As "mulleres valentes" de Rosa de Cabanas expostas na Casa das Letras da Estrada ata o 18 de marzo:::

A Casa das Letras da Estrada acolleu o pasado venres 4 de marzo a inauguración da Exposición “Mulleres Valentes” creada pola ouzandesa Rosa Herraiz, máis coñecida como Rosa de Cabanas. Trátase dunha mostra de 52 retratos femininos que recollen a imaxe de mulleres que por un motivo ou polo outro se poden calificar de “valentes”, ou o que é o mesmo, a exposición pon rostro a 52 mulleres silenciadas e que aportaron á sociedade desde a ciencia, a cultura, o activismo social e político, o laboral... A autora non estivo soa, senón que moi acompañada polo numeroso público que se achegou ao antigo colexio “José Antonio”, hoxe Casa das Letras.

O acto estivo presentado por Lueiro, quen deu paso á autora quen agradeceu a colaboración das distintas persoas que axudaron a que esta exhibición vise a luz, como Casal de Creación na enmarcación, ou aos colaboradores na montaxe, así como ás persoas que mediante as redes sociais fixeron as súas suxestións e animaron a Rosa no seu traballo. A continuación a especialista en historia da arte, Carmela Sánchez Aríns, expuxo unha visión da mostra desde unha perspectiva técnica e entrevistou á creadora, dando máis información de todo o proceso. Finalmente o Concelleiro de Cultura agradeceu á creadora por esta contribución á actividade cultural local; está inserida dentro da programación de celebración do 75 aniversario do Teatro Principal da Estrada.

A mostra xurdiu coma un reto persoal no que Rosa pretendía visibilizar rostros de mulleres importantes na historia local, galega e internacional ao tempo que afondaba en novas técnicas creativas, todas elas co fío condutor do retrato. Para que fose reto de verdade propúxose sacar unha imaxe nova cada semana, de aí que haxa 52 retratos. A enmarcación de alta calidade contribúe a darlle aínda máis valor ao traballo final.

O traballo compleméntase cunha mesa de creación onde se poden ver os bosquexos dalgunhas das obras e con visitas dos centros escolares da contorna, así cun material didáctico sobre o empoderamento da muller para que o alumnado poida traballar nas aulas e aprender máis destas figuras.

A colección das 52 “mulleres valentes” pode ser visitada na Casa das Letras desde agora e até o 18 de marzo, en horario de 9.00 a 14.30 e de 16.00 a 21.30 horas de luns a venres e mailos sábados de 10.00 a 13.00. Unha boa maneira de celebrar o día internacional da muller traballadora que se estende a boa parte do mes.

 

 

 

A Escola de Música Tradicional de Ouzande celebra o fin de curso cunha mexilloada:::

A Escola de Música Tradicional da Fervenza de Ouzande celebrou onte o peche do curso 2018/2019 cunha gran festa a base da demostración do bo facer aprendido no curso e co bo sabor do mar da Arousa con mexillóns cocidos fresquiños que os propios socios tiveron a ocasión de colaborar a elaborar. As actuacións comezaron co, grupo de pandeireteiras e cos gaiteiros e percusionistas, pero polo palco pasaron todas as disciplinas; baile, acordeón, canto... ata ben entrada a noitiña. 

As clases de música tradicional celébranse todos os sábados e están abertas a todo o mundo, non teñen a intención de crear grupos de música, senó naprender e pasalo ben coa música. Iso si, co tempo xa saíron destas clases grupos como Recanto ou Retrouso, quen este verán participará no Festival Intercléltico de Lorient con Invernía. Agora comeza un merecido descanso, pero nun par de meses volverán as aulas e a música ao Local Parroquial de Ouzande, as inscricións están abertas.

Ouzande descubre os segredos das comarcas de Mondoñedo e Meira:::

Foi o pasado domingo 9 de xuño cando unha nutrida representación veciñal de Ouzande emprendeu viaxe rumbo ao norte de Lugo para coñecer varias das xoias que atesouran estas terras. Pola mañá foi San Martiño de Mondoñedo, a primitiva sé episcopal que a día de hoxe ofrece tanto esculturas como pinturas murais de grande valor patrimonial, a visita foi guiada e isto axudou moito a comprender mellor a sé catedralícia máis antiga do sur de Europa. A seguir, tralos pasos de Álvaro Cunqueiro, fíxose unha visita ao núcleo urbano da cidade de Mondoñedo, centrada na Casa- Museo do ilustre autor mindoniense. O xantar foi en Meira, no Cabanón que o Concello de Meira tivo a ben dispoñer para poder facer unha comida convivencia entre a veciñanza. Pola tarde, a guía de Meira, Joani, encandilou aos ouzandeses cos misterios e curiosidades da antiga igrexa monacal de Meira e axudou a entender a importancia e arquitectura daquel mosteiro, hoxe reconvertido en igrexa parroquial, casa parroquial e Casa do Concello. A vida monacal deu paso a un momento máxico como foi a visita ao nacemento do Río Miño, en Irimia, unha morrena glacial cargada de lendas e historias que os ouzandeses foron coñecendo ao tempo que descubriron o espectacular Pedregal de Irimia primeiro e a lagoa de Fonmiñá despois. O regreso á casa foi desde este punto do Concello da Pastoriza. A pesar das horas en autobús que supuña esta viaxe, resultou moi satisfactoria e deixou moi bo sabor de boca.

Joani, guía de Meira explicando os segredos do Mosteiro.

Descubrindo a casa de Álvaro Cunqueiro.

xantando no Cabanón.

Obra monumental na porta de Santa María de Meira, ferraxe datada en época medieval.

Santa María de Meira.

Pedregal de Irimia.

Ouzande celebra o día das letras cunha nova ruta de sendeirismo:::

Amantes da lingua...e da natureza. Un grupo de 20 persoas respondeu un ano máis ao convite da Fervenza de Ouzande para participar nun roteiro no Día das Letras, xuntáronse ás 9.30h na igrexa de Ouzande e percorreron 12km dos montes de Ouzande e A Somoza para chegar ao Castrorramiro descubrindo patrimonio e natureza, sorpendeu a aldea de Castrorramiro coa súa eira de hórreos pois algúns sendeiristas non a coñecían. Ao regreso houbo libros de agasallo para marchar para a casa cunha boa lectura en lingua galega e así celebrar o orgullo de manter unha lingua viva, de noso.

Arranca o curso escolar de música tradicional en Ouzande:::

Co outono a parroquia de Ouzande énchese de cultura, co decrecer dos días comezan as clases de danza e músicas tradicionais que se celebran no local social do Campo da Festa. As disciplinas que se ofrecen son  acordeón, gaita, percusión, pandeireta, baile e canto tradicional. E non é novidade, pois xa se levan dando clases ininterrumpidamente desde o ano 2002. O "primeiro día de escola" vai ser este mesmo sábado 29 de outubro e sempre serán os sábados en distintos horarios. Están abertas tanto á veciñanza coma a calquera persoa desexosa de aprender a facer soar algún dos instrumentos propostos ou de iniciarse cos puntos e picados do baile tradicional. Para anotarse chega con inscribirse vía telemática a través do correo da organización, A Fervenza de Ouzande (carreirosouzande@gmail.com), tamén se pode facer na páxina do facebook https://www.facebook.com/afervenza.deouzande ou no blog www.carreiros.blogspot.com. Tamén se poden inscribir asistindo no horario que se indica a partir do próximo sábado 29 de setembro.

Falando sempre dos sábados, as disciplinas máis madrugadoras son gaita, percusión e acordeón que teñen os seguintes horarios ACORDEÓN 10:30 a 11:30 Profesor: Marcos Varela. GAITA (Iniciación) 11:30 a 12:30 Profesor: Marcos Varela. GAITA (Perfeccionamento) 12:30 a 13:45 Profesor: Marcos Varela. TAMBORIL (Iniciación) 10:30 a 11:30 Profesor: Xosé Martíns, Fofi TAMBORIL (Perfeccionamento) 11:30 a 12:30 Profesor: Xosé Martíns, Fofi 

Xa en horario de tarde temos PANDEIRETA (Iniciación) 17:30 a 19:00 Profesora: Silvia Martínez PANDEIRETA (Perfeccionamento) 18:30 a 20:00 Profesora: Silvia Martínez BAILE 20:30 a 22:00 Profesora: Silvia Martínez CANTO 22:00 a 23:00 Profesor: Marcos Varela.

Ouzande prepara a noite máxica do Lumeiro:::

Será este sábado, cadrando coa véspera de San Xoan e no Campo da Festa de Ouzande. A benvida á estación do sol, do verán será máxica segundo apuntan desde a organización. A Fervenza de Ouzande prevé recoller xa pola tarde as herbas purificadoras da auga e chegada a noitiña converter a morea de restos vexetais que xa teñen disposta no Campo da Festa nun monumental lumeiro. Para completar a festa haberá carro con bebida e comida, polo que se pode ir cear ao lugar. É tradición que cadaquén ase o seu propio chourizo nas brasas da fogueira. 

O momento máis esperado é contra a anoitecida cando unha máxica procesión musical e de persoas vestidas con roupas escuras e cirios nas mans aparece no recindo para levar ao seu HOME DO SACO cara a fogueira. Previamente os asistentes escriben aquilo que desexan queimar e métenllo no saco para desfacerse do peso no desexo. Finalmente as gaitas e as danzas rodean o lumeiro ata se faga pequeniño para poder ser saltado segundo marca a tradición.

A festa do Lumeiro é unha cita histórica de Ouzande, que xunta á veciñanza darredor da tradición e da música para darlle a benvida ao tempo das flores e dos cultivos.

Albas e Epílogos, así foi a súa presentación en Ouzande:::

Albas e Epílogos de Manuel Pereira Valcárcel xa está nas librarías e o pasado venres 4 de maio tamén chegou ao Local Social de Ouzande. E non o fixo só, senón que estivo acompañado do seu autor, o ouzandés Manuel Pereira e a poeta e activista cultural Neves Soutelo, quen a xeito de diálogo foi provocando que o autor desvelase os segredos máis variados do poemario, dende as imaxes suxestionadas pola luz que traspasa as xanelas ata as vivencias persoais que provocaron o nacemento de tan fermosos versos. O vindeiro xoves, día das Letras o poemario chegará á cidade de Zaragoza, un lugar moi ligado tanto ao autor coma ao libro, pois Manuel foi vivir con tan só 10 anos a esta cidade, onde creou intensos lazos culturais como coa ilustradora do poemario, Ana Cristina Lapiedra Argachal. Manuel tamén presentou un proxecto cultural no que participa en Madrid arredor do grupo Bilbao que mantén intensas conversas literarias en torno ás letras galegas en distintos cafés da capital e que editan a revista OLGA da cal falou o pasado venres no local social de Ouzande.

ALBAS e EPÍLOGOS, mañá no Local Social de Ouzande:::

Dentro do programa de actividades de primavera da Fervenza de Ouzande, mañá no Local Social celebrarase a presentación dun novo libro do escritor ouzandés afincado en Madrid, Manuel Pereira Valcárcel. Trátase dunha nova proposta poética baixo o título Albas e epílogos. Será ás 20:30 horas. Ademais do autor, que falará da súa obra e recitará algúns dos seus poemas, a escritora estradense Nieves Soutelo fará a presentación do libro.

Ouzande dálle a benvida á primavera cun obradoiro sobre as propiedades das plantas:::

Foi o pasado 21 de abril no Local Social de Ouzande e promovido pola Asociación Cultural A Fervenza de Ouzande. A ponente, Montse Fernández, da tenda BIO Casa Xorxeira, foi a encargada de guiar ao nutrido número de participantes, máis de 40 polas propiedades dalgunhas herbas silvestres que son fáciles de encontrar. A clase foi maxistral e demostrativa, levando alcol, aceites e auga para ir traballando coas plantas e así poder producir distintos produtos tanto aromáticos, como untos farmacéuticos ou terapéuticos. Os asistentes recibiron de agasallo unha mostra dos produtos e información para amplicar e experimentar posteriormente.

Esta actividade enmárcase dentro do programa cultural da primavera da asociación e que ten continuidade o vindeiro domingo 6 de maio cunha andaina na que se aproveitará para recoller algunhas destas herbas. Outras actividades de primavera son xa esta semana coa presentación dun libro o venres de Manuel Pereira ou a Ruta das Letras do vindeiro 17 de maio. Tamén celebrarán proximamente a excursión anual entre outros eventos.

Ouzande prepárase para a chegada das velutinas:::

AC A Fervenza de Ouzande organiza o próximo venres 2 de marzo ás 20.30 horas no local social da citada parroquia unha charla informativa centrada nas avespas velutinas. Como a información é a mellor arma de guerra para a defensa contra a grave invasión que asola Galicia destes animais, esta entidade contará cun dos especialistas que máis sabe nestes momentos do tema, Xulio Maside, investigador do CiMUS (Centro de Investigación en Medicina Molecular e Enfermidades Crónicas) da Universidade de Santiago de Compostela. O investigador forma parte do grupo que está a analizar a incidencia da velutina en Galicia dende diversas perspectivas así como para propor medidas para a súa erradicación realizado pola Universidade de Santiago e a Deputación da Coruña. Maside pertence ao grupo de Xenómica de Parásitos do CiMUS e investiga a posibilidade de que parasitos autóctonos galegos podan chegar a afectar ás velutinas. 

outono á ouzandesa:::

O pasado sábado, a parroquia de Ouzande celebrou as súas festas de outono. A cita comezou ao serán, co asado das castañas e chourizos. O ambiente foise animando á beira da barra do carro. Socios da Fervenza de Ouzande foron aportando os seus dóces feitos con produtos de tempada. Finalmente a música que durou ata altas horas da madrugada e que xuntou no Campo da Festa ás Carabuñeiras de Santo André de Vea, Retrouso e Recanto. 

Gran festa do outono en Ouzande, este sábado día 4:::

A Asociación Cultural A Fervenza de Ouzande vén de facer pública a convocatoria a unha nova actividade do programa cultural do outono, trátase dunha festa que terá lugar o próximo sábado 4 de novembro ás 20:30 da noite no Campo da Festa de Ouzande. Ademais do servizo de bar agasallarán aos asistentes con castañas e viño. Tamén socios e socias da entidade convidarán a dóces de outono elaborados artesanalmente coas súas propias mans. Para completar a área gastronómica ofrecen a posibilidade de mercar chourizos que os asistentes poderán asar persoalmente. A parte musical estará cuberta por tres formacións; As pandereiteiras "Carabuñeiras" de Santo André de Vea, o grupo de canto tradicional de Ouzande "Recanto" e a formación tradicional, tamén ouzandesa, "Retrouso".

foto de arquivo 2016

cartel da actividade                          

video de arquivo, festa de outono en 2012

Baixo o sol do outono:::

Unhas  corenta persoas veñen de participar o pasado domingo dunha solleira ruta do outono na parroquia de Ouzande. Os visitantes, convocados pola Asociación Cultural A Fervenza de Ouzande, déronse cita ás 10 da mañá diante da igrexa románica para visitar algúns dos puntos máis turísticos de Ouzande, A Somoza e Ferreiros, xa en Arcos de Furcos no veciño municipio de Cuntis. Entre outros, visitaron os exteriores da igrexa románica, os lugares de Alemparte e O Formigueiro para adentrarse nos montes de Ouzande  e maila Somoza ou a aldea de Ferreiros. No regreso pasaron polo entorno da Fervenza para coñecer de primeira man o Pozo da Fervenza así como os muíños coas súas canles centenarias ou o rico entorno natural poboado de acivros e carballos. Ás 13.30h os camiñantes regresaban ao centro da parroquia coa satisfación de teren gozado dunha intensa mañá de outono pola parroquia ouzandesa.

As actividades culturais continuarán o vindeiro sábado cunha festa de outono no entorno do Campo da Festa de Ouzande. Contarán con diversas formacións musicais, así como con produtos de tempada.

OUZANDE VOLVE ÁS RUTAS DE OUTONO:::

Co nome de Ruta dos Montes da Somoza e Ferreiros, a Fervenza de Ouzande volve a celebrar as súas rutas de outono. Será este domingo 29 de outubro polos camiños dos montes de Ouzande, A Somoza e Ferreiros. Aberto a todo o público que desexe coñecer a contorna da parroquia e totalmente gratuíta, trátase dunha actividade que ocupará toda a mañá, desde as 10:00h que comezará diante da igrexa de Ouzande e coa previsión de estar de volta ás 13:30h no mesmo sitio. Son 11 km de percorrido e de dificultade baixa. 

fotos de arquivo de rutas anteriores no outono