Folk de Raíz resultase un éxito.







7 de xullo de 2014

Guimarei marcha de excursión ao Baixo Miño e Portugal:::

A Asociación de Veciños Santa Apolonia de Guimarei organiza unha excursión para o vindeiro 19 de xullo ao Baixo Miño e Vilanova de Cerveira. A saída será de diante da igrexa parroquial ás 8 da mañá. A primeira das visitas é aos Muíños do Picón e Folón, no Rosal. Seguidamente achegaranse á Guarda para visitar o Monte Santa Trega e o xacemento arqueolóxico así como as impresionantes vistas que hai neste lugar. Logo do xantar cruzarán o Miño cara o Alto Minho portugués coa intención de participar no feirón sabatino de Vilanova de Cerveira. Antes do regreso subirán ao mirador do Cervo, desde onde hai unhas vistas impactantes das dúas comarcas, o Alto Minho e o Baixo Miño. Os interesados teñen que poñerse en contacto coa asociación guimareiciense, o custe da viaxe é de 25€ por persoa.
Tramo final do Miño.

Ponte internacional de Goián (Tomiño) - Vilanova de Cerveira.

Vilanova de Cerveira.

Callobre comeza a conta atrás para o "Folk de Raíz":::


A bisbarra estoupa en festas coma cada verán. En Callobre están xa coa conta atrás dun dos festivais de música tradicional máis sobranceiros da comarca, o "Folk de Raíz". Nesta edición a organización concentrou todas as actuacións nun día, o venres, para abaratar custes, o que fará que sexa unha festa moito máis intensa, se cabe. O cartel está encabezado por Tiroliro, Treixadura, A Banda da Balbina, Ce o home orquesta e mailo Regato de Matamulleres. O grupo Treixadura deixou hai uns días moi bo sabor de boca nas festas do San Paio da Estrada polo que se agarda que sexa un dos grupos máis agardados da noite, aínda o que nivel das demais actuacións é tamén moi alto. Á semana seguinte, os días domingo 20 e luns 21 terá lugar a Santa Margarida, polo que Callobre non se despide das festas. Entre as actuacións destaca a orquesta portuguesa Funçao Pública.



Imaxes de arquivo. Folk de Raíz 2013

Así foi a Rapa das Bestas de Sabucedo:::

Centos de medios acreditados están dando conta de como decorreu a Rapa de 2014 que vén de rematar hoxe. Sabucedo acolleu centos de festeiros que dun xeito ou doutro foron convocados pola chamada da natureza e da tradición. Aínda que se correra a voz de que había xente tratando de cobrar pola acampada, non houbo máis incidentes que ese, sacando a chuvia que desluciu a festa, sobre todo o sábado. Tequexetéldere tivo que suspender a súa actuación no curro e moita xente pechouse nas tendas de campaña para protexerse. Pero o domingo volveu o bo tempo a Sabucedo e a rapa foi multitudinaria. Hoxe os fondos recadados irán para a Cruz Vermella.


o espectáculo da rapa das bestas séguese facendo coma antano.

multitude de público para presenciar a rapa.

Polbeiros e atraccións estiveron cheos toda a fin de semana.

Este ano o espectáculo de cetrería de Vilagarcía foi unha das novidades.

Gurpos de xinetes que se uniron á festa.

Tendas de campaña en Sabucedo.

1 de xullo de 2014

Así vai ser a Rapa das Bestas de Sabucedo:::

Cartel da festa da Rapa 2014
Sabucedo acolle esta semana, desde o xoves e ata o luns a tradicional festa da Rapa das Bestas. Desde a asociación "Rapa das Bestas" informan que este xoves día 3 ás 10 do serán haberá unha gala na honra dos aloitadores. Será a inauguración dunha festa declarada de interese turístico internacional. O venres teñen misa na honra de San Lourenzo ás 06.30h para ás 7 dar inicio á subida ao monte para ir na procura das bestas. Sobre as 2 do mediodía está prevista a chegada ao Peón cos animais, neste punto instalarán un carro con comida e bebida que servirá de avituallamento para todos aqueles que axuden a ir polas bestas ao monte. Para as 17:00h será cando teñan previsto o peche das bestas. A actividade lúdica comeza pola noite no Campo da Festa cun concerto de Roi Casal e unha verbena con dúas orquestas. Xa o sábado ás 12 do mediodía procederán a baixar o gando desde o peche na zona do Peón para ás 19:00h proceder á primeira das rapas no Curro Novo. Pola noite verbena con outras dúas orquestas. A segunda das rapas será o domingo ás 12 do medidía no mesmo lugar. Ás 17:00 haberá exhibicións de música e baile tradicional. Retrouso acturá canda a outras formacións da zona. A actividade continúa de noite con outra verbena. O luns 7 de xullo terá  lugar ás 12:00h a terceira rapa das bestas, desta volta cun curro solidario no cal a  recadación vai estar destinada á Cruz Vermella. As bestas serán liberadas ás 3 da tarde, dando por pechada a festa.
Arestora as tendas de campaña xa van deixando ver na parroquia, especialmente na Carballeira do Medio, mentres que se instalan os postos de comida e atraccións; transformando a aldea para acoller a milleiros de visitantes.
  

 Fotografías da Rapa das Bestas (histórica e de arquivo da Asociación Rapa das Bestas)