A Estrada acolle este domingo a centos de escolares no IV Festival de Teatro Escolar organizado polo IES Antón Losada:::

Será este domingo día 24 de abril en distintas localizacións do municipio estradense e xuntará a uns douscentos escolares de secundaria procedentes de localidades tales como Palas de Rei, Touro, Laxe ou Melide. Trátase dunha actividade organizada pola aula de Teatro "Avelaíñas Teatro" e o clube de lectura Retelladores do Galiñeiro e que contan coa colaboración do Teatro Principal e maila Asociación Cultural A Fervenza de Ouzande.

 Esta festa do teatro arrancará ás 11.00 no Teatro Principal da vila coas actuacións do Obradoiro Municipal de Teatro de Palas de Rei, a aula de Teatro do CPI de Touro, a Escola Municipal de Laxe, a aula de Teatro do IES de Melide, Teiroa Teatro, e os actores do IES Antón Losada Diéguez. Acto seguido, os novos actores e actrices desprazarase á zona de Fervenza de Ouzande para realizar un Roteiro teatral, poético e musical polo contorno natural da Fervenza de Ouzande, con saída desde a igrexa parroquial ás 12.45 horas e no que participarán tanto o alumnado do IES Antón Losada coma membros da Fervenza de Ouzande que recibirán aos escolares.

A Casa do Concello da Estrada vítima dun lóstrego:::

As malas condicións metereolóxicas deste domingo 10 de abril veñen de provocar as súas primeiras consecuencias. Un inesperado lóstrego foi caer no pararraios da Casa Consistorial da Estrada provocando numerosos danos materiais. A cúpula do Concello Estradense desprendeu numerosas lousas pola Avenida Benito Vigo e Praza da Constitución, rebentou tamén o reloxio que había nos laterais, queimou a fachada da torre por onde baixaba o pararraios e provocou a caida do falso teito no andar superior do edificio. Protección Civil da Estrada e a Policía Local do municipio acordoaron a zona mentres numerosos curiosos se achegaron tralo susto por este potente raio caído na vila da Estrada. Outros efectos da descarga eléctrica foron os cortes de corrente ou que os semáforos da vila deixaran de funcionar, numerosos fogares acusaron incidencias relacionadas con este suceso como electrodomésticos queimados. A base de Protección Civil e maila estación de servizo da estrada de Santiago tamén foron vítimas das descargas eléctricas. A pesar de que en 2014 outro raio provocara un buraco nun edificio próximo á Casa Consistorial, o pararraios do Consistorio atopábase desconectado tralas obras de arranxo da cuberta do inmoble.

RETROUSO presenta un novo disco no Teatro Principal:::

"Dous" foi o nome escollido por Retrouso, a agrupación musical tradicional de Ouzande para o seu segundo disco, facendo ecoar o identificativo "Ou" que era o título do primeiro. O traballo xa está gravado e editado, de feito contan con medio milleiro de copias que xa teñen a venda e que presentarán no Teatro Principal da Estrada. Durante este acto presentarán todas as pezas deste CD que eles mesmos definiron como fresco, contén pezas moi variables e bailables, moi alegres, respectando a tradición e cunha moi boa imaxe de presentación pois todo o deseño é obra da tamén ouzandesa Rosa de Cabanas. 

A Estrada entoa os "Cantos de Taberna":::

Será polos distintos bares e tabernas da vila da Estrada este sábado. A troula xa comezará pola mañá con Pana Raiada, O Arco de Merza, Bótalle Terra e Os Ke Hai que animarán o centro con música tradicional e cantos. Durante toda a xornada haberá unha feira de artesanía nas rúas da zona dos viños e xa ás 20.30h a festa apoderarase da Estrada pois ata 13 grupos tocarán ao mesmo tempo polos distintos puntos escollidos pola organización. Esta é a terceira edición deste evento que organizan distintos músicos locais.

Disfunción Continua Teatro levará Teimas a Guimarei, Vedra e Combarro nas próximas datas:::

A Asociación Santa Apolonia de Guimarei vén de informar de que este próximo sábado 5 de marzo ás 20h e no Local Social do Outeiro van contar coa presenza de Disfunción Continua Teatro para a representación de "Teimas" a súa última produción. A entrada é gratuíta. Trátase dunha comedia de pouco máis dunha hora na que sete actores estradenses dirixidos por Jouse García suben ao palco para representar a historia da consulta do Doutror Teixieiro, un afamado psicólogo internacional que terá que atender a distintos pacientes con cadensúa teima. Esta obra é para maiores de 16 anos. Así mesmo, a compañia estradense vén de anunciar outras dúas funcións desta mesma obra dentro do festival de teatro de Vedra e Combarro. As citas son no Centro Social da Terceira Idade de Vedra o próximo sábado 12 ás 21.15h e no Centro Cultural de Combarro o 23 de abril ás 20.30h

Manipulador de produtos fitosanitarios en Guimarei:::

A Asociación Santa Apolonia de Guimarei vén de informar de que a partir do sábado 2 de abril se vai celebrar un curso de Aplicador-Manipulador de produtos fitosanitarios. Será de nivel básico, polo que non se requiren coñecementos previos. A formación estenderase durante 25 horas en horario de sábaddos desde o 2 de abril ata o 30 do mesmo mes. Este curso celebrarase polas mañás de 9 a 2 no Local Social de Outeiro e ten un custe de 58.83 euros. Será posible inscribirse ata o próximo 17 de marzo no teléfono 649766064.

O "Entroido das Mozas" desafía ao mal tempo:::

Ouzande prevía un entroido moi animado, coa premisa de se disfrazar de mulleres, veciños e forasteiros foron convidados a unha divertida tarde de Entroido pola parroquia. Pero quen se había presentar era un inteso temporal que ata hoxe non deu tregua. A organización suspendeu os pasarrúas cos que habían de encher de vida entroideira as aldeas da parroquia, e que estaba previstos para a tarde, momento do día no que os intensos refachos de vento se mesturaron con abundantísimas precipitacións. Aínda así mantiveron a festa nocturna no Campo da Festa. Alí contaron coa animación de Retrouso e Recanto, así coma das "Sobreiras do Ulla" unha formación que se presentou coma as "irmás da conexa" ou "cantareiras de Ardebullo". A gastronomía baseouse en produtos típicos do Entroido e churrasco, e a guinda puxérona as "Cegas do Entroido" que, con moito glamour teceron e desteceron  a actualidade da parroquia e do mundo. 

Paralelamente o Concello da Estrada trasladaba a festa infantil da carpa que se instalara na Praza da Constitución para un establecemento hosteleiro da vila ante a perigosidade de celebrala na carpa debido ao mal tempo. Paseniñamente fóronse suspendendo todos os actos de  Entroido na Comarca, tanto os organizados no casco urbano coma o Entroido de Guimarei que pasarán a celebrarse nesta fin de semana, confluíndo cos de Arnois. Couso mantivo a festa pero tivo que prescindir dos atranques dos Xenerais. Tamén se celebrou a cuberto a festa infantil de Guimarei no Local do Outeiro.

Deste xeito o Entroido volverá á Estrada vestido de Coresma, esta fin de semana, se o tempo o permite.