29 de abril de 2013

Este mércores, día do traballo, Ouzande bótase a andar:::

 Este mércores, 1 de maio, celébrase o día internacional do traballo. Xa hai anos que a Fervenza de Ouzande aproveita esta efeméride para "ir andar" gozando polo tanto dun día de ocio polos camiños e carreiros da zona. Desta volta teñen a previsión de facer unha ruta semellante a dos últimos anos, dando a coñecer un pouco mellor a parroquia tanto a veciños como a visitantes. A saída é ás 10 da mañá da igrexa parroquial de Ouzande. É unha actividade gratuíta e á que pode ir calquera persoa preparada para percorrer os 10 km da camiñata. Será un "paseo" posto que se prolonga ata a unha do mediodía ao ir parando en diversos puntos de interese cultural e paisaxístico da zona; carballeiras, bosques de acivros, muíños, a igrexa románica, a Fervenza... Aínda que é de dificultade baixa, recomendan ir preparados con roupa axeitada para camiñar e combater as posibles inclemencias metereolóxicas, tendo en conta que o chuvioso inverno deixou zonas moi húmidas e enlameadas.
cartel da actividade

Imaxe da ruta do ano pasado





Tequexetéldere volve de Murcia con moi bo sabor de boca:::

A agrupación estradense Tequexetéldere estivo esta fin de semana no XXX Festival de Folclore "Villa de Bullas", na provincia de Murcia. Estiveron convidados canda a outros grupos de Toledo e Murcia cos que compartiron escenario e esperiencias. Ademais tiveron a oportunidade de degustar a gastronomía da zona, sobre todo dos produtos da afamada horta murciana e do viño local. De feito fixéronlles unha recepción oficial no centro de interpretación deste alcol. 
A gaiteira ouzandesa Noelia Bouzón tivo a oportunidade de formar parte da comitiva de tequexetéldere e vivir esta experiencia. Todo saíu segundo o previsto. A boa música mesturouse co cansanzo motivado poas moitas horas de autobús coas que concluíron esta longa viaxe. As impresións do grupo quedan plasmadas nun tuit que publicaron na súa conta de twiter: "Os nosos gaiteiros tocando no festival xunto con grupos de Toledo e Murcia. Que cerca vivimos e que diferentes somos" 


27 de abril de 2013

"Avelaíñas teatro" suspende a ruta teatralizada nos muíños de Ouzande polo mal tempo:::

A inestabilidade metereolóxica que hoxe trouxo frío e chuvia provocou que o grupo de teatro do IES Antón Losada se vise na obriga de suspender a ruta teatralizada que tiñan preparada para as 12 do mediodía. Ao lugar si chegou un dos autobuses que traía escolares de Palas de Rei, pero pronto se desviou para o IES Antón Losada onde se xuntaron cos de  Touro, Laxe e A Estrada para seguir as actividades do seu I Festival de Teatro da Estrada a cuberto. Ás cinco da tarde e no Teatro Principal a Escola de Teatro de Laxe e o Obradoiro Municipal de Teatro de Palas de Rei secenificarán a obra "Ficcións". Ás 7.30 do serán han ser a Aula de Teatro do C.P.I. de Touro e maila Aula de Teatro do IES Antón Losada "Avelaíñas Teatro" quen presenten "No Mundo da Fantasía".
As actividades terán que ser a cuberto, na foto a Aula de Teatro de Laxe nunha actividade dramática





26 de abril de 2013

Arranca unha fin de semana moi activa coa actuación de Retrouso en Couso:::

Retrouso actúa esta noite en Couso, dentro das "Foliadas en Couso" que se celebra un venres de cada mes desde febreiro e ata maio. Desta volta os ouzandeses comparten cartel con outras dúas formacións da zona; os Regatos de Matamulleres e as Ruadeiras de Loimil. As gaitas de Retrouso han soar con forza na veciña parroquia de Couso, pero tamén levan rumbo á outra punta da península, pois a gaiteira Noelia Bouzón viaxa arestora con Tequexetéldere ao XXXI festival "Villa debBullas" onde tocarán e bailarán distintas pezas do noso folclores canda a outros grupo de Murcia e Toledo. Mañá está previsto que sexan recibidos no Museo del Vino desta localidade murciana. A actuación será pola tarde e na mañá do domingo participarán nun pasarrúas pola vila, antes do regreso.
Esta é unha fin de semana moi activa para Ouzande, pois ao mesmo tempo que isto pasa camiño de Murcia e Couso, este mesmo serán outra comitiva de ouzandeses parten á capital da provincia para estrearse no certame Cantos de Taberna baixo o nome de Recanto. Así mesmo mañá ás 12 do mediodía o grupo de teatro do IES Antón Losada da Estrada debuta na Fervenza de Ouzande cunha ruta teatralizada á que acodirán máis de 200 escolares de distintos puntos de Galicia.


25 de abril de 2013

Presentación do ORFEÓN RECANTO mañá nos "Cantos de Taberna" de Pontevedra:::

Mañá venres 26 de abril ás 9 do serán presentarase ao público o orfeón nacido das clases de canto de Ouzande. O nome do mesmo foi escollido entre todos; "RECANTO" facendo un dobre xogo de palabras. Ao pouco de comezaro curso xa ofreceran unha pequena actuación no magosto de Ouzande, pero desta volta saen da parroquia con nome propio. 
A iniciativa na que van actuar chámase "Cantos de Taberna" e desenvólvese durante distintos venres da primavera en tabernas do casco histórico da cidade do Lérez. Son dous os locais nos que poderemos oir as voces de Ouzande; Lareira e Rebusco, que colaboran nesta iniciativa de Maravallada e que pretende devolverlle os cantos tradicionais ás tabernas da cidade.
Pero "Recanto" non vai só, son numerosas as persoas de Ouzande, familiares e amigos que se unirán mañá a esta actuacíón, dándose cita ás 8 do serán diante da Taberna para sairen xuntos. As actuacións arrancan ás 9 e prolónganse ata a medianoite. Estarán arroupadas polo grupo Maravallada, organizadora do evento.




21 de abril de 2013

200 escolares visitarán a Fervenza de Ouzande:::

O IES Antón Losada Diéguez promove unha actividade didáctica que traerá o próximo sábado máis de 200 persoas a visitar a igrexa e os muíños de Ouzande. Os promotores desta iniciativa son os membros do grupo de teatro Avelaíña que durnte este mes están "de xira" con actuacións e intercambios noutras localidades galegas. O pasado 13 de abril participaron en Palas de Rei na V Mostra de Teatro Escolar cun roteiro teatral polo Castelo de Pambre. Nestes intercambios cada centro promove dar a coñecer a zona con rutas teatralizadas que é o que van facer o día 27. A previsión é que cheguen en 4 autobuses ás 12 do mediodía e fagan unha pequena ruta polos muíños da Fervenza de Ouzande. En diversos puntos varios actores interpretarán pequenas pezas teatrais para dar a coñecer mellor o lugar. Ás dúas do mediodía estarán no adro da igrexa para xantar e coñecer o pasado medieval da parroquia grazas ao templo parroquial. 
O xantar farano no adro da igrexa de Ouzande

A igrexa románica de Ouzande recibirá aos escolares

A Fervenza de Ouzande será escenario dunha ruta teatralizada



A musicoterapia chegou a Ouzande:::

O curso de musicoterapia será os xoves 25 de abril e 2 e 9 de maio. Así o acordaron as persoas que onte asistiron á reunión informativa e organizativa, a hora escollida é as 7 do serán. Cada sesión terá unha duración dunha hora. A profesora deste curso é Natalia Carbajal, especialista no tema e vicepresidenta da Fervenza de Ouzande. Durante a sesión de presentación explicou cales eran os obxectivos destes obradoiros e xa foi quentando motores cunha actividade a modo de exemplo do que se vai facer. 
A Musicoterapia pretende restaurar e potenciar a saúde das persoas que a practican. Apóiase en distintas disciplinas como a musicoloxía, pedagoxia, psicoloxía... e constitúe unha das chamadas "terapias creativas" que máis gustan a quen as practica. Segundo explicou a profesora é interesante que haxa unha certa homoxeneidade nas persoas que acoden ao curso simplemente polo feito de usar unhas músicas que agraden a todos, pois coa musicoterapia búscase ter un momento agradable e propiciar a felicidade con un mesmo, por isto tamén recomendou a utilización de roupa cómoda. O importante non é a calidade musical, nin as capacidades rítmicas de cada un, senón o proveito que se lle poida sacar a todo isto. Para o primeiro día xa hai deberes, os asistentes deben traer algún "instrumento caseiro" podendo facer uso de calquera material de refugallo ou reciclaxe que se teña na casa e co que se poida facer algo de música; botes de cristal con fabas, testos de potas con culleres de madeira e metal, botellas...
Natalia Carbajal imparte o curso

Entre todos acordouse que as sesións sexan os xoves

A modo de exemplo fíxose un xogo de coordinación e ritmo

18 de abril de 2013

A primavera chega definitivamente a Ouzande da man da Fervenza de Ouzande:::

A Fervenza de Ouzande comezará esta semana a súa programación de actividades culturais para esta primavera. Na tarde do vindeiro sábado haberá unha reunión para dar a coñecer unha novidosa actividade dirixida a persoas maiores, un curso de "musicoterapia" impartido por Natalia Carbajal.
Outras das iniciativas que compoñen o porgrama de actividades da primavera son as "rutas a pé" do programa "imos andar" que se levarán adiante os días 1 e 17 do vindeiro mes e o 9 de xuño. Os lugares escollidos para camiñar son a propia parroquia de Ouzande e as veciñas da Somoza e Taberirós. 
Tamén está previsto que haxa unha charla sobre os "coidados do coidador" no mes de maio.
En xuño terá lugar a tradicional excursión, concretamente o día 2 e con destino en terras do interior. Nese mesmo mes, o 23 celébrase a festa do lumeiro, actividade coa que se pechan as iniciativas primaverais da Fervenza de Ouzande.

O curso de musicoterapia ten como obxectivo a mellora de habilidades e capacidades tales como a memoria, a capacidade comunicativa e de linguaxe, a concentración e atención, o equilibrio... así como o aspecto psicolóxico (mellora do estado de ánimo ou da autoestima). O método de traballo baséase no uso da música como elemento de comunicación con un mesmo. A idea é que este sábado as persoas interesadas fixen o horario que mellor lles conveña, en función da demanda e das posibilidades establecerase o calendario e horario das distintas sesións que compoñen este curso. Ofrece máis información A Fervenza de Ouzande no seu blog; www.carreiros.blogspot.com

Cartel do curso de musicoterapia que organiza A Fervenza de Ouzande

17 de abril de 2013

Aumentan os vertedoiros incontrolados preto do Punto Limpo:::


Nos últimos meses volvéronse detectar novos vertedoiros incontrolados en distintos puntos de Ouzande. A pesar de que o Concello xa tiña eliminado algúns deles o ano pasado, veñen de aparecer novos focos de contaminación ao tempo que  agroma o malestar veciñal. Antigamente era a zona do "vertedoiro" na zona limítrofe coa parroquia de Matalobos a que rexistraba este tipo de depósitos, o problema quedou solucionado hai moito tempo coa clausura deste punto. Agora renacen pequenos focos de lixo urbano nas proximidades do Punto Limpo. Hai quen afirma que se deba a que a xente que atopa pechado este depósito decida deixar os seus voluminosos en calquera parte próxima. Os lugares máis afectados son as pistas forestais da zona de Penerada e do Picoto. Os restos que se poden ver son de electrodomésticos, restos de obras, ferralla e mesmo sacos con herba. Estes aumentan a sensación de suciedade e contaminación da zona que tamén sofre os vertidos da depuradora do matadoiro, sobre todo cando chove moito e os restos de sangue e escuma se adonan das beiras dos camiños máis próximos.O punto limpo permanece aberto para as persoas que desexan ir por conta propia os xoves e venres de 9 da mañá a 1 do mediodía e os sábados todo o día (de 10 a 1 e de 4.30 a 7.30) Pódese acceder desde o lugar de Penerada comodoamente pois está detrás do matadoiro. Hai un núemro de teléfono para atender calquera dúbida sobre este servizo (649 490 623)
Restos de electrodomésticos na zona do Curro (pista forestal O Picoto-Penerada)
ferralla, restos agrícolas, pneumáticos e restos de obra en Penerada

14 de abril de 2013

Arranca a primavera a ritmo de pedal:::


O sol non quixo perder canda a 50 persoas esta mañá a última ruta BTT organizada pola Peña Ciclista Bikestrada. A marcha arrancou da Praza do Concello da Estrada pouco despois das 10 da mañá, enfilou pola Avenida Benito Vigo dirección ao Monte da Somoza polo camiño de Penerada, subindo cara ao alto do Monte de Ouzande, bordeou a Pedralba e volveu polo mesmo camiño. Foron uns 25 km que deixaron moi bo sabor de boca aos deportistas. Bikestrada pechou así as chamadas "Rutas Populares" desta primavera, centrándose agora nas clásicas "Ruta do Salmón" e "Rapa das Bestas".


1 de abril de 2013

Coa primavera volven as bicicletas:::

O vindeiro domingo día 14 de abril veremos unha recua de bicicletas a subir polo monte de Ouzande, trátase dunha nova edición das "Rutas Populares" organizadas pola Peña ciclista BIKESTRADA en colaboración co Concello. Xa celebraron a Iª Quedada Feminina e dúas rutas infantís, agora tócalle o turno as que se dirixen aos adultos. O vindeiro domingo terá lugar a primeira que percorrerá o val do Liñares e parte da coñecida como "Ruta do Salmón" (Praia Fluvial do Liñares, Moreira, Barbude, Paradela e Aguións) A segunda ruta será a ouzandesa e subirá ao Monte da Somoza e ten unha distancia duns 18 km. Este é un percorrido moi aplaudido polos amantes da bicicleta todo terreo (BTT) polas fermosas vistas e polo entorno privilexiado que ofrecen os montes de Ouzande  e maila Somoza.
Para participar chega con ter unha bicicleta e levar casco. A saída é na Praza do Concello da Estrada un pouco antes das dez da mañá.

Imaxes da primeira das rutas deste ano, a Iª Quedada Feminina, pola zona de Callobre

Sígueme por correo electrónico:::