29 de outubro de 2012

A NOIVA E O NAVIO recalan en Ouzande con Susana Sánchez e Uxío Allo:::

O pasado sábado, a escritora do Foxo, Susana Sánchez presentou en Ouzande o seu último poemario A noiva e o navio no local social.
O acto foi organizado pola Fervenza de Ouzande e presentado polo socio Uxío Allo, da Arousa, quen introduciu aos ouzandeses no ámbito mariñeiro.  Ademais da lectura dalgúns poemas tamén se xogou co vocabulario dos nomes do mar que aparecen no poemario grazas a un bingo.

27 de outubro de 2012

Esta noite toca atrasar os reloxos, ás 3 pasan a ser as 2:::

Hoxe remata o horario de verán e os reloxos atrasaranse unha hora, de modo que ás 3.00 horas volverán ser as 2.00 horas, polo que oficialmente haberá unha hora máis, en cumprimento da Directiva Europea que rexe o denominado Cambio de hora e que afecta a todos os Estados membro da Unión Europea.
A práctica de atrasar o reloxo unha hora no inverno e adiantalo no verán xeralizouse de forma desigual a partir de 1974, en resposta á primeira crise do petróleo, daquela algúns países decidiron adiantar os seus reloxos para poder aproveitar mellor a luz do sol e, polo tanto, consumir menos electricidade en iluminación. 

Aplícase como directiva desde 1981 e foi renovada sucesivamente cada catro anos, segundo recorda o Ministerio de Industria, Enerxía e Turismo. Na actualidade é unha decisión indefinida.

O cambio de hora que se aplica esta madrugada poderá servir para aforrar enerxía pero tamén ten efectos adversos pois aféctalle especialmente a vellos e nenos ao alterar os biorritmos nas comidas e horas do sono.




26 de outubro de 2012

Xoque fala na TVG de "Todo é Silenzo":::

En menos dun mes, aproximadamente, chegará ás grandes pantallas a versión cinematográfica da novela de Manolo Rivas, logo de que se presenta no Festival de Cine de Valladolid. O Teatro Calderón da cidade castelá estivo cheo para ver o equipo que traballou baixo a dirección de Luis Cuerda que pousaron no photocall. Xoque falou para a TVG sobre a película e mais sobre as próximas citas co teatro. Tamén avanzou que terá que ir indo "cara ao monte" pois en breve comeza a rodaxe dun novo filme non moi lonxe, nos montes de Moraña.
Teatro Calderón de Valladolid no Festival de Cine coa presentación de Todo é Silenzo
 Xoque co equipo da película pisando a "alfombra vermella"
Cuerda falou do filme 

O de Sueiro fala para o programa Zig-Zag diario da TVG

Resultados da mesa electoral de Ouzande:::

Se de Ouzande dependeran os resultados electorais das Eleccións ao Parlamento de Galicia, este sería o panorama; o PP tería maioría absoluta a pesar de ter perdido votos, o PSOE e BNG perden votos e aparece con forza AGE na dinámica política mentres que CxG se asoma timidamente.

O Partido Popular tivo nas autonómicas de 2009 122 votos, mentres que en 2012 queda con 7 menos; 115.  O Partido Socialista Obrero Español pasou de 73 a 29, O Bloque Nacionalista Galego pasou de ter 49 a 10 votos nas eleccións do pasado domingo. Alternativa Galega de Esquerda, a coalición liderada polo carismático Xosé Manuel Beiras tivo boa acollida en Ouzande, situándose na segunda forza máis votada con  30 votos. O outro partido novo que conseguiu votacións na nosa parroquia foi Compromiso por Galicia que levou 3 papeletas.

De todas maneiras, esta comparativa non ten en conta os cambios no censo electoral (defuncións, novos maiores de idade, cambios de residencia...) pero aínda así déixannos o dato de que a dereita revalida o seu respaldo na nosa parroquia e que a nova formación nacionalista e de esquerda se presenta con forza. 
En comparación coas demais mesas electorais da contorna a tendencia é a mesma, aínda que en Tabeirós-A Somoza a forza máis votada foi o PSOE e nalgunhas mesas do casco urbano AGE tamén aparece como segunda forza, por diante dos socialistas.





20 de outubro de 2012

"Ouzande" supera as 5.000 visitas:::


O blog "Ouzande" vén de superar as 5.000 visitas. Concretamente no momento de redactar esta nova levaba 5.552 visitas. Por países, a maior parte das consultas proceden de España (3.751), sendo os Estados Unidos o país de fóra con máis visualizacións (553), curiosamente Rusia ten 308 visitas e Alemaña 275. Un país con forte relación con Ouzande como é o Brasil ten 148 visualizacións do blog e, xa por debaixo, atópanse outros países europeos como Holanda (77), Francia (68) ou o Reino Unido (31). Sorprendente é que haxa visitas desde o Xapón, que conta con 29 ou Ucraína con outras 29 visualizacións.


Este blog é unha iniciativa altruísta e sen ningún outro ánimo que manter informado de todo o que acontece en Ouzande a quen lle poida interesar. Naceu en 2008 e xa conta con 200 noticias de actualidade sobre a parroquia. A pesar de ter un ámbito de comunicación moi reducido pois en Ouzande viven sobre 300 persoas, ten unha media de 100 visualizacións semanais, aumentando ata ao dobre nos momentos de maior concentración de noticias. As informacións máis presentes son as relacionadas coa intensa actividade social e cultural da parroquia, seguida de deportes, medioambiente ou sucesos. Desde 2012 conta cunha sección de videos informativos e especiais sobre os eventos e aspectos de maior interese que se producen no ámbito de Ouzande.




Celebran o centenario do casamento de Castelao:::

Onte cumpríronse 100 anos do casamento do histórico autor e galeguista Alfonso Daniel Rodríguez Castelao e Virxinia Pereira. Por este motivo, a Asociación Vagalumes organizou varias actividades para realzar a figura do insigne autor.
Hoxe ás 16.30h comeza no cemiterio de Figueroa o "Roteiro Amoroso de Castelao". Escollen este punto pois é onde xacen os restos mortais da muller e do fillo. Posteriormente pasaráse por puntos da vila relacionados coa vida de Castelao e Virxinia; a pensión onde quedaba o rianxeiro cando viña visitar á súa moza da Estrada, o lugar onde estaba a igrexa onde casaron, o Casino onde foi o banquete no actual café "A Farola", a casa da familia en Pérez Viondi. Este paseo pola vila sairá a dúas parroquias da Estrada de especial interese para a faceta artística do homenaxeado, xa que acostumaba a dar longos paseos por Ouzande para gozar coa fermosa estampa da ábsida románica da igrexa parroquial ou de sentar ao pé do cruceiro a parolar. A outra parroquia é Guimarei pois a súa torre medieval tamén foi obxecto da mirada de Castelao. 
Xa ás 8 do serán e na Sala de Exposicións de Caixanova, na Estrada, van presentar un cómic sobre a vida de Alfonso Daniel, neste acto estarán Ignacio Vilariño (guionista), Xoán Carlos Garrido (especialista na vida e obra de Castelao) e Fantoches Bag de Lalín (representarán algún fragmento desta banda deseñada).
Estes actos son libres e gratuítos.

 Pintura da igrexa de Ouzande feita por Castelao, exposta no Museo de Pontevedra


 Fotografía de Castelao


 Unha das poucas fotos de Castelao e Virxinia no día do seu casamento
 Pintura da estradense Virxinia Pereira, esposa de Castelao

Cartel das actividades da Asociación Cultural Vagalumes

"Todo é Silenzo" abre o Festival de Cine de Valladolid:::

O filme Todo é silenzo de José Luis Cuerda é o encargado de abrir o Seminci, o Festival de Cinema de Valladolid que se desenvolve desde hoxe e ata o 27 de outubro. No acto de inauguración estará o actor ouzandés Xoque Carbajal, quen participa na obra.
Todo é Silenzo rodouse hai un ano con exteriores en Galicia, nesta película traballan actores e actrices da talla de Quim Guitiérrez, Miguel Ángel Silvestre, Celia Freijeiro, Juan Diego, Axel Fernández, Carolina Cao, Sergio González ou Chete Lera.
O filme conta a historia dunhas redes de contrabando e como dominan en varias vilas galegas. As casualidades fan que uns amigos da infancia, alleos a todo, busquen na costa obxectos útiles no medio do que deixa o mar. A trama argumental consolídase no momento en que entran en contacto co capo que domina na zona e co que van ter problemas.
Esta película está baseada no libro homónimo de Manolo Rivas, como xa o fora o filme A lingua das bolboretas do mesmo director.
Xoque Carbajal tivo que perder 11 kg para encarnar a Chelín, un personaxe dominado polas drogas nun ambiente mariñeiro e corrupto.
 José Luis Cuerda, director de Todo é Silenzo
Xoque Carbajal, quen encarna un drogadicto de nome Chelín

19 de outubro de 2012

Presentan "a noiva e o navio" de Susana Sánchez no local social:::

O vindeiro sábado 27 de outubro, o local social de Ouzande acolle a presentación do poemario A noiva e o navio de Susana Sánchez. Será ás 8 do serán e estará presentada por Uxío Allo.
Susana é natural do Foxo e socia da Fervenza de Ouzande desde hai anos, motivo polo cal escolleu esta parroquia para a presentación do seu segundo libro na comarca da Estrada. Desde hai uns anos vive na Arousa, experiencia grazas á cal nace A noiva e o navio. Trátase da historia dunha travesía marítima protagonizada por dous amantes. Este é o segundo poemario de Susana, logo de publicar [de]constuçom tras ser galardoada en 2009 co Premio Nacional de Poesía Xosé María Pérez Pallaré.

Para a súa presentación en Ouzande, a autora traerá ao arousán Uxío Allo, quen é tamén socio da Fervenza de Ouzande e alumno das clases de música tradicional que se desenvolven na parroquia, ninguén mellor ca Uxío para presentarnos o mar do que fala Susana na obra.

Aínda que está xa a venda nas librarías da zona, A noiva e o navio pódense adquirir no local social o día da presentación oficial.


 Imaxes da presentación do libro na Illa de Arousa
Cartel da presentación en Ouzande que será o próximos sábado 27 ás 8 do serán

16 de outubro de 2012

Xornada electoral este domingo no local social:::

O local social de Ouzande acollerá este domingo día 21 unha das mesas para as eleccións ao Parlamento de Galicia. Os/As electores/as poderán votar a partir das 9:00 horas.
Como xa vén sendo habitual, poderáse exercer o dereito ao voto ata as 8 do serán, hora en que se pecharán as portas do local social para proceder a facer os cómputos das votacións.
O/A elector/a pode levar a súa papeleta xa preparada no seu sobre, ou ben seleccionar a papeleta de voto no propio colexio electoral e introducila no sobre xa que necesariamente debe haber papeletas suficientes de todas as candidaturas nas cabinas ou nas súas proximidades. Para preservar o segredo do seu voto o electorado pode seleccionar a súa papeleta na cabina instalada nun recuncho do local se así o desexa. Unha vez na mesa cómpre mostrar o DNI, carné de conducir ou pasaporte  e dicir o seu nome e apelidos para que as persoas elexidas por sorteo para xestionar as votacións procedan a levantar acta de que o elector en cuestión cumpriu co seu dereito a votar.
No local social reconvertido a electoral poderán estar interventores de todos os partidos que así o soliciten e que poden tomar nota dos votos emitidos para comprobar que non hai lugar a confusións.
Unha vez rematado o período das votacións, os membros da mesa contarán os votos emitidos na sala e por correo para logo levantar acta dos resultados electorais que aporta a parroquia de Ouzande de cara á composición do Parlamento nos próximos catro anos.

11 de outubro de 2012

Preestrean a curtametraxe "Te pillé"

A curtametraxe dirixida por Abel Carbajal e na que actúan coñecidos actores da comarca xa é unha realidade logo de moito tempo de traballo e rodaxe. Os exteriores foron filmados na Estrada e xa se pode ver un adianto. Hoxe as persoas que traballaron para facer realidade esta curtametraxe fixeron unha preestrea no local social de Ouzande ás 9.30 do serán. En breve daráno a coñecer ao público en xeral.

As beirarrúas de Ouzande volven ser noticia:::

As malnacidas beirarrúas de Ouzande volven estar de actualidade desde que o alcalde da Estrada anunciou nunha rolda de prensa que se contruirá un novo tramo desde o Tallo e ata a zona da taberna, aínda que só polo lateral dereito da vía. A operación custaríalle ás arcas municipais 150.000 euros. Lonxe de ser motivo de alegría para a veciñanza, esta é unha nova que se acolle con desconfianza. A causa disto é que a construción das xa existentes foi moi lenta, insanamente politizada e o resultado non contentou aos transeúntes pois son moi estreitas e non deixan moito espazo para o aparcamento. Este novo aviso de construción do tramo dáse en plena campaña electoral e é incompleta, pois a petición popular é que estas cheguen polas dúas marxes ata a igrexa de Ouzande. Agora só falta agardar para ver se este anuncio vai máis alá dunha declaración de intencións, desde logo será tema de conversa a retomar nas casas e camiños da parroquia.





imaxes de arquivo do inicio das obras

O 18 de outubro comezan as clases de xerontoximnasia:::

Un total de 13 persoas están inscritas xa para as clases de xerontoximnasia que se han desenvolver en Ouzande os xoves ás cinco da tarde. Unha empresa privada, de nome Sisel, será a encargada de desenvolver estas actividades durante nove sesións consecutivas a partir do día 18 de outubro. Esta é unha iniciativa do Concello da Estrada que xa chega a Ouzande por segundo ano consecutivo. Na edición anterior remataron cun torneo de brilé e cachibol que deixou un sabor agridóce ás nosas conveciñas; por un lado houbo falta de planificación aínda que polo outro o divertimento e o compañeirismo foi a nota dominante.  

2 de outubro de 2012

Publicados os horarios dos cursos de música e baile tradicional:::

A Fervenza de Ouzande vén de facer públicos os horarios das clases de música e baile uqe se desenvolverán durante o curso 2012/2013 no Local Social de Ouzande. Os sábados pola mañá haberá clases de acordeón de 10.30 a 11.30 mentres que as de tamboril serán de 11.30 a 12.30. Por outra banda as clases de gaita terán dúas modalidades, unha para iniciación tamén os sábados de 11.30 a 12.30 e o grupo de perfeccionamento terá a súa sesión semanal ás 12.30 e ata as 13.30. Xa en horario de tarde celebraranse as de pandeireta, en dous turnos (iniciación e perfeccionamento) e mais as de baile tradicional. Os horarios destas dúas disciplinas determinaranse nas próximas datas. As persoas interesadas están convidadas o sábado 6 ás 16.00 para establecer as horas exactas entre o alumnado e a profesora. E en horario de noite terá lugar o curso de cancións tradicionais de 22.00 a 23.00 SÁBADOS. Estes horarios fixéronse públicos trala reunión do pasado sábado á que acudiron un grupo importante de alumnos e na que xa comezaron as inscricións. Desde a organización avisan de que aínda quedan prazas en case todas as disciplinas e basta con acodir nos horarios establecidos ou informándose na Taberna de Ouzande. As clases comezan este sábado día 6 de outubro.
O pasado sábado houbo unha reunión na que se estableceron os horarios e na que o alumnado encetou o curso cunha demostración

Sígueme por correo electrónico:::