A Fervenza de Ouzande anuncia unha nova rota de sendeirismo pola parroquia:::

Segundo puidemos coñecer estes días A Fervenza de Ouzande comeza o programa de roteiros de primavera o día primeiro de maio de 2010 cun roteiro polos "carreiros" de Ouzande, unha camiñata de oito quilómetros que pasará polos lugares todos e polo monte. A organización ten a previsión de sair ás dez da mañá dende a igrexa para regresar ao mesmo punto á unha do mediodía. A asistencia é gratuíta e chega con estar no punto de partida o vindeiro sábado día 1 de maio á hora sinalda. Para anunciar este evento a asociación publicou esta información no seu muro da páxina facebook onde tamén se poden ver fotos dos lugares a percorrer. Neste lugar están publicadas opinións de asistencia de distintas persoas.

O abeto do Campo da Festa que causa perigo hase cortar este sábado:::

Hai xa tempo que unha das árbores situadas tralo cruceiro do Campo da Festa ameaza con desplomarse sobre o camiño e a Casa dos de Pura, o perigo vai en aumento posto que lle afectaría esta posible caída aos cables do tendido eléctrico que atravesan pola parte traseira do Campo.
Por este motivo a Xunta Parroquial vai acometer os traballos pertinentes para a retirada deste exemplar de abeto, será o próximo sábado 24 ás nove da mañá. Convidan a toda a veciñanza que poida aportar axuda a presentarse no lugar.

A Xunta Parroquial convoca unha reunión para formalizarse legalmente:::

A Xunta Parroquial decidiu levar a cabo o labor de legalización deste organismo para poder así mellorar os servizos que presta á parroquia.

A asociación que se constitúa sobre a antiga entidade será, entre outros, a encargada de representar oficialmente a parroquia ante as persoas e institucións pertinentes e de conseguir axudas ou outros bens de interese para Ouzande.

O vindeiro sábado ás 8 da tarde realizarase unha pequena presentación dos estatutos polos que se rexerá a nova entidade explicando os principais puntos de interese para todos os que desexen formar parte desta iniciativa.

Mamasunción volve ao correo o próximo domingo... outra vez:::

Así o vén de anunciar A Fervenza de Ouzande O logo do éxito de participación desta actividade que se desenvolveu na tarde de onte. Outro dos motivos que levou á organización a convocar unha segunda emisión foi que bastante xente que non puido asistir demanda unha reemisión. Tamén se puido constatar que a propia produción de Chano Piñeiro non era tan coñecida como se podería deducir a priori. Esta película vén de facer 25 anos pero continúa a emocionar... polo menos en Ouzande.
Será o próximo día 28 ás 5 e media da tarde.

tarde de cinema en Ouzande con MAMASUNCIÓN:::

A Fervenza de Ouzande proramou para este domingo unha tarde de cinema. O motivo é a presentación dun documental realizado por Xoque e Rochi no 25 aniversario da creación desta mediametraxe fundacional do cinema galego moderno. Máis información no blogue da asociación: CARREIROS

A Xunta anuncia a retirada do reemisor analóxico de televisión de Ouzande:::

A Xunta de Galicia vén de anunciarlle ao Concello da Estrada que o reemisor de Tv da nosa parroquia deixará de emitir en analóxico, de maneira que quen non teña adaptado o seu televisor á tecnoloxía dixital non poderá recibir o sinal televisivo. Ao mesmo tempo, retiraráse o sinal de Arca e Nigoi.

O remisor da nosa parroquia non lle afecta á totalidade da mesma, senón que beneficiaba a usuarios dalgunhas partes da aldea e a aqueles edificios da vila que teñen a antena orientada cara a Ouzande.

Os reemisores de Arca e Nigoi foron substituídos por un novo equipo que opera, en tecnoloxía dixital, desde o lugar de Outeiro, en Codeseda, mentres que para o de Ouzande aproveitouse a instalación xa existente. Desde finais do mes de febreiro, estes microreemisores estaban a simultanear a emisión en ambas tecnoloxías (dixital e analóxica), con ambos equipos funcionando á vez.

O video sobre a "inauguración" das beirarrúas de Ouzande, moi visitado na canle da Fervenza en YOUTUBE.COM:::

Este video relativo ao entroido organizado pola Fervenza de Ouzande, foi un dos máis visto de Youtube.com na canle da asociación con 174 reproducións no momento de redactar esta nova.

O video foi presentado formalmente o domingo pasado canda a revista Carreiros 8 que xa está á venda nos lugares de costume.
A asociación deu de alta unha canle propia no portal www.youtube.com e ten alxados videos relativos á actividade da entidade o 18 de xaneiro de 2008 e xa foi visionada 2590 veces en total. Os videos máis antigos suman maior número de visitas. Os máis recentes son o relativo ás actividades do ano 2009 que, dividido en tres partes pola súa lonxitude, aproxímase en número de visitas.
A Fervenza de Ouzande aloxou tamén ulitmamente un video relativo á entrevista que se lle fixo por parte da cadea privada CORREO TV e que xa ten 60 visitas. Estas imaxes tamén se proxectaron na festa de presentación de Carreiros 8.