Renovan o tendido eléctrico en Ouzande:::

Nos útlimos días operarios dunha empresa privada están renovando o sistema de tendido de baixa tensión da parroquia. De momento xa se ven os novos postes de formigón, máis altos que os antigos e máis alonxados entre si. 

Arranxan a Fonte e o Pozo do Río:::

Fonte do Río.

Unha brigada de obras do Concello da Estrada vén de realizar os traballos de limpeza e adecentamento da contorna da Fonte e do Pozo do Río, ubicados no lugar de Alemparte. Segundo explicou o concelleiro de Rural, Juan Constenla, o obxectivo destes traballos é crear un punto de recollida de auga para a loita contraincendios ao tempo que se recupera este espazo. As obras consistiron primeiramente no desbroce da zona, limpeza da fonte e do pozo que estaba cheo de maleza, pedras e lama, para finalmente encintar o muro da fonte e reparar a estrutura do pozo dándolle un pouco de altura e protexéndoo da pista que cruza a zona. Tanto a Fonte coma o Pozo do Río recollen auga procedente do regueiro, tradicionalmete usouse para almacenar auga de rega aínda que levaba bastante tempo inutilizada.

Pozo do Río.

Recuperouse o muro da fonte.

A fonte recolle a auga do regueiro.

Protexeuse o pozo do camiño que atravesa a zona.

Especial "RESUMO INFORMATIVO`13":::

Paralizan as obras da beirarrúa durante as festas do Nadal:::

A empresa que executa a obra de construción da beirarrúa entre O Tallo e a igrexa vén de paralizar os traballos con motivo das festas do Nadal. Nas últimas xornadas apuraron estes labores, traballando mesmo durante a madrugada do pasado venres e o sábado todo o día. O prazo de execución estipulado inicialmente para a obra é de tres meses polo que nun prazo de 60 días poderá estar rematada na súa totalidade a beirarrúa.

Segundo o proxecto asinado polo aparellador municipal Daniel Órrea, a obra contempla rede de pluviais e fecais nos tramos onde se precisa así como de telecomunicacións e electricidade. A beirarrúa ten unha anchura de 1 metro e 80 centímetros, contempla iluminación eléctrica con farolas de 8 metros de altura e a intervención proxectada chega ata a igrexa. O pavimentado estase a executar con formigón proxectado cando no documento inicial se contemplaba baldosa en continuación ás beirarrúas xa existentes. Hai que ter en conta que as obras foran inicialmente orzamentadas en novembro de 2012 polo Concello da Estrada con 500.000€ pero esta cifra foi reducida posteriormente a 150.000€ pola mesma administración encargada da obra.

En canto á senda peonil que se anunciou desde a igrexa e ata a costa da Labrada, aínda non está claro o que se pode facer. Nun principio anunciárase un pequeno tramo de terra pisada ou formigón entre o asfalto da calzada e os foxos de formigón construídos hai uns meses, pero o forte desnivel e o angosto da beiravía fixo necesario repensar esta intervención. Segundo afirmou o alcalde da Estrada ante os medios de comunicación locais a semana pasada, á volta do Nadal -cando se retomen as obras- valorarase se facer unha beirarrúa con bordo ou unha senda ao mesmo ou distinto nivel.

Con motivo destas obras, no último mes procedeuse a trasladar tres acivros adultos desde unha propiedade afectada ata o Campo da Festa e noutra parcela fíxose unha cesión de terreos polo que houbo que construír un novo muro. Veuse afectada a vida diaria da veciñanza e dos usuarios da estrada local, que tiveron que buscar novos lugares para estacionar os seus vehículos ou alternativas de circulación a causa do peche dalgunha pista. A circulación pola estrada de Ouzande foi alternada e sinalizada mediante semáforos de obra, uns semáforos que tamén foron noticia tralo roubo dun deles, o que motivou que Taboada e Ramos tivese denunciar os feitos, repoñer con outro semáforo e aumentar as medidas de seguridade.

Obras do formigonado da beirarrúa.

semáforo reposto

A Garda Civil investiga o roubo dun semáforo de obra en Ouzande:::

A Garda Civil investiga arestora o roubo dun dos dous semáforos de obra que a empresa Taboada&Ramos empregaba para regular o tráfico na estrada de Ouzande con motivo das obras de construción dunha beirarrúa nesta vía.

Os feitos aconteceron onte, venres 22 de novembro ao medidodía, cando os operarios da citada empresa facían o descanso do xantar. Os "amigos do alleo" só tiveron tempo de roubar un destes dous semáforos posto que foron sorprendidos coas "mans na masa" polos veciños. Os traballadores da empresa que executa a obra víronse na necesidade de prescindir do servizo de regulación semafórica durante a tarde e a empresa procedeu a presentar a correspondente denuncia perante á Garda Civil. Membros dos corpos de seguridade investigan agora os feitos para poder proceder á detención dos autores deste extraño roubo. Polo momento xa hai sospeitoso/s e probas incriminatorias, polo que é posible que en breve teñamos novas sobre este suceso.

Un dos semáforos que foron roubados onte ao mediodía

Continúan as obras da beirarrúa de Ouzande:::

A obra de construción da beirarrúa dereita que unirá O Tallo coa igrexa parroquial e mailo sendeiro que vai desde a Taberna de Ouzande e ata a Labrada continúa adiante. Durante a semana, a veciñanza tivo que soportar un regulamento por semáforo na estrada principal da aldea, alternando a circulación só nun sentido para deste xeito deixar espazo suficiente e seguro para que a maquinaria poidese traballar con seguridade. O tempo solleiro destes días acompaña a obra que, de non haber imprevistos, non se demorará moito no tempo.

Arrancan as obras da beirarrúa do Tallo á Labrada:::

Esta semana deron inicio as agardadas obras do tramo de beirarrúa que unirá o Tallo coa igrexa parroquial e maila senda peonil desde este segundo punto e ata a costa da Labrada.

As obras xa foran anunciadas o ano pasado e a súa execución estaba prevista primeiro para xaneiro e, logo dunha visita dos responsables municipais ao lugar, para setembro. Finalmente as máquinas chegaron a Ouzande este martes para facer os primeiros labores de movementos de terras e colocación de tubaxes.

A obra deixará na parroquia un novo tramo de beirarrúa desde o Tallo, continuando a xa existente ao lado da casa de "Manuel Ángel", continuará polo lado dereito segundo miramos cara á igrexa ata a Taberna da parroquia, a partir de aí será unha senda peonil ata a Costa da Labrada. As obras inclúen as correspondentes tubaxes de pluviais e iluminación con farois. No primeiro tramo contemplan espazo para aparcadoiros, quedando a zona da igrexa falta destes pola imposibilidade de ampliar o espazo público.

Obras na pista do Picoto:::

Maquinaria municipal visitou esta semana pasada o lugar do Picoto para proceder a realizar os traballos de limpeza da pista forestal deste lugar que se viña reclamando polos veciños desde había tempo. Hai xa anos que durante o inverno a auga que baixa do Monte de Ouzande foi desfacendo esta pista sen asfaltar, desviando a auga polo medio dos lugares do Picoto e do Redondo, provocando inundacións e problemas na rede viaria da zona. 

A finais de agosto, unha comitiva do Concello da Estrada visitaba a parroquia para explicar que se ían acometer as obras de construción da beirarrúa dereita entre o Tallo e a zona da igrexa parroquial. Os veciños insistíronlles na necesidade de facer esta obra paralela de limpeza para evitar que a estrada xeral de Ouzande se inunde e encha de lama. Deste xeito e no inicio do outono  agardan que as augas pluviais circulen polos foxos desta pista sen ocasionar danos e mantendo as pistas en boas condicións para o goce veciñal. Agora cómpre agardar polas obras da beirarrúa que estaban anunciadas para setembro e que terían unha duración máxima de tres meses.

Zona alta do Picoto onde comeza a pista arranxada

Foxos e tubaxes para que a auga circule por eles.

zona asfaltada do Picoto

As obras completáronse coa limpeza dos foxos da zona asfaltada

Paralizan unha obra no Formigueiro:::

O pasado xoves, o DOG publicou un anuncio da "Axencia de Protección da Legalidade Urbanística" pola que se anuncia que o xefe deste servizo acorda incoar o expediente de reposición da legalidade sobre unha obra que se está a realizar no lugar ouzandés do Formigueiro. Neste anuncio do DOG infórmase de que ao non poder contactar vía postal co responsable desta construción faise coa correspondente publicación no Diario Oficial de Galicia.

A edificación afectada por este anuncio sitúase na confluencia da estrada xeral de Ouzande coa pista que dá acceso ao Formigueiro polo sur e ás parcelas coñecidas co nome de Redondelo. Componse dun muro que rodea a propiedade, dunha construción auxiliar e mais dunha vivenda. O texto íntegro relativo a este asunto pode ser consultado nos edificios administrativos deste organismo, en Salgueiriños (Santiago de Compostela)

Contento veciñal pola limpeza das marxes da PO- 7003:::

Durante a xornada de onte, operarios da Deputación Provincial procederon a realizar as obras de limpeza das marxes da estrada que atravesa a parroquia de Ouzande. O contento veciñal non se fixo agardar, pois a maleza invadía totalmente as marxes e mesmo a calzada, dificultando a travesía dos peóns e as manobras dos condutores. Xa se volven ver os sinais de tráfico e os cruzamentos da PO-7003 coas distintas pistas da parroquia volvéronse máis seguros. Agora falta a limpeza das vías secundarias, sobre todo aquelas máis transitadas como as que unen Ouzande coa Estrada, Guimarei, A Somoza e maila zona de Penerada.

Sorpresa por unhas obras de drenaxe na estrada PO-7003:::

Durante a semana pasada, a Deputación Provincial realizou unha pequena obra na nosa parroquia, trátase da creación duns foxos de formigón na estrada que cruza Ouzande á altura da pista da "Costa da Labrada". Esta obra ha aliviar as augas da choiva que cada inverno baixan desde a zona alta de Alemparte camiño ben do Regueiro ben da parte baixa do lugar. 

Esta pequena obra non está exenta de polémica pois os foxos creados aumentarán o grao de inseguridade do vial PO-7003 ao reducir o espazo da beiravía e creando o perigo de haber un desnivel tan pronunciado á beira da estrada. A veciñanza de Alemparte móstrase contrariada logo de ter oído na última campaña electoral que no mes de xaneiro se realizarían estas obras pero coa construción de beirarrúas ata o citado lugar. Chegado o verán non hai beirarrúas e a maleza invade as marxes da estrada, deixando sen visibilidade os cruzamentos e sen espazo os lugares polos que deberían transitar os peóns. 

As obras realízanse no lugar de Alemparte.

.

Unha tubaxe por debaixo da pista da Labrada e unha canle de formigón derivarán a auga que baixa de Alemparte cara ao regueiro

Adxudican 150.000€ para o novo tramo das beirarrúas:::

A Deputación Provincial vén de adxudicar varias partidas orzamentarias para obras en concellos da súa xurisdición, entre elas encóntranse uns 150.000 euros que se destinarán ás obras de ampliación das beirarrúas de Ouzande. O tramo afectado é o comprendido desde o Tallo e ata a igrexa de Ouzande, polo lado máis próximo ao Redondo. A demanda veciñal segue a ser que cheguen ata a costa da Labrada e polos dous lados, pero a situación económica e a parálise nas administracións fai que esta obra tan necesaria para a seguridade vial da zona se vexa adiada a futuras adxudicacións. Os 400 metros que se han construír son a continuación das xa existentes e contan coa cesión dos terreos necesarios por parte dos propietarios das parcelas afectadas, segundo informou o Concello da Estrada.

Novo look para o Campo da Festa:::

O Campo da Festa de Ouzande locirá unha nova imaxe nos próximos meses grazas ás obras que se acaban de iniciar para arranxalo. A Xunta Parroquial vén de solicitarlle ao Concello da Estrada terra para botar polo chan e así poder achanzala e facer que medre herba dun xeito homoxéneo.

A terra xa está no Campo da Festa, agora só falta que sexa distribuída, que se semente herba e que se coide para que as vindeiras actividades a realizar no recinto festivo da parroquia conten cun piso  debidamente acondicionado.

A Xunta Parroquial tamén planea outras obras para optimizar o espazo na parte inferior do local e a construción dun pequeno almacén para gardar as infraestruturas das festas.

O Campo da Festa será cuberto con terra

Arestora a terra está amoreada na parte central do Campo da Festa

O novo tramo das beirarrúas podería ser construído en 2013:::

Segundo vén de informar o Concello da Estrada, as beirarrúas proxectadas desde o Tallo e até a igrexa de Ouzande, poderían ser construídas no vindeiro ano. O orzamento para ás mesmas é de 500.000€ e as obras poderían iniciarse no mesmo mes de xaneiro. O tramo a facer sería só dun lado da estrada, en concreto pola  parte dereita segundo imos cara á igrexa, afectaría a unha lonxitude de 500 metros e contaría coa mesma dotación que os 400 xa contruídos. Parece ser que xa falaron con todos os propietarios e que estes ceden desinteresadamente os terreos para que así se poida facer esta necesaria obra para a seguridade vial da parroquia. Polo de pronto, o proxecto terá que pasar o visto bo de Patrimonio, sobre todo polos últimos 100 metros, que entran na zona de especial protección deste organismo debido á proximidade da igrexa ouzandesa. 

O tramo a construír vai dende O Tallo e até a
igrexa de Ouzande (500m)

Na actualidade non hai beiravías;
desde a calzada pásase á cuneta

As beirarrúas de Ouzande volven ser noticia:::

As malnacidas beirarrúas de Ouzande volven estar de actualidade desde que o alcalde da Estrada anunciou nunha rolda de prensa que se contruirá un novo tramo desde o Tallo e ata a zona da taberna, aínda que só polo lateral dereito da vía. A operación custaríalle ás arcas municipais 150.000 euros. Lonxe de ser motivo de alegría para a veciñanza, esta é unha nova que se acolle con desconfianza. A causa disto é que a construción das xa existentes foi moi lenta, insanamente politizada e o resultado non contentou aos transeúntes pois son moi estreitas e non deixan moito espazo para o aparcamento. Este novo aviso de construción do tramo dáse en plena campaña electoral e é incompleta, pois a petición popular é que estas cheguen polas dúas marxes ata a igrexa de Ouzande. Agora só falta agardar para ver se este anuncio vai máis alá dunha declaración de intencións, desde logo será tema de conversa a retomar nas casas e camiños da parroquia.

imaxes de arquivo do inicio das obras

O asfalto volve a Ouzande:::

O asfalto volveu á parroquia para completar as obras de urbanización das beirarrúas no tramo que comprende desde o Empalme ata ao Tallo.
Esta obra era moi necesaria para completar esta iniciativa que a día de hoxe na que aínda queda pendente o encendido das farolas e a a ampliación da obra ata a zona da igrexa.
Por outra banda, vénse iniciando nas últimas dastas a precampaña electoral, con mitins por parte do PP onde o alcaldable Xosé López se presentou ante a veciñanza e na xornada de onte foi o alcalde Xosé Dono, do PSOE quen, acompañado da corporación municipal, falou das accións do goberno a nivel municipal e a incidencia na parroquia das súas iniciativas. Ao remate convidaron á veciñanza a uns pinchos no renovado local social.

INAUGURACIÓN POR TODO O ALTO:::

O pasado sábado a Xunta Parroquial, a Fervenza de Ouzande e mailo alcalde de barrio organizaron un acto para darlle o estreo ás obras do local que nos últimos meses transformaron a fisonomía do palco, dotándoo de novos espazos utilizables, facendo a construción máis accesible e aillándoa das inclemencias do tempo.
Foi moita a xente que se achegou para ver de preto o resultado final desta intervención. Para isto organizaron un visionado de fotografías na parte inferior, que conta con novas ventás e persianas. Na marxe superior instaláronse mesas con pinchos que degustou o público asistente. Xa na parte esterior, na zona das novas escaleiras, da rampa de acceso e de palco fíxose o acto simbólico co que a veciñanza festexou esta novidade para a parroquia, coa plantación dunha laranxeira por parte dalgúns nenos e nenas ouzandeses, presente e futuro da parroquia.
Ao acto asistiron membros da corporación municipal que puideron comprobar a utilidade que se lle ha dar a esta intervención na parroquia máis dinámica do municipio e destacaron o bo resultado da obra.

O próximo sábado inaugúrase o novo local social no vello palco:::

Será ás 7 e cuarto tal e como reza o cartel que se fixo para a ocasión. Actuará o grupo ouzandés Retrouso e Xunta Parroquial e Fervenza de Ouzande ofrecerán conxuntamente uns pinchos para compartir tan feliz acontecemento.

Polo de pronto xa volveu a actividade normal á parroquia logo de que durante as obras se trasladaran as clases de pandeireta, baile, percusión e gaita ao local da veciña parroquia de Guimarei. Esta tarde pandeiretas, gaitas e tamboriles estrearon casa nova.

Ouzande estrea casa:::

Remataron as obras de remodelación do palco de Ouzande. Na tarde de onte os operarios da empresa Cutrín, encargada da obra déronlle os últimos retoques. Membrosda Fervenza de Ouzande aproveitaron que se liberou o local da parte inferior para facer unha limpeza profunda do mesmo. Xunta Parroquial e A Fervenza de Ouzande organizan agora un acto dirixido a toda a veciñanza para inaugurar esta ampliación de espazos sociais na parroquia. Sérá o próximo sábado 26 de febreiro ás 19h. Servirán uns pinchos nunha tarde de portas abertas para que todo o mundo poida comprobar como quedou esta importante reforma na que é a casa dos ouzandeses.

Ultiman as obras no palco de Ouzande:::

As obras no palco de Ouzande están a piques de rematar. Esta semana recibiron a visita do alcalde da Estrada, Xosé Antonio Dono, quen constatou o bo ritmo no que se executaron estes traballos. A falta de rematar con algúns detalles menores, Ouzande prepárase para darlle uso, retomando as clases dos sábados e a actividade normal da Xunta Parroquial, da Asociación Cultural A Fervenza de Ouzande...