11 de agosto de 2011

MÚSICA DE OUZANDE NO INICIO DAS FESTAS PATRONAIS:::


Retrouso, o Regato de Matamulleres e Os Berros do Castro son as tres formacións musicais que darán o pistoletazo de saída das festas patronais de Ouzande. A boa música animará a festa ao tempo que os asistentes degustan polbo e churrasco no carro que arestora xa está instalado no Campo da Festa.
A formación ouzandesa RETROUSO partirá logo desta actuación cara a terras francesas para repetir a experiencia que tiveron na Bretaña. O Regato de Matamulleres repite actuación en Ouzande e afirman sentirse xa da parroquia, recordamos que son músicos procedentes da veciña Callobre. O grupo menos coñecido é OS BERROS DO CASTRO que tamén ten relación con Ouzande pero non polo noso Castro pois é unha formación ferrolá na que actúa un ouzandés; Loureiro. Será a primeira vez que actúen na parroquia polo que son menos coñecidos. O seu repertorio confórmano pezas de música tradicional galega recuperadas de cancioneiros, como o "Cantos e bailes da Galiza" de J. Inzenga ou o "Cancionero Musical de Galicia" de Casto Sampedro; traballos de campo; ou pezas procedentes do repertorio de grupos tradicionais de renome en Galicia, entre outros, Raparigos, Os Cruceiros, Os Rosales, ou os Gaiteiros de Soutelo de Montes. Esta formación está integrada por José E. Rodríguez ao acordeón, Ramón Dopico na percusión, Marcos Gómez coa Percusión, Bruno Casal tocando a gaita, o ouzandés Xosé L. Loureiro co clarinete e Antón Varela no vento das gaitas e frauta.

3 de agosto de 2011

A vindeira fin de semana Ouzande celebra as festas patronais:::


Este é o cartel. A Xunta Parroquial xa ten ultimado o programa de festexos patronais. Comezarán na tardiña do venres cunha romaría cos grupos Berros do Castro, Regato de Matamulleres e Retrouso. Nesa primeira noite haberá polbeiro. O sábado actuarán Antaruxa para animar as festas ao mediodía canda a orquestra Nebraska que tocará para a "sesión vermouth". A verbena terá as formacións Satélite e Nebraska como animadoras. O domingo pasarrúas, concerto e procesión coa charanga Os Atrevidos. Pola tarde animación co mago Jose Rivera ás sete e media no Campo da festa.

2 de agosto de 2011

Presentan a X RUTA BTT RAPA DAS BESTAS:::


O pasado luns 1 de Agosto foi presentada oficialmente a X Ruta BTT Rapa das Bestas, que se celebrará o 11 de Setembro no concello estradense. A principal novidade desta edición é que ademais da clásica ruta cicloturista, será a celebración do CAMPIONATO DE GALICIA DE BTT MARATÓN, de onde sairá a selección galega que acudirá ó campeontao de España que terá lugar o 1 de Outubro en Huelva.
Esta ruta terá saída na vila estradense pero pasará por distintos puntos da parroquia ouzandesa tanto no momento de saída como no regreso, a organización baralla ubicar en Ouzande a meta para o Campionato de Galicia de BTT Maratón. Achégase un mapa cos lugares que percorrerá a marcha e un enlace á web de bikestrada, entidade orgnaizadora do evento.
A ruta coincidirá coas festas do Socorro e pasará pola zona do Castro (Avda de Vigo, camiño do Castro, camiño do Picoto, O Curro, Matadoiro Comarcal, pista de Zoo...)

26 de xuño de 2011

Peche das actividades culturais de xuño en OUZANDE:::

Coa proxección do documental "O ESPÍRITO DAS TRINCADEIRAS" A Fervenza de Ouzande deu por finalizada a programación cultural para xuño. A pesar da vaga de calor que azoutou a parroquia nesta fin de semana, foi bastante a xente que acudiu ás dúas proxeccións deste documental que narra como os veciños de Goián (Tomiño) se enfrentaron á expropiación forzosa dun terreo de baldío chamado As Trincadeiras para a construción da actual autovía que une Portugal e Vigo. A unión fixo a forza e este espazo foi protexido polos veciños polo valor sentimental e ecolóxico posto que se ubica no esteiro do río Miño e alberga numerosas especies sobre todo de paxaros.
Por outra banda tamén se pechou un ciclo de festas, as últimas a dos cursos de música e baile o pasado 18. Tamén o Lumeiro congregou bastante público ao redor dunha fogueira presidida polo Home do Saco para queimalo de forma máxica e espectacular.


23 de xuño de 2011

Tarde de cinema en Ouzande:::

Hoxe (25-VI-2011)
Será co "espírito das trincadeiras" de Senen Outeiro. Haberá dúas proxeccións, a primeira ás 19.30h, e a segunda ás 21.30h
O filme, escrito e dirixido por Seném Outeiro, narra a loita que no ano 1990 o povo de Goián desenvolveu na defensa do monte comunal das Trincadeiras que pretendía ser expropiado pola empresa que construía a autopista Vigo-Porriño. O pobo de Goián opúxose e despois conquerir con moito esforzo a sua victoria celebrou anualmente unha festa de exaltación das Trincadeiras coma movimiento veciñal e coma posta en valor dos espazos comunais.

“A cinta é unha homaxe á vontade coleitiva, unha historia cargada de emotividade e reflexión sobre a importancia da memoria histórica coma alicerce do ser social”
Senem Outeiro

Chega o HOME DO SACO a Ouzande:::


Hao facer coma todos os anos, ameazante e desafiante, pero a festa calmará os ánimos. Esta noite a parroquia réndese ao culto máxico do lumeiro; auga, flores, chourizos e sobre todo... o Home do Saco. Contra a medianoite unha procesión con el á cabeza dirixiráse cara a fogueira para queimalo xunco co seu saco cheo daquelas cousas que previamente escribiron os festeiros. E que arda!

11 de xuño de 2011

A Fervenza de Ouzande inicia as actividades do seu X aniversario:::

A pasada noite NARF e THE HOMENS inauguraron as celebracións da FERVENZA DE OUZANDE para este ano 2011 en que se cumpren dez anos de andadura. Tras un concerto que soubo a pouco pois a xente quedou con ganas de máis e de visionar nunha pantalla xigante as fotos do 10X10 é dicir, dez fotos por dez anos a Fervenza deu por inaugradas as actividades para conmemorar a primeira década de vida da asociación. Á venda están as camisolas conmemorativas cun deseño de Rosa Herraiz que xoga cos dedos das dúas mans para indicar cantos anos cumpre a asociación neste exercicio. Todo isto estivo acompañado por boa comida e bebida. As actividades continúan durante todo o ano con sorpresas como a deste concerta de tanto nivel musical. En breve será o lumeiro e maila presentación dun documental, a mellor maneira de celebrar esta década de vida é continuar co labor de dinamización sociocultural da parroquia; Parabéns A-F-de-OU!!!