Completa noite folk de Entroido en Callobre:::

O temporal quixo dar unha tregua para que Callobre bailase ao son de xotas e muiñeiras un mes máis coas "Noites de Raíz". Foi na noite do pasado sábado 13 de febreiro na vella escola da parroquia. Como de costume non faltou a gastronomía, desta volta con sabou a grelos e cacheira, pero co aliciente de cadrar no sábado seguinte ao sábado de Entroido polo que non faltaron as "mascaritas". No apartado musical citaron a Madia Leva, a agrupación de pandereteiras de Meis e mailos "gaiteiriños" de Santiago de Compostela, e tamén da capital de Galicia, Boqueixón e A Estrada o grupo NAI que fixo as delicias dos asistentes. As sorpresas non pararon en toda a noite e mesmo fixeron a súa actuación os Cegos de Callobre, quen non deixaron títere con cabeza. 

As noites "folk" de Callobre volven o vindeiro mes de marzo con máis música e animación.

Ouzande programa un entroido "feminino":::

Baixo o título de "GRAN ANTROIDO DE MOZAS EN OUZANDE" e animando a participar co seguinte anuncio: " Cada un e cada unha ao seu xeito, este ano imos de MOZAS. Moderna, hipi, vella, labrega, chic, festeira..." a parroquia de Ouzande organiza unha festa de entroido para o sábado 6 durante toda a tarde e a noite. O eixo condutor semellase ao xoves de comadres ourensán, no que para participar hai que ser muller, ou polo menos parecelo. Esta orixinal proposta levará á comparsa das "disfrazadas" por camiños e carreiros da parroquia durante a tarde, sairán ás 5 do local social. Xa pola tardiña cea e festa de entroido no Campo da Festa con comida gratis, cegas do entroido, Retrouso, Recanto e un grupo de música tradicional procedente de Touro. En caso de choiva suspenden o percorrido polos lugares da parroquia pero manteñen a festa, pois contarán cunha carpa.

A Fervenza de Ouzande renova a súa directiva:::

Na tarde do pasado domingo, A Fervenza de Ouzande celebrou a súa asembela anual, xuntando unha corentena de socios e socias. Durante a sesion aprobáronse as contas, nas que destacan que a entidade vive sen axudas públicas, sendo as cotas dos socios a súa principal fonte de ingresos, pois rolda os 300 asociados.

Fixeron tamén balance das actividades de 2015, recordando que no presente exercicio celebrarán o 15 aniversario da asociación polo que acordaron programar unha festa a tal efecto. Na parte final da asemblea celebráronse as votacións, quedando aprobada por unanimidade a nova directiva, que está composta polas seguintes persoas: Xabier Camba, quen repite como presidente;  Natalia Carbajal Porto (vicepresidenta), Manuel Rosende Torres (secretario), Rosa María Herraiz Cabanas (tesoureira) e os vocais María Dores Camba Cabanas, María Luz Rodríguez Pazos, Manuel Ángel Bouzón Fernández, Noelia Bouzón Docampo, Manuel Porto Gestoso, Cristina Riveira Porto, Laura Herraiz Cabanas, Carmen Ribadeo Piñeiro, Manuel Uzal Docampo e María Chedas Camba (esta última nova incorporación no lugar de Julio Porto que nesta ocasion abandona a directiva)

Entre os datos que se manexaron nesta xuntanza destacan as estatísticas, poisto que en 2015 celebraron 20 actividades que moveron a máis de mil persoas, conformando un total de 278 actividades desde a súa fundación que moveron a milleiros de persoas, tanto veciños como persoas da comarca e mesmo de Galicia enteira. A Fervenza consolídase así coma unha entidade de referencia na área da Estrada, eixe dinamizador da vida social e cultural non só da parroquia senón da bisbarra. A asemblea rematou, como xa é habitual, cunha chocolatada e uns momentos de intercambio de impresións informais sobre o traballo da entidade.

A xira de "Teimas" chega ao Salnés:::

O vindeiro sábado 16 de xaneiro ás 21h e dentro da programación cultural do Concello da Illa de Arousa, terá lugar a representación de Teimas, a nova obra de Disfunción Continua Teatro, sera no Auditorio Municipal. As entradas estarán á venda na billeteira do auditorio antes da función. Esta será a segunda recalada da compañía estradense na vila insular logo de presentar Eran outros tempos, ou non? con notable afluencia de público. 

Teimas conta a historia dun grupo de pacientes que sofren manías e teimas compulsivas e que deciden acodir á consulta dun afamado médico galego, pero as cousas non sempre son tan fáciles para superar os problemas persoais. Con Teimas ofrécese unha hora de risa asegurada. A obra non está aconsellada para menores de 16 anos por posuír vocabulario inapropiado para esta franxa de idade. Teimas iniciou a súa xira o pasado 19 de setembro en Antas de Ulla e está a ter unha moi boa acollida logo de recorrer distintos puntos de Galicia. A última función realizouse na vila da Estrada onde se encheu o Teatro Principal. Trala función da Arousa, a xira continuará por outras comarcas como Santiago de Compostela ou Pontevedra. Esta é xa a terceira produción de Disfunción Continuta Teatro tras Cóncavo Convexo en 2012 e Eran outros tempos, ou non? en 2013. 

Noites de Raíz volve o 9 de xaneiro:::

Tralas vacacións de Nadal volve "Noites de Raiz", será este sábado 9 de xaneiro ás 22h na escola vella de Callobre e coa animación de "Muxicas da Silveira" e "Tanto nos ten". Con esta activiade cúmprese a programación das noites de raíz que estipulan unha foliada mensual ata o verán.

Un xeito diferente de celebrar o Nadal:::

As festas do Nadal apuran as últimas actividades coas cabalgatas de Reis. As festas natalícias son propicias para os xantares abondosos e os agasallos, pero na Asociación Cultural A Fervenza de Ouzande xa hai seis anos que veñen ofrecendo unha alternativa para a mañá do 25 de decembro que cada vez gaña máis adeptos. Desta volta unhas 20 persoas gozaron dunha mañá privilexiada e silandeira na que coñecer un pouquiño máis o entrono da Estrada ao tempo que facían algo de exercicio físico. Adentráronse nos montes de Ouzande e A Somoza para visitar, entre outros, o lugar de Ferreiros ou a Fervenza de Ouzande. Foron 12km de andaina de Nadal que de seguro han repetir neste recén inaugurado 2016.

Por outra banda, arestora debátese por parte da organziación sobre a viabilidade de celebrar o cabalgata de Reis tendo en conta o prognóstico do tempo. A Estrada celebrou durante estas festas varias actividades de animación de rúa e mesmo se instalou un pequeno parque de atraccións detrás da Casa das Letras.

saída na igrexa románica de Ouzande

Montes de Ouzande e a Somoza

Rego das Rans

camiñando

Muíños de Ouzande

Animación de rúa pola vila da Estrada

Un camión empótrase contra a escola unitaria de Pontevea:::

A escola unitaria de Pontevea (Reis-Teo) foi o escenario dun aparatoso accidente onte ás 11.30h cando un camión de vidro procedente de Santiago e que viaxaba en dirección á Estrada abandonou a vía PO-841 por causas que aínda se descoñecen, empotrándose contra o edifício da esocola unitaria de Pontevea. Afortunadamente non hai que lamentar vítimas persoais posto que o contutor saiu ileso polo seu propio pé e a escola estaba pechada ao cadrar este suceso coas vacacións de Nadal. Iso si, os danos materiais foron cuantiosos, tanto por parte do vehículo coma polas instalacións do centro educativo. Ata o lugar achegouse a Garda Civil de Tráfico e o grupo de Emerxencias de Protección Civil de Teo, que regularon o tráfico para non ter que cortalo agás cando se procedeu a retirar o camión cun guindastre.

OUTRO CAMIÓN ACCIDENTADO EN CALLOBRE

A parroquia de Callobre foi escenario doutro incidente de semellantes caracterísitcas contra as 20h, foi na N-640, houbo que lamentar un ferido leve, o condutro do vehículo que requeriu a presenza dunha ambulancia que o trasladou ao ambulatorio da Estrada.

INCIDENCIAS POLO MAL TEMPO

As incidencias polo mal tempo multiplicáronse nas últimas horas, así unha árbore caiu sobre a estrada entre Berres e Arnois. Unha casa do Pedregal sufriu unha pequena inundación e Emerxencias tivo que acodir á Avenida da Cultura para eliminar unha poza de agua que se formou cos augaceiros das útlimas horas. En Curantes unha cheminea dunha casa ardeu, pero conseguiron apagar o lume antes de que o mal fose maior. Como consecuencia das fortes trombas de auga tamén hai que lamentar o rotura da presa de Sinde, no Río Ulla e cuantiosos casos de alagamentos e saídas do seu cauce de regueiros e ríos na zona.