verbena coa orquesta Panorama, esta noite en Ouzande:::

Ouzande retoma esta noite o seu ciclo festivo cunha verbena. Será a partir das 22:30 e coa actuación da orquestra Panorama. Paralelamente haberá a actuación dunha discoteca móbil e servizo de polbeiría. O evento é o preámbulo ás festas da parroquia que se celebran en xuño (Santo Antonio), agosto (patronais) e setembro (romaría do Socorro)

Verbena este venres en Ouzande coa orquestra "El Combo Dominicano":::

Tralo parón motivado pola pandemia, Ouzande énchese de watios e luces este venres 27 de maio. Trátase dunha verbena organizada pola Xunta Parroquial e que levará ao Campo da Festa de Ouzande unha discoteca móbil e a orquesta El Combo Dominicano. A cita festiva comezará ás 20h e contará cunha polbeiría e, en caso de mal tempo, cunha gran carpa. 

As vindeiras festividades son o Santo Antonio, as festas patronais de agosto e a romaría do Socorro que viñan de non ser celebradas  nos últimos anos a causa das restricións sanitarias. 

Ouzande cancela todas as súas festas de verán:::

A Comisión de Festas anunciou durante o confinamento a suspensión de todos os actos festivos desde xuño até setembro en resposta á crise do Coronavirus. Cancelaron tamén o cobro das cotas aos veciños.

2020 será recordado coma o ano da COVID-19 e en Ouzande pasará á historia coma o ano da cancelación de toda actividade social desde o pasado mes de marzo. As primeiras afectadas foron as clases de música tradicional, A Fervenza de Ouzande anunciara a súa suspensión canda a supresion das clases da formación regrada. A actividade cultural da primavera en Ouzande estivo confinada e agora os grandes días de sol son días de desescalada por fases nos que non ten lugar a actividade social ligada ás festas parroquiais.

En total son tres datas festivas as que se deixarán de celebrar; en xuño o Santo Antonio coas súa tradicional sardiñada, en agosto as festas patronais na honra de San Lourenzo patrono de Ouzande e en setembro a tradicional Romaría do Socorro.

A comisión festiva composta pola Xunta Parroquial así o anunciou hai días canda a supresión dos cobros das cotas festivas que habitualmente se realizaban no adro da igrexa nos propios días das festas.

imaxes de arquivo

Fin de semana festivo en Ouzande:::

 Ouzande despide esta fin de semana a tempada festiva de verán coa romaría do Socorro, desde o xoves 29 de agosto estanse celebrando os actos festivos da novena á Virxe do Socorro e hoxe comeza a festa co grupo Kyoto, mañá misa ás 13.15h e sesión vermú con Orquídea, pola noite esta formación únese a Trío Savoy para amenizar a verbena. Xa no domingo, día grande das festas coa misa ás 13.15h e trala procesión poxa das ofrendas á Virxe. A seguir concerto da Banda de Música Municipal da Estrada que durante a mañá estará facendo pasarrúas pola parroquia.

charanga BB+ 

Grupo Foliada nas festas de agosto

sesión vermouth nas festas patronais de agosto

Ouzande desafía á chuvia e celebra esta fin de semana as festas patronais:::

Desde o venres 9 ao domingo 11 de agosto Ouzande está de festa, trátase dos tradicionais festexos na honra do patrón, San Lourenzo, así como ao Santísimo Sacramento.  O venres está prevista a actuación da orquesta FOLIADA da Coruña. O sábado os actos relixiosos na honra de San Lourenzo son ás 13.15h e a continuación procesión co grupo OS XUNCOS e sesión vermú amenizada polo grupo DISEÑO, quen tamén amenizará a sesión verbena a partir das 22h. Xa para rematar, o domingo a misa será a mesma hora, pero dedicada ao Santísimo Sacramento. A animación correrá a cargo da charanga BB+ que fará pasarrúas pola parroquia e que amenizará  a sesión vermú. 

Ouzande despide o domingo as festas ata a fin de semana do 6, 7 e 8 de setembro que se celebrará a Romaría do Socorro.

 imaxes de arquivo, festas de anos anteriores

noite de festa en Ouzande 

procesión Santísimo Sacramento

imaxe de San Lourenzo, patrón da parroquia, na procesión do Socorro.

Sardiñas e charanga para celebrar o Santo Antonio:::

O vindeiro sábado 8 de xuño, a parroquia ouzandesa celebra a festividade de Santo Antonio. E farao a partir das 20.30h que terá lugar unha misa rezada na honra do patrón dos animais no interior do templo parroquial. A igrexa románica de Ouzande será testumuña á finalización dos actos relixiosos dunha festa baseada na degustación de sardiñas. Esta animación estará musicada pola charanga BB+. A festa é gratuíta e con ela a parroquia ouzandesa inicia os festexos de verán que terán continuación en agosto coas festas patronais e rematarán en setembro coa Romaría do Socorro. Nesta ocasión a celebración de Santo Antonio faise en sábado, cando o habitual era en venres. É unha iniciativa organizada pola Xunta Parroquial de Ouzande.

Ouzande celebra a Romaría do Socorro os vindeiros 7, 8 e 9 de setembro:::

Este xoves comezan os actos relixiosos coa novena, que será ás 20.30h, nos días da festa as celebracións están marcadas para as 13.15h.

O primeiro día, venres, haberá unha "Noite de Música Tradicional" cun posto de polbo e cinco agrupacións musicais que encheràn de festa o Campo de Ouzande, son Rosalía de Castro de Cacheiras, Os Xeitosos de Trazo e Sonche leiras de Trazo e os ouzandeses Retrouso e Recanto. O sábado ao mediodía haberà procesión amenizada por Abrente do Foxo e sesión vermú con Diseño, mentres que pola noite a festa vai ser animada por Diseño e Amencer. No domingo a música volverá ser a protagonista coa Banda de Música Municipal da Estrada. Con estes festexos a parroquia pecha a programación festiva do verán, lembrar que as festas patronais foron o pasado 10, 11 e 12 de agosto.

Cartel do Socorro e imaxes das pasadas festas patronais

Ouzande inicia hoxe as súas festas patronais:::

Esta noite a parroquia de Ouzande inicia os festexos patronais na honra de San Lourenzo cunha verbena a partir das 22h e na que haberá a oporunidade de cear no Campo da Festa pois haberá instalado un posto de polbo. A animación musical correrá a cargo da orquestra Galilea da Estrada. O sábado haberá actos relixiosos ás 13.15h que darán paso á sesión vermú animada polo trío Orquídea. Xa pola noite duelo de tríos musicais con Orquídea e Savoy. Para rematar, o domingo, os actos relixiosos serán ás 13.15h e a animación musical estará a cargo da charanga BB+. Os festexos son na honra do patrón da parroquia, San Lourenzo e do Santísimo Sacramento. Os días 7, 8 e 9 de setembro continuarán as festas de verán de Ouzande, desta volta coa Romería do Socorro.

Fitou convertiu este sábado a parroquia de Ouzande na capital mundial do turismo:::

O recinto do IFOU (Instituto Feiral de Ouzande) acolleu este sábado de Entroido a 1ª edición de FITOU, a Feira Internacional de Turismo de Ouzande. Esta edición estivo marcada pola innovación tecnolóxica e polos novos modelos turísticos. Superouse o récord de asistencia e xeráronse cuantiosos ingresos que aínda están por cuantificar. Desde as 20h o IFOU acolleu as últimas propostas, destinos internacionais, axencias e touroperadores, hoteis e restauración, compañías de transporte e empresas de servizos que trataron de explotar ao máximo as súas potencialidades de negocio. A presenza de países foi moi importante, pois ademais dos clásicos destinos europeos como Portugal, España ou Francia, houbo un importante incremento dos destinos asiáticos, co xigante chinés en cabeza. Outros países destacables foron México, Rusia ou Inglaterra. Non faltaron os mandatarios mundiais que apoiaron coa súa presenza o turismo dos seus respectivos países, cabe destacar que a mesma raíña de Inglaterra estivo apoiando en persoa a causa inglesa, logo da caída de ingresos por turismo tralo Brexit. Outro mandatario que non se agardaba en Ouzande foi Carles Puigdemont, quen animou aos asistentes a apoiar o turismo en Cataluña. O país convidado deste ano foi a China que desprazou un gran continxente e mesmo contou con estand propio. O turismo galego tamén tivo cabida cunha forte aposta polos folletos turísticos e a gastronomía. 

A edición máis tecnolóxica.

Non só o papel, senón as novas tecnoloxías e a promoción turística estiveron en boca dos promotores turísticos. A experiencia tecnolóxica hi-grella permitiu aos aistentes gozar dunha experiencia personalizada na degustación de manxares como churrasco, tortilla ou sobremesas de entroido. Os últimos adiantos tamén serviron para presentar novos modelos de turismo máis sostible. Outra das novidades foron as propostas de turismo especializado, como as rutas das meigastour, novas experiencias turísticas para descubrir os aspectos máis máxicos do turismo europeo. Segundo puido saber esta redacción as grandes ausentes no evento foron as cegas do Entroido que non chegaron a tempo á súa cita en Ouzande por estar precisamente facendo turismo no Brasil, aproveitando as baixas temperaturas destes días colleron rumbo ao cálido entroido brasileiro e gozar así coas delegacións ouzandesas naquel país dos costumes locais.

A Estrada acolle este sábado a I edición de FITOU, a feira internacional de turismo de Ouzande

Será no IFOU, o Instituto Feiral de Ouzande este sábado 10 ás 20h cando abran as portas os pavillóns e as distintas delegacións mundiais presenten as súas ofertas turísticas para a nova tempada. Desde a organización anunciaron castings de azafatas e azafatos e a presenza de delegacións de todo o mundo que traerán o mellor do turismo de todo o planeta a Ouzande. O evento inclúe música e comida, así como festa e premios para os distintos postos turísticos. 

Desde o Portal de Noticias estaremos atentos a todo canto aconteza en Ouzande esa tarde, xa que seremos un dos medios acreditados para transmitirlle ao mundo as novas propostas turísticas de 2018.

outono á ouzandesa:::

O pasado sábado, a parroquia de Ouzande celebrou as súas festas de outono. A cita comezou ao serán, co asado das castañas e chourizos. O ambiente foise animando á beira da barra do carro. Socios da Fervenza de Ouzande foron aportando os seus dóces feitos con produtos de tempada. Finalmente a música que durou ata altas horas da madrugada e que xuntou no Campo da Festa ás Carabuñeiras de Santo André de Vea, Retrouso e Recanto. 

Festa do Lumeiro para cumprir con todos os ritos en Ouzande:::

Ouzande é unha parroquia moi ligada ás súas tradicións e, como cada noite do 23 de xuño, un nutrido grupo de persoas xuntáronse ao carón da auga e do lume purificadores para espantar bruxas e demos. A Fervenza de Ouzande ideou hai xa máis de 15 anos un sistema moi peculiar baseado no "Home do Saco", un personaxe mítico moi arraigado na vida local ao que sen dubidalo, botan ao lume cando pasa a medianoite. Este ano foi de cartón e levou canda si o "saco" no que cadaquén previamente tiña botado papeliños con aspectos da súa vida a queimar. Unha procesión fúnebre nocturna capitaneada polas gaitas da asociación deu inicio ao fin do peculiar personaxe. Unha vez queimado soou a música de festa e o baile para festexar a limpeza de cada primavera. Non faltaron os saltos por riba da fogueira que fixo demorar aos festeiros no Campo ata altas horas.

O espírito ourovisivo arrasa en Ouzande

Betty Missiego, gañadora representando ao Redondo

O Entroido é un período moi especial en Ouzande, a parroquia vive con entrega estas datas do calendario festivo. Non faltan as “mascaritas” que percorran as aldeas na procura do seu premio. Pero, como cada ano, a Fervenza de Ouzande fai a sú orixinal proposta. Desta vez organizaron unha festa de entroido no local social da parroquia o pasado sábado 26, pero non unha festa calquera, senón un festival de “ourovisión”. A dinámica foi parella ao coñecido concurso televisivo dos países europeos, pero ao xeito de Ouzande. Ao local foron chegando os máis variados personaxes relacionados con este mítico festival. No transcurso da festa houbo comida e bebida e música tradicional, pero tamén unhas divertidas votacións para escoller a persoa gañadora do concurso. Os finalistas foron as aldeas de Alemparte, O Formigueiro, O Tallo, O Castro e O Redondo. Un representante de cada lugar foi escollido polo xurado para premiar o seu talento ourovisivo. A comisión que decidiu cantos votos ía para cada lugar estaba formada por representantes deses lugares, aínda que non se puideron votar a si mesmos. Así as cousas, e a pesar de estar moi reñido, polo alto nivel dos disfraces, os gañadores foron os seguintes: en terceiro lugar “As Estribillos” unha comparsa de gaiteiras reconvertida a ouro-fans que animou a velada cos seus berros de alegría. Representaban ao lugar do Formigueiro. O segundo lugar foi para O Tallo con Mocedades, que non só levou a festa á época deste coñecido grupo senón que tamén ofreceu un recital, posto que os integrantes desta comparsa eran o grupo de canto da parroquia, Recanto. E finalmetne o lugar máis votado foi o Redondo, representado por Betty Missiego que ofreceu non só un disfraz moi logrado senón que animou a festa interpretando “su canción”. Ao premio engadiuselle o canto das coplas do entroido desta volta encarnadas pola propia Betty Missiego e Remedios Amaya.

Polo Formigueiro as Estribillos, segundo lugar

As cegas do Entroido tamén se ourovisualizaron

público

Mocedades, actuando. Representaron ao Tallo e lograron o 2 posto.

Ouzande despide as festas de verán coa romería do Socorro:::

As festas do Socorro chegaron ao seu fin, e con elas as festividades estivais da parroquia estradense de Ouzande. Foron tres días marcados polo acento tradicional, con moita música, actos relixiosos e procesións ou a poxa das ofrendas á santa. A actividade xa comezara o pasado día 1,durante nove días consecutivos devotos de toda a bisbarra abarrotaron o templo parroquial na tradicional novena. O venres día 9 houbo unha gran festa con cinco grupos musicais, foi a IX Fervenza de Músicas organizada pola Fervenza de Ouzande e que encheu o campo ouzandés de xente, baile, polbo e moita música. O sábado Abrente do Foxo animou a festa ao mediodía trala procesión do Carme e amenizando a sesión vermú. Pola noite houbo unha verbena con Togayán e Fenix. Xa no domingo a charanga os Atrevidos fixo pasarrúas pola aldea ao tempo que o adro da igrexa ouzandesa ía recibindo as ofrendas. Trala misa, que foi ás 13.15h procesión no día grande do Socorro e poxa. As plantas mesturáronse cos produtos do campo: patacas e pementos, galos... Tamén houbo poxa de gatiños e coellos así como dalgún libro, dos panos da santa entre outros moitos produtos. Ao remate houbo sesión vermú cos Atrevidos no mesmo lugar. Con estes tres días de intensa actividade péchanse as Festas de verán de Ouzande que sumaron un total de sete xornadas festivas, unha en xuño e tres en agosto e setembro respectivamente.

Noticia relacionada: Crónica do IX Fervenza de Músicas

Un momento da Fervenza de Músicas coa actuación do grupo local RECANTO

Abrente do Foxo na sesión vermú do sábado

Procesión no día grande das festas do Socorro.

Atentos á poxa

poxouse tamén por uns coelliños 

O adro estivo cheo duante a poxa

Fervenza de Músicas, noite de Estrelas:::

Unha temperatura agradable, unhas racións de polbo e as mellores músicas foron os ingredientes co que se cociñou na noite de onte a IX edición do Fervenza de Músicas. Aínda que o prato principal foron precisamente as músicas, o Campo da Festa de Ouzande foi escenario da convivencia ao redor das mesas do polbeiro, tamén houbo un carro e moi bo ambiente no inicio das festas do Socorro. Retrouso había presentar a súa canteira, con xente nova ao tempo que A Fervenza de Ouzande presentaba a oferta de cursos de música tradicional para o novo curso. Xarandaina, de Ponte Cesures trouxo unha completa representación do seu bo facer, con cantareiras incluídas e bos e boas bailadores. Recanto fixo a delicia dos asistentes xuntando as súas voces e cun repertorio que animaba a cantar e a moverse ao ritmo da música. A animación dos Gaiteiros de Buxantes elevou a festa ata o máis alto a ritmo de pasodobles, muiñeiras e xotas. E, finalmente, Pana Raiada había de poñer o broche de ouro ás actuacións ao pé de campo da IX Fervenza de Músicas. Pero a festa non acabou aí posto que o baile e as músicas habíanse adentrar na madrugada coa gran animación da gran cantidade de bos músicos que se deron cita onte en Ouzande.

Retrouso

Xarandeira

posto abarrotado do polbeiro

Xarandeira

bailadores

momento da festa

Recanto

giaiteiros de Buxantes

Pana Raiada

ambiente da festa