Retrouso fixo soar "OU" nos Seráns en Compostela:::

Santiago de Compostela volveu acoller as sesións nocturnas de música e baile tradicional que se viñan celebrando na Sala Nasa baixo o nome "Seráns da Nasa" mais desta volta con nova ubicacións; a Nave de Vidán e novo nome "Seráns en Compostela". A novidade é que se imparten ao inicio unhas aulas de baile tradicional para que todo o mundo se poida poñer a bailar ao son dos distintos músicos que animan a velada. Desta volta, e para a estrea, quixeron contar con Retrouso quen deu boa conta das pezas do seu disco "OU" levando un anaquiño de Ouzande ao barrio compostelán de Vidán. Logo dos bailes ao son dos "Retrousos" tamén actuou a mítica formación Ultreia e presentaron as músicas do Ghusto do Boi. Ao remate houbo música con mesturanza de formacións e instrumentos ata altas horas, a pesar de ser xoves e o venres ser día laborable. 

Esta noite Retrouso participa nos "Seráns en Compostela":::

Hoxe, xoves 14, o grupo local Retrouso actuará na "Nave de Vidán" xunto con outras formacións de carácter tradicional no que se coñece como "Seráns en Compostela". No cartel aparecen as formacións "Ultreia", "O Ghusto do Boi" e "Retrouso". A velada comeza ás nove e media cun obradoiro de baile tradicional impartido pola profesora Eva Barona de Ultreia, a seguir (10.30) é o turno dos ouzandeses que presentarán as pezas do seu disco OU. Ás 11.15 o grupo de música e baile Ultreia dará conta do seu bo facer deixando para a medianoite a actuación do Ghusto do Boi. Ao remate haberá foliada tradicional ata que "o corpo aguante".

A "Nave de Vidán" está en Santiago de Compostela, na Avenida Mestra Victoria Míguez, á altura do número 44, próximo ao Hospital Clínico e ao Campus Sur da USC.

Cartel do evento

Retrouso na actuación de presentación de OU no Teatro Principal da Estrada

mapa coa ubicación da "Nave de Vidán"

A neve deixouse ver timidamente en Ouzande:::

Unha fina nevada cubriu hoxe a parroquia de Ouzande. A vaga de frío polar procedente da rexión escandinava xa se comezou a sentir na tarde de onte cun descenso imparable das temperaturas, deixando os ceos despexados durante a noite e provocando unha forte xeada, xa contra a mañanciña a neve caída callou con forza nas veigas e tellados ouzandeses pero como as precipitacións non foron abondosas, as folerpas non causaron problemas na rede viaria. O que si houbo hoxe foi unha fermosa estampa de inverno para alegría de pequenos e maiores.  As previsións de Meteogalicia falan dun ascenso da cota de neve ao longo do día, deixando temperaturas baixas pero sen máis neve. Este episodio climatolóxico súmase ás intensas chuvias, sarabias e ventos fortes dos últimos días que están a converter no presente inverno nun dos máis húmidos e desapacibles dos últimos anos. 

Entrevista musical a Miguel Carbajal:::

Reproducimos unha entrevista realizada por Sara Valcárcel a Miguel Carbajal, veciño de Ouzande e profesor de Música no IES Manuel García Barros. Achéganos unha serie de reflexións sobre o mundo da educación e da música.

O local social convírtese no escenario dunha película de terror:::

O local social de Ouzande vén de convertirse nun plató cinematográfico da man de Abel Carbajal. O novo cineasta rodou a curtametraxe "Cirujano" en distintas localizacións da Estrada, correspondéndose a de Ouzande á parte máis impresionante da cinta. O trailer foi estreado o pasado 2 de febreiro no Teatro Principal da Estrada ás 20.30h. Na película participan diversos actores coñecidos na comarca e algún veciño da parroquia: Gonzalo Valcárcel, Paula Aboy e Martín Riveira (Martín do Cereiro). Esta é xa a segunda cinta que presenta Abel Carbaljal, logo do éxito colleitado tralo filme TE PILLÉ que foi presentado no Teatro Principal da Estrada e que contou coa participación de distintos veciños de Ouzande.

Un vídeo deixa os atractivos turísticos de Ouzande ao descuberto:::

Igrexa de Ouzande

O Concello da Estrada vén de facer a presentación dun video promocional do turismo municipal, ten unha duración de 4, 35 minutos e nel saen lugares e actividades relacionadas coa parroquia. O máis destacado é a igrexa románica que aparece en varias ocasión e da que se destacan tanto os canzorros que hai na ábsida e que representan distintas figuras humanas, cabezas de animais e ornamentacións xeométricas coma a fachada ou o fermoso e coidado adro. Tamén se fai mención aos sendeiros que nos permiten acceder ao conxunto patrimonial dos Muíños da Fervenza. Outras referencias é ás actividades que se poden realizar por chan ouzandés, especialmente a práctica do sendeirismo e mais a emerxente práctica de BTT (Bicicleta Todo Terreo) para a que A Estrada é un paraíso e un dos roteiros (o da Rapa das Bestas) comeza e remata nos montes de Ouzande. Retrouso tamén aparece este video promocional ao constituír a música galega un reclamo para a xente que nos visita, especialmente de fóra de Galicia.

Retrouso

Moitas das campañas turísticas que se teñen feito da zona destacan principalmente a Rapa das Bestas e mais o Pazo de Oca como estandartes do turismo local, pero desta volta compleméntase cos múltiples recursos que ten a zona: patrimonio, gastronomía, natureza, pesca, entroidos, árbores singulares, tradicións ancestrais, artesanía, feiras, 

Igrexa, adro e sendeiros de Ouzande

Manuel Pereira Valcárcel presentou o seu último libro en Zaragoza:::

Nun acto moi emotivo, Manuel Pereira fixo a prestentación do seu INTERIOR CON FROITEIRO E FERIDAS o pasado día 16 no CEIP Joaquín Costa. Este acto completa o triángulo de presentacións OUZANDE (3 xaneiro) - MADIRD (7 febreiro) - ZARAGOZA (16 febreiro) de lugares ligados ás vivencias que se proxectan nos versos deste ouzandés que estivo no Colegio de Huérfanos del Magisterio trala morte de súa nai de 1967 a 1973 e que actualmente traballa e reside na capital española aínda que son frecuentes as súas estadías na terra de orixe.

No acto estivo Narareth Fernández, a súa primeira profesora de literatura, Ana Cristina Lapiedra, ilustradora do poemario que non puidera achegarse en xaneiro a Ouzande e o amigo galego afincado en Madrid Antón Castro.

Manuel Pereira, Nazareth Fernández, Cristina Lapiedra e Antón Castro

Numeroso público arroupou a Pereira na presentación de Zaragoza