OUZANDE VOLVE DE EXCURSIÓN:::

A Fervenza de Ouzande volve organizar as súas carismáticas excursións que estiveran conxeladas durante a pandemia. A inscrición xa está aberta e hai prazas limitadas polo que as persoas interesadas aínda están a tempo de conseguir ocupar unha delas.

As persoas socias gozan dun desconto e só pagan 15€ (menosres de idade 10€) As persoas non socias tamén poden participar pagando un plus de 5€. A inscrición é na taberna de Ouzande á que se pode chamar ao 986 57 02 85 ou enviando un correo electrónico á asociación: carreirosouzande@gmail.com.

A ruta arranca de Ouzande en autobús o domingo 14 de maio ás 9 da mañá e parte cara o recanto máis ao suroeste de Galicia visitando as localidades de Baiona, Oia e maila Guarda.

En Baiona haberá tempo de lecer e visita a esta localidade, considerada a vila mariñeira mellor apreciada polos turistas que visitan Galicia, tralo paseo polo seu casco histórico realizarase unha das rutas máis destacadas da costa galega; o tramo Baiona-Oia fronte o mar aberto.

En Santa María de Oia realizarase unha visita guiada ao seu Mosteiro e darase un paseo pola aldea, cadrando cos peregrinos que realizan a ruta mariñeira.

O xantar será ao pé do Río Tamuxe, no Rosal e a tarde estará dedicada á vila mariñeira da Guarda, cunha visita guiada e tempo libre. Antes de poñer rumbo de volta pasearase polo porto, con posibilidade de acceder ao museo do mar ou subir ao emblemático Monte de Santa Trega.

 

 

Ouzande volve andar:::

Andar e falar é o lema das rutas de Ouzande, son máis de 50 as realizadas até o momento e a pandemia provocou un parón nesta iniciativa da Fervenza de Ouzande. Pero o pasado luns día 1 de maio, Ouzande volveu camiñar. A convocotaria foi no adro da igrexa ás 10 e acudiron unhas 30 persoas tanto da parroquia como da Estrada e outras localidades veciñas. O bo tempo acompañou durante toda a mañá na que se visitaron os principais elementos de interese dos montes de Ouzande e A Somoza. O regreso foi sobre a 1 do mediodía con cansanzo polos 10 km percorridos pero coa alma chea de natureza e conversas.

 

verbena coa orquesta Panorama, esta noite en Ouzande:::

Ouzande retoma esta noite o seu ciclo festivo cunha verbena. Será a partir das 22:30 e coa actuación da orquestra Panorama. Paralelamente haberá a actuación dunha discoteca móbil e servizo de polbeiría. O evento é o preámbulo ás festas da parroquia que se celebran en xuño (Santo Antonio), agosto (patronais) e setembro (romaría do Socorro)

Verbena este venres en Ouzande coa orquestra "El Combo Dominicano":::

Tralo parón motivado pola pandemia, Ouzande énchese de watios e luces este venres 27 de maio. Trátase dunha verbena organizada pola Xunta Parroquial e que levará ao Campo da Festa de Ouzande unha discoteca móbil e a orquesta El Combo Dominicano. A cita festiva comezará ás 20h e contará cunha polbeiría e, en caso de mal tempo, cunha gran carpa. 

As vindeiras festividades son o Santo Antonio, as festas patronais de agosto e a romaría do Socorro que viñan de non ser celebradas  nos últimos anos a causa das restricións sanitarias. 

As "mulleres valentes" de Rosa de Cabanas expostas na Casa das Letras da Estrada ata o 18 de marzo:::

A Casa das Letras da Estrada acolleu o pasado venres 4 de marzo a inauguración da Exposición “Mulleres Valentes” creada pola ouzandesa Rosa Herraiz, máis coñecida como Rosa de Cabanas. Trátase dunha mostra de 52 retratos femininos que recollen a imaxe de mulleres que por un motivo ou polo outro se poden calificar de “valentes”, ou o que é o mesmo, a exposición pon rostro a 52 mulleres silenciadas e que aportaron á sociedade desde a ciencia, a cultura, o activismo social e político, o laboral... A autora non estivo soa, senón que moi acompañada polo numeroso público que se achegou ao antigo colexio “José Antonio”, hoxe Casa das Letras.

O acto estivo presentado por Lueiro, quen deu paso á autora quen agradeceu a colaboración das distintas persoas que axudaron a que esta exhibición vise a luz, como Casal de Creación na enmarcación, ou aos colaboradores na montaxe, así como ás persoas que mediante as redes sociais fixeron as súas suxestións e animaron a Rosa no seu traballo. A continuación a especialista en historia da arte, Carmela Sánchez Aríns, expuxo unha visión da mostra desde unha perspectiva técnica e entrevistou á creadora, dando máis información de todo o proceso. Finalmente o Concelleiro de Cultura agradeceu á creadora por esta contribución á actividade cultural local; está inserida dentro da programación de celebración do 75 aniversario do Teatro Principal da Estrada.

A mostra xurdiu coma un reto persoal no que Rosa pretendía visibilizar rostros de mulleres importantes na historia local, galega e internacional ao tempo que afondaba en novas técnicas creativas, todas elas co fío condutor do retrato. Para que fose reto de verdade propúxose sacar unha imaxe nova cada semana, de aí que haxa 52 retratos. A enmarcación de alta calidade contribúe a darlle aínda máis valor ao traballo final.

O traballo compleméntase cunha mesa de creación onde se poden ver os bosquexos dalgunhas das obras e con visitas dos centros escolares da contorna, así cun material didáctico sobre o empoderamento da muller para que o alumnado poida traballar nas aulas e aprender máis destas figuras.

A colección das 52 “mulleres valentes” pode ser visitada na Casa das Letras desde agora e até o 18 de marzo, en horario de 9.00 a 14.30 e de 16.00 a 21.30 horas de luns a venres e mailos sábados de 10.00 a 13.00. Unha boa maneira de celebrar o día internacional da muller traballadora que se estende a boa parte do mes.

 

 

 

Pecha o ano cun importante repunte de casos de coronavirus:::

 2020 será recordado coma o annus horribilis no que contabilizaron 7 falecementos e 338 infectados pola Covid. Nos últimos días volvérase a ter 0 casos activos, pero arestora os casos superan a cifra de 40 persoas infetadas no municipio estradense. Especúlase cun novo peche perimetral para a próxima semana.

Ouzande conta con algúns casos activos controlados, pero preocupan un gromo procedente de Cuntis con 7 casos activos, e o caso de Agar, no que un caso se propagou exponencialmente xerando máis de 20 casos activos.

Desde o centro médico estradense xa se fala dunha terceira vaga, destaca o seu intenso labor que xa conseguiu frear a expansión do virus na zona en varias ocasións. Actualmente contabilízanse dúas persoas do ámbito sanitario contaxiadas no seu labor profesional.

Na reunión do comité técnico da próxima semana establecerán que municipios entran ou saen de situacións de emerxencia e as medidas a aplicar, pero as cifras son claras e apuntana a que A Estrada camiña cara a un novo peche perimetral.

Ante este escenario só queda unha saída; extremar as precaucións evitando o contacto social e, cando non sexa posible, airear ben as estancias, usar sempre a máscara, manter a maior distancia social posible e lavar ou hixienizar as mans con alcol.

Nova traxedia en Ouzande: falece un veciño cando realizaba labores agrícolas na súa leira:::

Semana negra en Ouzande; distintas forzas de seguridade e servizos médicos de emerxencias acodían á parroquia para atender un veciño octoxenario que se indispuxo na parcela na que traballaba, só puideron certificar o seu falecemento, ao parecer por causas naturais. 

Ouzande xa estaba de loito polo pasamento en circunstancias tráxicas doutro veciño de 50 anos na noite do pasado domingo. 

O noso máis sentido pésame á familia.

Noticia relacionada; "TRÁXICO SUCESO EN MATALOBOS"

Ouzande cancela todas as súas festas de verán:::

A Comisión de Festas anunciou durante o confinamento a suspensión de todos os actos festivos desde xuño até setembro en resposta á crise do Coronavirus. Cancelaron tamén o cobro das cotas aos veciños.

2020 será recordado coma o ano da COVID-19 e en Ouzande pasará á historia coma o ano da cancelación de toda actividade social desde o pasado mes de marzo. As primeiras afectadas foron as clases de música tradicional, A Fervenza de Ouzande anunciara a súa suspensión canda a supresion das clases da formación regrada. A actividade cultural da primavera en Ouzande estivo confinada e agora os grandes días de sol son días de desescalada por fases nos que non ten lugar a actividade social ligada ás festas parroquiais.

En total son tres datas festivas as que se deixarán de celebrar; en xuño o Santo Antonio coas súa tradicional sardiñada, en agosto as festas patronais na honra de San Lourenzo patrono de Ouzande e en setembro a tradicional Romaría do Socorro.

A comisión festiva composta pola Xunta Parroquial así o anunciou hai días canda a supresión dos cobros das cotas festivas que habitualmente se realizaban no adro da igrexa nos propios días das festas.

imaxes de arquivo

TRÁXICO SUCESO EN MATALOBOS:::

O 112 informaba esta mañá dun tráxico suceso que aconteceu no lugar da Brea, en Matalobos. En torno ás 10h recibían unha chamada de auxilio alertando de que unha persoa estaba atrapada entre un turismo e unha parede. Ao lugar dos feitos desprazáronse efectivos de Emerxencias da Estrada, Bombeiros do Deza, Policía Local, Garda Civil e servizos sanitarios, pero nada puideron facer por salvar a vítima. Sobre as 14h informaban desde a Garda Civil de que o falecido era o propietario da nave Mouriño Motor e que falecera por esmagamento, posiblemente xa na tarde noite do día de onte. A súa muller foi quen dera a voz de alarma.

A medida que se deu a coñecer a triste nova e as siglas do falecido J.S.G. de 50 anos, a consternación instalouse na veciñanza. O noso máis sentido pésame á familia.

FALECE VÍTIMA DO CORONAVIRUS VITTORIO GREGOTTI, ARQUITECTO DO MÍTICO HOTEL MILANO DA ESTRADA:::

Segundo deu a coñecer o xornal italiano IL CORRIERE, Gregotti faleceu esta mañá aos 91 anos de idade cando se recuperaba nun hospital de Milán dunha enfermidade respiratoria que se vén de agravar ao estar infectado do COVID-19. A súa esposa está ingresada polo mesmo motivo e recupérase no mesmo centro hospitalario.

Nado en Novara en 1927, é un dos grandes teóricos da arquitectura a nivel mundial e creador de obras de referencia coma o Centro Cultural de Belem (Lisboa) o Teatro Lírico de Aix-en-Provence (Francia) ou o desenvolvemento urbanístico do barrio Bicocca de Milán. 

O mundo chora desde hoxe a perda dun dos grandes arquitectos de sona mundial e que deixou a súa pegada na vila da Estrada co Hotel Milano, hoxe infelizmente abandonado e coas súas instalacións destrozadas.

A COMARCA BLÍNDASE CONTRA O CORONAVIRUS:::

#QUEDANACASA é o consello convertido desde onte en obriga que leva a absolutamente toda a poboación a confinarse nas súas casas nunha das medidas máis duras e drásticas que se coñecen e que ten como obxectivo cortar a transmisión vírica do COVID-19.

Nas últimas xornadas distintas entidades foron pechando as súas actividades, primeiro as institucións públicas que entornaron as portas de xulgados, colexios e concellos. A seguir toda a actividade asociativa deportiva e cultural como a piscina, as distintas feiras proxectadas na Estrada, clases de música tradicional en Ouzande e outras parroquias. Desde a declaración de ESTADO DE ALARMA xa non é posible abrir comercios nin saír á rúa. A Estrada blíndase así para cortar a transmisión dun virus que xa ten en xaque varios países no mundo. 

Na Estrada coñécense dous casos, ambos con conexión co maior foco en España, Madrid. Trátase dun operario de María Martínez Otero e do político local Xesús Palmou. O gran perigo deste virus é a súa alta transmisión, polo que cómpre estarmos alerta e non saír da casa agás para accións imprescindibles e sempre gardando a máxima cautela. Estas medidas teñen unha mensaxe de esperanza que os meniños italianos souberon representar con este lema: Vai ir todo ben! Iso agardamos e facémolo recluíndonos. É a mellor maneira.

O PORTAL DE NOTICIAS CUMPRE 10 ANOS:::

En novembro de 2009 botaba a andar O PORTAL DE NOTICIAS, facendo desta volta 10 anos de información local, centrada na parroquia de Ouzande e área de influencia. Nesta década cambiou o nome, que orixinariamente foi Portal de Ouzande pero tamén a estética e as temáticas a tratar. Sendo unha iniciativa totalmente altruísta mantense debido aos altos índices de audiencia que posicionan moitas das súas publicacións por riba das 1000 visualizacións e non só en Ouzande e área de influencia, senón que O PORTAL é seguido en numerosos países, principalmente por persoas vinculadas con este territorio e que moran lonxe. Curiosidades houbo moitas ao longo destes anos, podéndose destacar os contactos que se realizan desde O Brasil por parte de persoas que pensan que é un medio dixital dese país pola proximidade da lingua. Tamén cabe destacar que a páxina de facebook deste medio ten milleiros de seguidores que interaccionan para dar aviso de noticias ou presentar queixas ante circustancias próximas que non ven atendidas. O PORTAL leva 10 anos atendendo esas necesidades de comunicación así como ofrecendo inormación ante a gran demanda de noticias do ámbito local. 

Desde O PORTAL DE NOTICIAS queremos aproveitar este aniversario para darllelas grazas a todas as persoas que levan colaborado connosco neste tempo, sobre todo mediante a lectura das distintas noticias redactadas para un público tan concreto. E aproveitamos a ocasión para desexarlle todos os lectores un feliz anonovo 2020. 

A comarca avalía os datos dos temporais encadeados e as súas consecuencias:::

A máis grave foi a perda da monumental sobreira de Arnois, máis popularmente coñecida como a Sobreira de Balboa. Os seus case 10 metros de circunferencia e 16 de altura facíana unha das árbores máis senlleiras da contorna e estaba declarada como monumental tamén pola súa antigüidade xa que rondaba os 500 anos. Mentres se chora esta perda, a Estrada atesoura outras cinco árbores declaradas monumentais que están en Callobre, Orazo (Outeiro e igrexa), Arca e Arnois. O vento tamén derrubou decenas de árbores que imposibilitaron o paso por estradas de distintas parroquias e a auga anegou camiños e accesos a algunhas vivendas, obrigando á intervención dos servizos de emerxencias en numerosas parroquias. O entramado urbano da Estrada tamén sufriu a furia do vento, guindando restos construtivos de distintas edificacións e obrigando a pechar as piscinas municipais e acordoar predios na Praza de Galicia, Praza do Mercado ou zona deportiva. Os ríos medraron cuantiosamente, deixando estampas coma estas do Ulla ao seu paso por Couso, lugar no que pararon nestes días numerosos automobilistas á altura de Pontevea para fotografar a magnitude das augas baixo a ponte de orixe romana.

A Fervenza de Ouzande reune unha vintena de persoas na súa tradicional Ruta de Nadal:::

O pasado mércores 25 de decembro, día de Nadal, A Fervenza de Ouzande foi fiel á súa cita cos montes de Ouzande e A Somoza, dándolle vida aos inundados camiños destas dúas parroquias estradenses. A marcha arrancou ás 10.15h diante da igrexa románica desta parroquia e desde onde partiu o paseo de 9km polos lugares máis salientables destas dúas freguesías da Estrada. As distintas "dificultades" que se foron encontrando os sendeiristas por causa das intensas chuvias dos últimos meses fixeron máis interesante a camiñada pois implicou agudizar o enxeño para poder atravesar ante árbores caídas ou camiños anegados. O público deleitouse coas fermosas carballeiras en inverno, cos Muíños da Fervenza de Ouzande ou co Rego das Rans, lugar enigmático onde nace o regueiro de Ouzande. A Fervenza ouzandesa bifurcada a causa do grande caudal tamén se fixo foco das cámaras de fotos pola fermosura non só da natureza, senón polo día de sol e de temperaturas case primaverais. Durante o percorrido, socios desta asociación, foron guiando aos visitantes pola historia do propio monte ou da recuperación que A Fervenza tén feito do entorno dos muíños así coma dos seus accesos, recordando que todos os veráns e de xeito altruísta, un grupo de socios se reúne con fouciños e desbrozadoras para limpar este paraíso cercano. 

Festa fin de ano da Escola de Música Tradicional de Ouzande:::

Profesorado e alumnado da Escola de Música Tradicional da Fervenza de Ouzande despediron o ano cunha cea de Nadal o pasado 13 de decembro no Restaurante O Xarro. Como xa vén sendo tradicional, a boa mesa e a mellor sobremesa estivo regada por boa música e mellor baile. As clases de pandeireta, baile, gaita, percusión, voz... reunen cada sábado no local social de Ouzande a centos de persoas desexosas de aprender máis das súas especialidades e xa xeraron, sen ser o seu obxectivo inicial, dous grupos de música; Retrouso e Recanto. 

A FERVENZA DE OUZANDE DESPIDE O OUTONO CUN OBRADOIRO DE XABÓNS:::

Xabóns feitos na casa, coma se vén facendo desde tempos inmemoriais. Así, cunha volta á orixe, despide A Fervenza de Ouzande este outono de actividades na parroquia estradense. A filosofía é a mesma que outros obradoiros que teñen realizado nas últimas tempadas, coma de cosméticos ou perfumes con herbas naturais e procesos respectuosos co medio. Montse Fernández Búa foi a mestra, especialista nestas lides e propietaria de Casa Xorxeira, un negocio ubicado na Praza de Abastos da Estrada e que non deixa de sorprender co seu bo facer sobre elementos de reutilización ou da propia natureza que sabe manexar para dotalos de novas utilidades sen contaminar, ao xeito tradicional. Desta volta a Asociación ouzandesa pediu aos asistentes que levasen materias tan simples como 2 litros de aceite usado, un balde, unha caixa de cartón ou unha batedora doméstica. Todo isto foi o pasado 14 de decembro no local social da parroquia en horario de tarde (17.30h)

OUZANDE celebra o incio das clases de música tradicional cun concerto de Invernía...

Será este sábado día 21 de setembro ás 21.30h no Campo da Festa de Ouzande e con el darán o pistoletazo de saída ás múltiples disciplinas musicais que cada sábado reúnen a centos de persoas neste mesmo lugar para aprender desde a bailar puntos de xota ou muñeira ata a converter o aire en música de gaita. 

Nesta velada han informar dos prezos e demais detalles das clases e tamén se fixarán os horarios de PANDEIRETA, BAILE que terán lugar os sábados pola tarde, e das clases de ACORDEÓN, GAITA E TAMBORIL, que se celebrarán os sábados pola mañá. As clases comezarán o PRIMEIRO FIN DE SEMANA DE OUTUBRO. A presentación terá como colofón a actuación da Banda de Gaitas INVERNÍA, da que forman parte os músicos do grupo Retrouso da Fervenza de Ouzande. 

Invernía vén de actuar no Festival Intercéltico de Lorient,  en representación de Galicia. A súa participación vén de colleitar un importante éxito e moi boas críticas. A Banda está formada, ademais dos músicos ouzandeses, por outros das agrupacións: Gaiteiros de Buxantes (Dumbría), Pana Raiada (Compostela) e Sonche Lerias (Vedra). Ao remate do concerto continuarase cunha foliada na que participaran os músicos e alumnos das diferentes clases. Haberá un posto con servizo de bar, bocadillos e empanada para os asistentes. O campo estará cuberto. As persoas interesadas poden informarse ou matricularse en: carreirosouzande@gmail.com facebook.com/afervenza.deouzande

cartel da actividade

Invernía actuando con Susana Seivane en marzo deste ano.

Invernía no Festival Intercéltico de Lorient

cartel das clases de música tradicional d´A Fervenza de Ouzande.

Fin de semana festivo en Ouzande:::

 Ouzande despide esta fin de semana a tempada festiva de verán coa romaría do Socorro, desde o xoves 29 de agosto estanse celebrando os actos festivos da novena á Virxe do Socorro e hoxe comeza a festa co grupo Kyoto, mañá misa ás 13.15h e sesión vermú con Orquídea, pola noite esta formación únese a Trío Savoy para amenizar a verbena. Xa no domingo, día grande das festas coa misa ás 13.15h e trala procesión poxa das ofrendas á Virxe. A seguir concerto da Banda de Música Municipal da Estrada que durante a mañá estará facendo pasarrúas pola parroquia.

charanga BB+ 

Grupo Foliada nas festas de agosto

sesión vermouth nas festas patronais de agosto