OUZANDE VOLVE DE EXCURSIÓN:::

A Fervenza de Ouzande volve organizar as súas carismáticas excursións que estiveran conxeladas durante a pandemia. A inscrición xa está aberta e hai prazas limitadas polo que as persoas interesadas aínda están a tempo de conseguir ocupar unha delas.

As persoas socias gozan dun desconto e só pagan 15€ (menosres de idade 10€) As persoas non socias tamén poden participar pagando un plus de 5€. A inscrición é na taberna de Ouzande á que se pode chamar ao 986 57 02 85 ou enviando un correo electrónico á asociación: carreirosouzande@gmail.com.

A ruta arranca de Ouzande en autobús o domingo 14 de maio ás 9 da mañá e parte cara o recanto máis ao suroeste de Galicia visitando as localidades de Baiona, Oia e maila Guarda.

En Baiona haberá tempo de lecer e visita a esta localidade, considerada a vila mariñeira mellor apreciada polos turistas que visitan Galicia, tralo paseo polo seu casco histórico realizarase unha das rutas máis destacadas da costa galega; o tramo Baiona-Oia fronte o mar aberto.

En Santa María de Oia realizarase unha visita guiada ao seu Mosteiro e darase un paseo pola aldea, cadrando cos peregrinos que realizan a ruta mariñeira.

O xantar será ao pé do Río Tamuxe, no Rosal e a tarde estará dedicada á vila mariñeira da Guarda, cunha visita guiada e tempo libre. Antes de poñer rumbo de volta pasearase polo porto, con posibilidade de acceder ao museo do mar ou subir ao emblemático Monte de Santa Trega.

 

 

Ouzande descubre os segredos das comarcas de Mondoñedo e Meira:::

Foi o pasado domingo 9 de xuño cando unha nutrida representación veciñal de Ouzande emprendeu viaxe rumbo ao norte de Lugo para coñecer varias das xoias que atesouran estas terras. Pola mañá foi San Martiño de Mondoñedo, a primitiva sé episcopal que a día de hoxe ofrece tanto esculturas como pinturas murais de grande valor patrimonial, a visita foi guiada e isto axudou moito a comprender mellor a sé catedralícia máis antiga do sur de Europa. A seguir, tralos pasos de Álvaro Cunqueiro, fíxose unha visita ao núcleo urbano da cidade de Mondoñedo, centrada na Casa- Museo do ilustre autor mindoniense. O xantar foi en Meira, no Cabanón que o Concello de Meira tivo a ben dispoñer para poder facer unha comida convivencia entre a veciñanza. Pola tarde, a guía de Meira, Joani, encandilou aos ouzandeses cos misterios e curiosidades da antiga igrexa monacal de Meira e axudou a entender a importancia e arquitectura daquel mosteiro, hoxe reconvertido en igrexa parroquial, casa parroquial e Casa do Concello. A vida monacal deu paso a un momento máxico como foi a visita ao nacemento do Río Miño, en Irimia, unha morrena glacial cargada de lendas e historias que os ouzandeses foron coñecendo ao tempo que descubriron o espectacular Pedregal de Irimia primeiro e a lagoa de Fonmiñá despois. O regreso á casa foi desde este punto do Concello da Pastoriza. A pesar das horas en autobús que supuña esta viaxe, resultou moi satisfactoria e deixou moi bo sabor de boca.

Joani, guía de Meira explicando os segredos do Mosteiro.

Descubrindo a casa de Álvaro Cunqueiro.

xantando no Cabanón.

Obra monumental na porta de Santa María de Meira, ferraxe datada en época medieval.

Santa María de Meira.

Pedregal de Irimia.

Prazas libres para a excursión anual de Ouzande:::

Ouzande marcha de excursión, será este domingo, e farao a Mondoñedo e a súa contorna. A Fervenza de Ouzande, organizadora desta emblemática cita anual do colectivo vén de desvelar que queda algunha vacante libre para poder participar nesta actividade, está aberta a socios e non socios, simplemente hai que poñerse en contacto coa asociación mediante o correo electrónico ou facebook ou ben chamando á taberna de Ouzande. 

habitualmente as prazas esgótanse en cuestión de horas, pero desta ocasión aínda é posible anotarse. A excursión anual da Fervenza de Ouzande é unha das actividades máis demandadas e agradecidas e pretende crear un espazo de convivencia veciñal e achegados con xentes doutros puntos de Galicia, así como dar a coñecer territorios da xeografía galega desde unha perspectiva orixinal.

Nesta ocasión realizarán unha visita ao Santuario de San Martiño de Mondoñedo, en Foz e a continuación descubrirán as terras de Álvaro Cunqueiro, Mondoñedo. Sen embargo, o xantar e a tarde serán en Meira, onde coñecerán o seu mosteiro, xantarán e terán a oportunidade de descubrir un dos lugares máis senlleiros de Galicia, o nacemento do Río Miño, coas súas lendas e historias. A saída é o domingo ás 08.30h da mañá diante da igrexa parroquial.

Casa de Álvaro Cunqueiro coa catedral de Mondoñedo en fronte

Nacemento do románico en Galicia en San Martiño de Mondoñedo

Pinturas medievais en San Martiño de Mondoñedo

Fonte de auga santa

Meira

Meira

Ouzande destapa os segredos máis ocultos da Coruña:::

A Fervenza de Ouzande realizou o pasado domingo, 29 de maio a súa excursión anual, unha das actividades máis exitosas da entidade e que provoca máis expectación. Tal é así que nin a publicitan. Todos os socios e persoas que coñecen a organización destas "rutas" tan especiais non o queren perder baixo ningún concepto. O motivo radica no orixinal deseño dos itinerarios destas saidas que posibilitan o coñecemento ameno dos lugares e a convivencia do grupo. Acompañamos este ano á Fervenza de Ouzande rumbo á cidade herculina. O autobús serve para crear bo ambiente ente os viaxeiros e para fornelos de datos relativos á cidade e que posibilitan que no desembarque seaxn coñecedores dalgúns dos seus segredos que, pouco a pouco, se poden descobrir in situ. A mañá foi para coñecer o mar da Coruña, Riazor, Orzán, a Torre de Hércules... un lugar cheo de lendas e mitos e que foi a antesala dunha das actividades máis aplaudidas da xornada, a visita á Casa dos Peixes, onde os ouzandeses puideron coñecer de primeira man os coidados e as particularidades das focas. Nenos e maiores marabillados co mundo mariño e sendo respectados por un día que prometía chuvioso pero que finalmente lociu solleiro. Tal foi así que o xantar se fixo ao aire libre, no Parque de Santa Margarita. Un momento especial, de falar e compartir e sen os agobios das excursións que o prentenden mostrar todo. Coa Fervenza de Ouzande as visitas son moi selectas, imprimíndolle máis valor ao tempo de conversa e ao autocoñecemento. A tarde foi de excepción, a deseñadora Rosa de Cabanas, arquitecta, fixo de guía, mostrando unha Coruña que asombou non só aos ouzandeses, senón tamén aos veciños da cidade que se uniron ás explicación, atopando respostas á razón de existir de tan preciosa cidade. A Coruña medieval, a pegada da poetisa Rosalía  de Castro, como era e como é o mar da Coruña, o Paseo do Parrote, como foi na época romana, coa Ilustración... foi moito o que se aprendeu en moi pouco tempo, cun paseo agradable e proveitoso. Ao remate un chisco de tempo libre para perderse pola cidade e para vivila antes de partir de novo para Ouzande, matinando cal será o destino do ano vindeiro...

Explicacións na Casa dos Peixes

Foto de grupo 

A Coruña de María Pita

Paseo pola Coruña medieval

foto de grupo nun dos recantos agochados máis fermosos da cidade.

Guimarei descobre os seus encantos:::

Torre de Guimarei

A parroquia de Guimarei foi a escollida pola Fervenza de Ouzande para celebrar a última ruta de primavera de 2015. Unhas vinte persoas congregáronse ás 10 da mañá de onte, domingo, para iniciar unha ruta de 13 quilómetros polos distintos camiños e pistas de Ouzande, Guimarei e A Somoza. As primeiras paradas foron para o románico da zona,  tanto na igrexa de Ouzande coma a Torre e Pazo de Guimarei. A seguir a casa grande da Algalia e a igrexa de Guimarei. Neste punto visitaron a escalinata barroca que xunto á Torre de Guimarei e á igrexa de Ouzande constitúen elementos moi identificables na obra gráfica de Castelao. O patrimonio de Guimarei fíxose protagonista, pasando tamén polo Pazo de Xerlís e pola presa deste mesmo lugar. 

A Torre de Guimarei son de titularidade privada e están en ruína, a primeira é do século XII e o pazo do XVII, destaca pola monumentalidade da súa pedra. O Pazo da Algalia tamén se atopa en situación de abandono e só se puido entrever no medio da maleza. A igrexa de Guimarei é de estilo barroco e destaca pola fachada e torre monumentais así como polas escaleiras inmortalizadas polo propio Castelao na súa obra gráfica. O Pazo de Xerlís é o único que se rehabilitou en 2012, trátase dun pazo do século XVII, vivenda residencial dunha familia de escribáns beneficiados polas rendas de foros propiciados pola Igrexa naquela época. Na súa fachada destaca o brasón familiar. Actualmente destinase á hostelería, sendo escenario de banquetes e grandes eventos. Ao lado desta construción centenaria parte unha das presas de rega da parroquia.

Con esta andaina, péchanse as saídas de primavera, pero as rutas da Fervenza de Ouzande continuarán no outrono-inverno, tal e como indicaron na propia actividade.

Cruzando Alemparte.

Cruzando auténticos escenarios de película

A andaina percorreu 13km

Pazo de Guimarei

Pazo da Algalia

Igrexa de Guimarei e Pedralba

Pazo de Xerlís, hoxe destinado á hostelería.

Visitantes que se cruzan nos camiños

A golpe de camiñata para baixar a cea de Noiteboa:::

Así foi como decidiron celebrar o Nadal unhas 25 persoas que responderon á convocatoria da Asociación Cultural A Fervenza de Ouzande. Ás 10h 30 encontráronse fronte á Casa Porto, taberna de Ouzande para, mochila ao lombo, subir decididamente polo Monte de Ouzande. O obxectivo foi coroar o castro de Arcos, xa no veciño municipio de Cuntis, cousa  que sonseguiron facer contra as 12 do mediodía. A baixada fixérona polo encoro da Estrada para desviarse cara ao lugar no que nace a Fervenza da parroquia, o Rego das Rans, seguidamente visitaron o conxunto de muíños e pozos que conforman o espazo ecolóxico que dá nome á asociación para seguidamente acceder á igrexa parroquial onde gozaron dunha visita guiada, descubrindo algúns aspectos do románico ouzandés. Esta era a quinta edición da "Feliz Ruta de Nadal" e contou con moi bo tempo e ánimo por parte dos asistentes que percorreron 11.5 km en tres horas de andaina.

Camiñantes fronte a Casa Porto.

Algunha sorpresa desagradable onda o Punto Limpo da Estrada.

Subindo cara ao Castro.

Accedente á coroa do castro de Arcos.

No descenso.

A ruta rematou cunha visita guiada á igrexa románica de Ouzande.

Paseo de outono desde Ouzande ata Castrorramiro:::

Foto de grupo dos sendeiristas.

O outono foi o fío condutor da ruta que esta mañá levou a unhas 15 persoas a percorrer os montes das parroquias de Ouzande e A Somoza. Saíron ás 10 da mañá da igrexa ouzandesa en dirección á Fervenza, onde visitaron os muíños e o Pozo. Atravesaron polo monte de Ouzande por diversos camiños onde gozaron da estación outonal, sobre todo pola diversidade de cogomelos pero tamén con diversos detalles que se foron atopando coma por exemplo un nespereiro. A ruta discurriu baixo os carballos da Somoza para desenvocar no lugar de Castrorramiro. A volta fíxose por outros lugares da Somoza para entrar en Ouzande polo Topete e finalizar sobre a 1 e media do mediodía no mesmo punto de partida. En total foron uns 12 quilómetros os que percorreron os sendeiristas nesta II Ruta do Outono, organizada pola Asociación Cultural A Fervenza de Ouzande.

Foto de grupo na saída.

O grupo atravesou a contorna dos muíños da Fervenza.

A Ruta cruzou o Pozo da Fervenza.

Foto de grupo na Fonte da Somoza.

II Ruta do Outono, o próximo domingo 12 de outubro polos montes de Ouzande e A Somoza:::

cartel da actividade.

Dentro da programación cultural de outono programada pola Fervenza de Ouzande, o próximo domingo 12 celebrarase un roteiro de sendeirismo. A cita é ás 10 da mañá diante da igrexa parroquial de Ouzande e levará aos camiñantes polos montes de Ouzande e A Somoza, está previsto que visiten os Muíños da Fervenza, as frondosas carballeiras da Somoza e o lugar de Castrorramiro. A chegada está prevista para a unha e media do mediodía. Ainda que as previsións meterolóxicas ofrecen bo tempo para o roteiro, a organización aconsella levar roupa impermeable e cómoda. A actividade é gratuíta e aberta a todos os que queiran participar, tendo os menores de idade que ir acompañados dun adulto.

Imaxe de arquivo da I ruta de outono.

grupo participante na primeira edición da Ruta do Outono.

Ruta turística polo Morrazo desafiando ao mal tempo:::

Chegada a Donón, en Cangas.

Contra vento e marea. Así foi a excursión anual da Fervenza de Ouzande que onte, domingo 8 de xuño, levou ao Morrazo a uns 63 intrépidos excursionistas. Cando eran as 9 da mañá arrancaba cheo ata a bandeira un autobús baixo fortes chuvascos. A entrada en Bueu fixérona con sintonía propia; “Se vou a Bueu” de Andrés do Barro. A primeira visita foi ao Museo Massó onde descubriron a cultura mariñeira e a historia da industria conserveira catalá no Morrazo. A seguir e tras unha pausa e visita a un pequeno estaleiro de carpintería de ribeira foron a Cabo Home, onde a chuvia fixo unha tregua para pisar o punto máis occidental da península morracense e gozar das impresionantes vistas que ofrece este punto. Esta tregua foi breve pois a visita a Cangas fixo que a vella fábrica dos Massó fose escenario dun “Legado do Tibo” colectivo, así como a visita á vila mariñeira. O desafío que os de Ouzande lle fixeron ao tempo provocou que contra as 2 do mediodía parase a chuvia e se abrisen os ceos, deixando unha tarde solleira. O xantar fíxose no pavillón deportivo do colexio de Darbo (parroquia de Cangas) onde houbo lugar para compartir manxares e relaxadas conversas e mesmo para o xogo dos máis pequenos. A tarde comezou en Monte Carrasco, gozando das vistas sobre a Ría de Vigo baixo un merecido sol de primavera. A continuación a excursión dirixiuse cara a Cabo Udra. Con unha importante dose de atrevemento e aventura, conseguiron chegar á Aula da Natureza desta impresionante paraxe natural. Logo da visita houbo tempo para pasear e descubrir tanto a paisaxe como o entorno natural e etnográfico do cabo, chamando a atención dos visitantes as curiosas formas xeolóxicas así como os chouzos de Chan de Esqueiros, lugares construídos contra as pedras naturais e destinados a albergar os veciños cando ían co gando a esta zona. O regreso fíxose con moi bo sabor de boca e comezando a contar os días que faltan para a excursión 2015, a que será a número 14 das organizadas ata o momento pola Fervenza de Ouzande.

Foto de grupo na "caracola" de Cabo Home.

O xantar realizouse no Pavillón do colexio de Darbo.

No Monte Carrasco, gozando das vistas panorámicas sobre a Ría de Vigo.

Foto de grupo no Monte Carrasco.

Visita á Aula da Natureza de Cabo Udra.

Chouzos de Chan de Esqueiros.