Acoe animou este verán os "Sábados na Estrada":::

O mes de agosto vai rematando e así tamén as actividades que ACOE (Asociación de Comerciantes da Estrada) desenvolveu os sábados estivais co fin de animar as compras na vila sábado a sábado. O pasado día 27 as gaitas de Retrouso fixeron pasarrúas polo centro da localidade ao tempo que na Praza do Mercado se instalaba unha pequena feira de produtos ecolóxicos. ACOE convidou a Monte Cabalar, Panadería de Rubin, Fiandeira, Mel de Raúl, Vermú Petroni, sidrerías da Estrada e unha tenda de produtos Bio a participar, ofrecendo unha oferta aínda máis completa no comercio local. Ademais as rúas da vila acolleron moita música durante estes dous meses: Os Ke Hai, Retrouso, Mr Cool, Bótalle Terra, Foliadeiros, Os Regatos, Nai... Ademais houbo actividades para todos os gustos; obradoiro de barriñas enerxéticas ecolóxicas, retos Nerf, decoración de bolsos, inchables, animación da "Patrulla Canina", reciclaxe ou repostería.

O peche foi este sábado 27 cun desfile e coa animación de Retrouso.

Actuación do GRUPO NAI o pasado sábado 20 de agosto

Postos de venda na Praza do Mercado

Retrouso animando as rúas da Estrada o pasado sábado 27

A Fervenza de Ouzande ata fíos para crear unha manta solidaria:::

Onte martes, 14 de maio, ás 21h , celebrouse no Local Social de Ouzande o acto de entrega dunha manta realizada polas tecedeiras da asociación á ONG galega Implicadas no desenvolvemento. A historia solidaria desta manta é longa e moi interesante, pois foi solidaria antes de nacer. En 2014 celebrouse na parroquia un curso de tecido e trapillo que uniu solidariamente un grupo nutrido de mulleres. Unha vez rematadas as aprendizaxes continuaron xuntándose semanalmente todos os martes ás 20h no mesmo lugar para dun xeito autonomo ir aprendendo novas cousas relativas ao tecido, ganchillado ou outras artes do textil. O intercambio foi moito máis alá do meramente técnico e xerou unha amizade e confianza que sería impensable no inicio. Varios membros do grupo colabora na ONG Implicadas no Desenvolvemento e propuxeron facer algo xuntas para colaborar con este proxecto. A idea materializouse nunha manta colaborativa que onte presentaron ante os medios mentres entregaban a Implicadas. Será, xunto con outros obxectos solidarios, o premio agasallo a un sorteo de rifas que fará esta ONG o próximo mes de xullo nun festival a favor das Mulleres da India na área recreativa do Areal de Berres.

Velaquí un video e fotografías dunha manta que ten moito máis que fío de algodón, un produto feito polas mans solidarias das ouzandesas.

A Escola de Música Tradicional de Ouzande celebra unha festa fin de curso:::

Será este sábado 20 de xuño ás 21h no Campo da Festa de Ouzande. Trátase dunha inciciativa da Fervenza de Ouzande e coa que se quere clausurar o curso académico 2014-2015 das clases de música e baile tradicional que se desenvolven semanalmente no Local Social da parroquia. Segundo informan desde a citada asociacion mantívose a alta matrícula de cursos anteriores, con alumnado de todas as idades e disciplinas: gaita, tambor, pandeireta, baile, cancións tradicionais e acordeón. 

No transcurso da velada haberá unha merenda gratis para os asistentes así, como non, coma exhibición dos distintos grupos de música e danza folclórica que compoñen a escola.

Ademais, A Fervenza de Ouzande, vén de presentar a camisola oficial da entidade para este verán. Deseño de Rosa Herraiz, está motivado nos fíos dun tear, activade moi exitosa da asociación nesta última tempada. Ao deseño engadíronlle o lema "seguimos tecendo" e é que a entidade cumprirá en breve os 15 anos como asociación.

Imaxes de arquivo, foliada fin de curso 2014

Guimarei descobre os seus encantos:::

Torre de Guimarei

A parroquia de Guimarei foi a escollida pola Fervenza de Ouzande para celebrar a última ruta de primavera de 2015. Unhas vinte persoas congregáronse ás 10 da mañá de onte, domingo, para iniciar unha ruta de 13 quilómetros polos distintos camiños e pistas de Ouzande, Guimarei e A Somoza. As primeiras paradas foron para o románico da zona,  tanto na igrexa de Ouzande coma a Torre e Pazo de Guimarei. A seguir a casa grande da Algalia e a igrexa de Guimarei. Neste punto visitaron a escalinata barroca que xunto á Torre de Guimarei e á igrexa de Ouzande constitúen elementos moi identificables na obra gráfica de Castelao. O patrimonio de Guimarei fíxose protagonista, pasando tamén polo Pazo de Xerlís e pola presa deste mesmo lugar. 

A Torre de Guimarei son de titularidade privada e están en ruína, a primeira é do século XII e o pazo do XVII, destaca pola monumentalidade da súa pedra. O Pazo da Algalia tamén se atopa en situación de abandono e só se puido entrever no medio da maleza. A igrexa de Guimarei é de estilo barroco e destaca pola fachada e torre monumentais así como polas escaleiras inmortalizadas polo propio Castelao na súa obra gráfica. O Pazo de Xerlís é o único que se rehabilitou en 2012, trátase dun pazo do século XVII, vivenda residencial dunha familia de escribáns beneficiados polas rendas de foros propiciados pola Igrexa naquela época. Na súa fachada destaca o brasón familiar. Actualmente destinase á hostelería, sendo escenario de banquetes e grandes eventos. Ao lado desta construción centenaria parte unha das presas de rega da parroquia.

Con esta andaina, péchanse as saídas de primavera, pero as rutas da Fervenza de Ouzande continuarán no outrono-inverno, tal e como indicaron na propia actividade.

Cruzando Alemparte.

Cruzando auténticos escenarios de película

A andaina percorreu 13km

Pazo de Guimarei

Pazo da Algalia

Igrexa de Guimarei e Pedralba

Pazo de Xerlís, hoxe destinado á hostelería.

Visitantes que se cruzan nos camiños

Este domingo comeza o programa de rutas a pé do Concello da Estrada:::

Facer exercicio nun entorno natural posiblemente sexa a mellor práctica saudable non só para o corpo senón tamén para a mente. Por iso cada vez máis persoas se unen ao hábito de camiñar pola natureza. O tempo primaveral tamén anima a atoarse o calzado deportivo e a mergullarse no bosque. Se a todo isto lle engadimos o interese por coñecer mellor a contorna, teremos os ingredientes necesarios para participar nas rutas a pé que cada vez máis se poden realizar na comarca.

Este domingo comeza o programa "Andainas 2015, o pracer de camiñar" do Concello da Estrada e que será exectuado por Senderuta. Nesta primeira camiñata farase un percorrido por San Miguel de Castro. As seguintes serán nestas datas e lugares: 22 de maio polas Brañas de Xestoso, o 5 de abril polo Liñares, o 19 dese mes Ouzande e A Somoza pola Pedralba e a explotación Monte Cabalar, en maio serán o 3 por Requián e o 17 polo Umia. Todas estas rutas teñen unha dificultade media-baixa  (13-15 km de media) e teñen un custo de 2 euros por persoa.

máis info

Fotos: Senderuta

Gran festa medieval para celebrar o entroido:::

O vindeiro sábado 14 Ouzande celebra o Entroido ao tempo que regresa ao seu pasado medieval. Esta conxunción ten nome propio, Medievou. A Fervenza de Ouzande vén de presentar o fermoso cartel da festa de Entroido que se ha celebrar a partir das 16.30h. Polo momento non se coñece en profundidade o programa de actividades pero xa adiantaron que un moderno carro levará aos festeiros polos distintos lugares da parroquia para ao final celebrar unha gran festa medieval no Campo de baile. Entre outros atractivos desta actividade están as "Cegas do Entroido" que cantarán coplas de desafío pero ao xeito medieval. No lugar da celebración instalarase unha "taberna medieval" onde se servirán todo tipo de viandas e bebidas, tamén haberá unha pequena "Feira Medieval" con produtos de artesanía, libros ou alimentación. Os festexos completaranse cunha foliada popular na que acturá Retrouso. Seguramente que ao longo da tarde haberá oportunidade de ver interactuar unha chea de personaxes medievais que asisten atónitos á presentación do "Códice Clandestino". Esta é unha actividade gratuíta e aberta a todo o público polo que a organización anima a participar quen queira , iso si, vestidos para a ocasión. Seguraente non sexa preciso facerse con grandes disfraces, só un pouquiño de imaxinación para aproveitar teas e roupas vellas dos faiados.

Cartel de Medievou, o Entroido Medieval de Ouzande

A Fervenza de Ouzande celebrou a súa asemblea anual:::

Foi o pasado domingo ás 17h no Local Social da parroquia, no transcurso da mesma déronselle conta aos socios das contas e recordáronse as actividades realizadas coa proxección dun video. A cita comezou coa lectura dunha emotiva carta dunha socia e co recordo a un socio falecido recentemente e a quen se lle dedicou a xuntanza.

Segundo explicou a asociación, en 2014 foron máis dun milleiro de persoas as que participaron nas actividades da mesma, aumentando en diversas actividades que sumaron a vintena. Entre os proxectos destacaron que están traballando nunha nova edición da revista Carreiros e que teñen a intención en 2015 de sinalizar a contorna dos Muíños da Fervenza e editar un folleto. Ao remate gozaron da compaña e da conversa informal acompañada dun chocolate e vendo unha exposición cos traballos realizados nunha das últimas actividades da asociación, as manualidades do curso de trapillo, tear e ganchillo. Nos próximos días realizarán reunións informais para intercambiar experiencias no ámbito das manualidades no mesmo horario do curso recén rematado e teñen previsto celebrar un entroido temático o vindeiro sábado 14 que terá como fío condutor o mundo medieval, ao que a parroquia está tan ligado grazas á súa igrexa románica.

A cita comezou coa lectura dunha carta.

O Local Social estaba repleto de socios e socias que recordaron as actividades do último ano.

visionado dun video con fotos das últimas actividades.

Ao remate compartiron charla e chocolate

Coa Cabalgata de Reis rematan as festas de Nadal:::

As festas de Nadal chegaron ao seu fin. As cabalgatas de Orazo e A Estrada puxeron o broche de ouro a unhas festas cheas de ilusión e encontros familiares. A lotería de Nadal deixou un boleto premiado en Couso e A Estrada encheuse de actividades de rúa que foron seguidas por moito público grazas ao bo tempo. A climatoloxía tamén se aliou cos Reis Magos, congregando numeroso público ante as carrozas reais. A festa tivo o punto final coa descoberta de agasallos, sobre todo polos máis pequenos, especialmente excitados con tan tanta maxia e misterio.

A Estrada réndese ao trapillo:::

Se nunca oiu falar do trapillo, non se asuste. Agora está de moda e non tardará en ver algunha alfombra, cesto, prenda de vestir ou complemento feito con este material. O trapillo é fío feito de tecido restante da construción da industria textil. Na Estrada está de moda grazas aos cursos impartidos por María Gaiteiro, quen xa levou as técnicas e artes do trapillo a varias parroquias tanto da Estrada como de municipios próximos como Boqueixón, Vedra ou Moraña. Pardemarín e Riobó foron das últimas parroquias estradenses en facer cursos deste tipo e agora tócalle a Ouzande, da man da Asociación Cultural A Fervenza de Ouzande. Este mes de xaneiro rematará un curso que se pode considerar todo un éxito, tanto pola cantidade de participantes como polo entusiasmo que estes labores artesáns desatan entre o alumnado. Pero non só de trapillo vive o home, tamén a tradicional la ten o seu espazo nestes cursos, sobre todo para a confección de ponchos ou bufandas. O máis destacado destes cursos son os teares que se usan que poden ser feitos na casa e coas formas máis variadas en función da prenda que se queira tecer. Fácil, divertido e desestresante, quizais por iso se está a poñer de moda a confección en trapillo. A materia prima vén de Portugal desde onde aseguran que alí foi un furor hai tempo e que agora son cada vez máis as persoas  acoden desde este lado da fronteira polo prezado trapillo.

Alfombra confeccionada con trapillo no curso de Ouzande.

Tear para confeccionar bufandas.

tear de trapillo.

Tear de trapillo.

Alfombra de trapillo.

A golpe de camiñata para baixar a cea de Noiteboa:::

Así foi como decidiron celebrar o Nadal unhas 25 persoas que responderon á convocatoria da Asociación Cultural A Fervenza de Ouzande. Ás 10h 30 encontráronse fronte á Casa Porto, taberna de Ouzande para, mochila ao lombo, subir decididamente polo Monte de Ouzande. O obxectivo foi coroar o castro de Arcos, xa no veciño municipio de Cuntis, cousa  que sonseguiron facer contra as 12 do mediodía. A baixada fixérona polo encoro da Estrada para desviarse cara ao lugar no que nace a Fervenza da parroquia, o Rego das Rans, seguidamente visitaron o conxunto de muíños e pozos que conforman o espazo ecolóxico que dá nome á asociación para seguidamente acceder á igrexa parroquial onde gozaron dunha visita guiada, descubrindo algúns aspectos do románico ouzandés. Esta era a quinta edición da "Feliz Ruta de Nadal" e contou con moi bo tempo e ánimo por parte dos asistentes que percorreron 11.5 km en tres horas de andaina.

Camiñantes fronte a Casa Porto.

Algunha sorpresa desagradable onda o Punto Limpo da Estrada.

Subindo cara ao Castro.

Accedente á coroa do castro de Arcos.

No descenso.

A ruta rematou cunha visita guiada á igrexa románica de Ouzande.

A maxia do Nadal instálase na Estrada:::

Os bos desexos que no Nadal se cruzan na rúa provocan que por uns días nos esquezamos dos problemas diarios e que creamos na maxia natalicia. E, se non, que llo pregunten aos que onte paseaban polas rúas da vila e se encontraron a Mónica de Nut ofrecéndose como perruqueira. A uns cortoulles as puntas e a outras pintoulles as uñas, iso si todo amenizado coa súa voz de soprano. Os viandantes, sorprendidos, compartiron a estreiteza da rúa cos coches e co frío do recén estreado inverno. Hoxe pola mañá feira e máis espectáculos de rúa e, pola tarde, é a quenda dun clásico do Nadal, o mesmo Papá Noel arrancará ás 18h 30 polas rúas e camiño do centro da terceira idade. Trala Noiteboa unha proposta diferente para celebrar o 25 de decembro, camiñar. Camiñar polos camiños dos montes de Ouzande, camiño do castro de Arcos da man da Fervenza de Ouzande. A partir do venres teatro infantil; Os tres tenedores, A Cantar con María Fumaça, Bloody e os Marys, Cu Cu Tas Tas, Dous Pallasos en Apuros.. e de aí ata os Reis máis Mónica de Nut, Peter Punk, César o Home Orquestra... E para acabar de facer a dixestión das pesadas ceas natalicias a San Silvestre que será o 31 de decembro polas rúas da vila. O Centro Xuvenil “A Estación” tamén organiza actividades, colándose entre os “papá noeles” a ritmo de breakdance (26 decembro 19h) ou facendo Skate na Praza do Concello (30 decembro) películas e pin pon (3 xaneiro) Nestes enlaces podes ao día de todas estas iniciativas: Programación Concello da Estrada e A Fervenza de Ouzande

Mónica de Nut

Ce Home Orquestra.

Decoración de Nadal na Praza do Concello.

Peter Punk.

Exposición de grafitis no Teatro Principal.