O rural está de moda:::

Xa están á venda na taberna de Ouzande as camisolas deseñadas por Rosa de Cabanas  e coas que  A Fervenza de Ouzande nos anima a vestir á moda. Trátase dun motivo tomado do Entroido deste ano, cando a parroquia se disfrazou de "Ouzande Faxion Week" Unha semana da moda que non podía quedar nunha mera celebración de Entroido, motivo polo que a asociación cultural ouzandesa tomou como motivo das súas camisolas a bata de cruzar e a pañoleta características daquela festa. As camisolas son azul mariño e teñen un estampado que reproduce o que ben podería considerarse unha revisitación do traxe de cotío; botas de goma, bata de cruzar, guantes de fregar e pañoleta. A lenda está en amarelo e branco, di "rural faxion, Ouzande 2014". A orixinalidade deste deseño fai que as unidades en venda, que son limitadas, voen. Desde o sábado pasado xa se poden mercar en "Casa Porto", a Taberna de Ouzande ,e xa está espertando moito interese non só na parroquia senón que comezaron a chegar peticións. 

Sardiñas e música tradicional para celebrar o Santo Antonio:::

cartel da festa

O venres 13 de xuño celébrase en Ouzande a festa de Santo Antonio. As actividades festivas comezan ás 21h cos actos relixiosos en honra do patrón dos animais e dos namoros. Seguidamente, contra as 22h, no Campo da Festa dará inicio unha gran sardiñada gratuíta. Os manxares van estar acompañados pola música de tres formacións musicais; O Regato de Matamulleres, Retrouso e Recanto. 

O Regato de Matamulleres toma nome do lugar homónimo de Callobre onde naceron aló por 1995. Segundo eles mesmos afirman, fan música limpa e "á súa maneira" procurando ser eles mesmos os primeiros en se divertir no escenario para transmitilo ao público. O repertorio recolle pezas tradicionais e versións de grupos consolidados como Quempallou, Susana Seivane, Os Carunchos ou Treixadura. Algunhas pezas son de produción propia.
Retrouso é o grupo nacido das clases de gaita e música tradicional de Ouzande, xa teñen no mercado un disco co mesmo nome da parroquia "Ou". Teñen unha axenda moi apretada, sendo os animadores de numerosas festas e romarías tanto na comarca como por Galicia adiante e mesmo no estranxeito. Retrouso toca música tradicional moi mimada e moi festeira coa que consiguen que o público baile e se divirta a ritmo de xotas, muiñeiras, pasodobles, valses ou rumbas.
Recanto é o grupo de canto tradicional nacido das clases de canto da Fervenza de Ouzande. Naceron ao pé do Muíño do Rubio durante unha "noite no muíño" e pola necesidade de ter un repertorio común para cantar xuntos. Ao pouco xa estaban recibindo clases da man de Marcos Varela e en poucos meses xa se deixaron escoitar no certame de Cantos de Taberna de Pontevedra. Nos últimos meses participaron en certames como os cantos de taberna da Estrada ou Arzúa.
A festa de Santo Antonio é coñecida popularmente en Ouzande como "A Sardiñada", está organizada pola Comisión de Festas (Xunta Parroquial) e constitúe a primeira festa "de verán" da aldea.

Imaxe de Arquivo. O Regato de Matamulleres na Sardiñada 
de Santo Antonio de 2013

Imaxe de arquivo. Sardiñada de 2012. 

Retrouso e Recanto nunha actuación da "Fervenza de Músicas de Ouzande.

Ruta turística polo Morrazo desafiando ao mal tempo:::

Chegada a Donón, en Cangas.

Contra vento e marea. Así foi a excursión anual da Fervenza de Ouzande que onte, domingo 8 de xuño, levou ao Morrazo a uns 63 intrépidos excursionistas. Cando eran as 9 da mañá arrancaba cheo ata a bandeira un autobús baixo fortes chuvascos. A entrada en Bueu fixérona con sintonía propia; “Se vou a Bueu” de Andrés do Barro. A primeira visita foi ao Museo Massó onde descubriron a cultura mariñeira e a historia da industria conserveira catalá no Morrazo. A seguir e tras unha pausa e visita a un pequeno estaleiro de carpintería de ribeira foron a Cabo Home, onde a chuvia fixo unha tregua para pisar o punto máis occidental da península morracense e gozar das impresionantes vistas que ofrece este punto. Esta tregua foi breve pois a visita a Cangas fixo que a vella fábrica dos Massó fose escenario dun “Legado do Tibo” colectivo, así como a visita á vila mariñeira. O desafío que os de Ouzande lle fixeron ao tempo provocou que contra as 2 do mediodía parase a chuvia e se abrisen os ceos, deixando unha tarde solleira. O xantar fíxose no pavillón deportivo do colexio de Darbo (parroquia de Cangas) onde houbo lugar para compartir manxares e relaxadas conversas e mesmo para o xogo dos máis pequenos. A tarde comezou en Monte Carrasco, gozando das vistas sobre a Ría de Vigo baixo un merecido sol de primavera. A continuación a excursión dirixiuse cara a Cabo Udra. Con unha importante dose de atrevemento e aventura, conseguiron chegar á Aula da Natureza desta impresionante paraxe natural. Logo da visita houbo tempo para pasear e descubrir tanto a paisaxe como o entorno natural e etnográfico do cabo, chamando a atención dos visitantes as curiosas formas xeolóxicas así como os chouzos de Chan de Esqueiros, lugares construídos contra as pedras naturais e destinados a albergar os veciños cando ían co gando a esta zona. O regreso fíxose con moi bo sabor de boca e comezando a contar os días que faltan para a excursión 2015, a que será a número 14 das organizadas ata o momento pola Fervenza de Ouzande.

Foto de grupo na "caracola" de Cabo Home.

O xantar realizouse no Pavillón do colexio de Darbo.

No Monte Carrasco, gozando das vistas panorámicas sobre a Ría de Vigo.

Foto de grupo no Monte Carrasco.

Visita á Aula da Natureza de Cabo Udra.

Chouzos de Chan de Esqueiros.

Un globo aerostático sobre a Praza da Farola, motivo do cartel das festas de San Paio:::

José Manuel Marque (Fundación Cultural),
 Nemesio Rey (Concelleiro de Festas) e Rosa Herraiz(autora do cartel)

Esta semana presentábase en rolda de prensa ante os medios a que vai ser a imaxe das festas patronais da vila da Estrada. A Fundación Cultural e mailo Concello da Estrada escolleron á deseñadora ouzandesa Rosa Herraiz para darlle imaxe aos festexos por terceiro ano cosecutivo. O cartel céntrase na Praza de Galicia, máis coñecida como Praza da Farola, desde onde sae un globo aerostático rodeado de bandeirolas. As datas festivas son desde o xoves 26 e esténdense ata o domingo 29,

aínda que se presentaron algunhas actividades que arrancarán o sábado anterior, o día 21. A Comisión explicou que aínda non está pechada a programación pero adiantaron algunhas das actividades que xa están contratadas, destacando un concerto de Treixadura ou o grupo de rumba catalá “La Pegatina”. O orzamento aproximase aos 100.000 euros. Este é un esbozo da programación:
SÁBADO 21: XXI Subida automobilística á Estrada.
DOMINGO 22: Remate da Subida Automobilística e exhibición da Escola de Música Sondodance.
LUNS 23: Festa do Lumeiro na Avenida de Pontevedra.
MARTES 24: Exhibición deportiva de Absolute.
MÉRCORES 25: “Bailables” da Banda de Música Municipal da Estrada.
XOVES 26: actos relixiosos, concerto de Treixadura, orquestra Assia
VENRES 27: actos relixiosos, Carreira Nocturna Estradense, festa latina co concerto de La Pegatina e as actuacións de Dj Manu López e Dj Will
SÁBADO 28: Maratón solidaria de zumba, concerto da Big Band Chattanooga, orquestra Os satélites.
DOMINGO 29: Concentración de vehículos clásicos, festa da bicicleta, concerto dos Lóstregos, tirada dos fogos artificiais e concerto de Los Chiquis.

Este domingo Ouzande descubrirá os encantos do Morrazo:::

Espectaculares vistas sobre as Illas Cíes
 desde Cabo Home

A comarca do Morrazo será este domingo o escenario da excursión anual que organiza a Fervenza de Ouzande. A parroquia estradense rendirase aos encantos da bisbarra do Morrazo nunha das actividades máis agardadas do ano. Tal é así que a inscrición abriuse o pasado sábado e nunhas horas xa estaban cubertas as 55 prazas ofertadas. Neste momento hai aberta unha listaxe de espera por se houbese algunha baixa. A viaxe arrancará do centro de Ouzande o próximo domingo 8 de xuño ás 09:00h, durante a mañá está previsto visitar as vilas de Bueu e Cangas, así coma o Museo Massó, o estaleiro de Puzo ou Cabo Home. O xantar será nunha área recreativa de Cangas. Pola tarde os visitantes descubrirán Cabo Udra, en Bueu.

Estaleiro de Puzo, en Bueu

Antigas oficinas de Massó, en Cangas.

Instalacións da fábrica de conservas de Massó en Cangas.

Cabo Udra é un enclave patrimonial moi singular.

As formacións rochosas en Cabo Udra.

Xornada de turismo polo románico da Estrada:::

sendeiristas baixo o "Agnus Dei" ouzandés

As parroquias de Ouzande, A Somoza e Tabeirós foron escenario dunha ruta polo románico estradense organizada pola A.C. A Fervenza de Ouzande. Trátase do peche do programa de rutas "Imos Andar 2014". A cita comezou ás 10 da mañá tras a ábsida románica do templo ouzandés, onde uns corenta sendeiristas aproveitaron para sacar unha foto de grupo. O percorrido estendeuse cara a distintos lugares de interese patrimonial da contorna, como a igrexa de Santiago de Tabeirós ou a aldea de Castrorramiro. A comarca sacou a relocir os seus encantos turísticos baixo o sol da primavera, facendo as delicias dos visitantes. Os Muíños da Freixa, na Somoza foron a última das paradas para repoñer forzas completar os 12km da camiñata. A organización anunciou que as próximas rutas serán no outono (12 de outubro) e no inverno (día de Nadal) e que o programa "Imos Andar" se ha retomar na primavera do ano próximo.

Polo momento as próximas activades da Fervenza de Ouzande serán a Excursión ao Morrazo este domingo día 8 de xuño, a actuación de Retrouso e Recanto nas festas do Santo Antonio (venres 13), a festa de fin de curso das clases de música e baile tradicional (sábado 21) e a festa do Lumeiro (luns 23).

A ruta foi de 12 km de dificultade baixa

foto de grupo ao pé da igrexa románica de Santiago de Tabeirós

Atravesando a Consolación, en Tabeirós

A aldea de Castrorramior, na Somoza sorprendeu a moitos turistas.

Baixada aos Muíños da Freixa, na Somoza.

A ruta foi circular, camiño de regreso cara á igrexa de Ouzande.

Sendeirismo polo románico da Estrada:::

Cartel da actividade.

Este domingo día 1 haberá unha oportunidade única para coñecer o románico da Estrada, trátase da última ruta do programa Imos Andar da Fervenza de Ouzande desta primavera. 

A camiñata é aberta a todo o público e gratuíta. Arrancará ás 10 da mañá da igrexa de Ouzande para chegar contra as 13:30, ten unha lonxitude duns 13km e é de dificultade baixa. Logo de camiñar polos carreiros de Ouzande e subir ao Monte Pedroso, desta volta a proposta é para coñecer as parroquias de Ouzande, A Somoza e Tabeirós. O máis destacado é o rico patrimonio destas tres localidades, en especial as igrexas románicas de Ouzande e Tabeirós ou a aldea de Castrorramiro (A Somoza).

Imaxe da ruta a Tabeirós realizada en 2013. Arquivo