Ouzande ríndese ao encanto dos seus muíños:::

O pasado sábado 1 de agosto, a contorna dos Muíños da Fervenza en Ouzande convertíase no escenario dunha festa máxica organizada pola asociación cultural que dese lugar toma nome, a Fervenza de Ouzande. Xa pola tarde houbo un rebulir de xente para organizar o evento, dotando de iluminación as inmediacións do Muíño do Rubio. Xa polo serán o camiño que dá acceso a este punto desde o lugar de Alemparte encheuse de misterio grazas á animación coa que lle deron a benvida aos festeiros. Santas Compañas ou o mesmo medo personificado deambularon entre carballos e acivros camiño da festa. A seguir tempo da cea e da conversa entre amigos e veciños. Xa entrados na noite a música e o baile resoaron entre as pólas da Fervenza. A tradicional queimada púxolle a guinda á celebración que se demorou ata a madrugada.