17 de xuño de 2010

Festa en Ouzande este sábado coa "foliada fin de curso":::


Este ano A Fervenza de Ouzande recupera unha festa para celebrar o fin de curso das actividades formativas de música e baile. No último curso houbo un aumento de participación moi notable en todas as disciplinas. O alumnado vén de ensaiar unha serie de pezas para tocar e bailar nesa tarde a xeito de exhibición. A actividade ábrese a todo o público en xeral, especialmente á veciñanza que queira ver o progreso destas clases. Haberá comida a partir das oito do serán. Máis información no blog da asociación.

11 de xuño de 2010

Polos carreiros de Ouzande ata o Castro de Arcos:::


Será ese o percorrido que as persoas que queiran realizarán o vindeiro domingo día 13de xuño en horario de mañá.
O inicio prevése para as 10.00 diante da igrexa de Ouzande. O traxecto pisará un percorrido de 11 quilómetros para visitar o castro de Arcos, sen escavar. Desde este lugar hai unhas vistas panorámicas sobre o municipio de Cuntis, cara ao Xesteiras, a Ulla, mesmo sobre a Ría de Arousa en días claros. Pásase pola beira do lugar de Ferreiros, pertencente a Arcos pero con moita máis relación historicamente con Ouzande. Á volta báixase para Ouzande polo Picoto e mailo Redondo para parar na fonte deste lugar, uns metros antes de chegar ao punto da saída, a igrexa románica da parroquia. Este regreso prevése para a unha e media do mediodía.

Xunta Parroquial e Fervenza de Ouzande arranxarán o Muíño do Rubio:::

Xa vai para dez anos que se constituíu a Fervenza de Ouzande, tomou o nome deste emblemático lugar da parroquia e tivo como obxectivo a longo prazo a recuperación desta paraxe. Nestes anos conseguiuse facer unha limpeza constante; cada primavera algúns voluntarios limpan os accesos. Chegouse a falar cos múltiples usuarios antigos usuarios dos muíños para valorar a súa recuperación, pedíronse axudas. A pesar de non ver moito traballo realizado si houbo unha insistente actividade de promoción do lugar, de recuperación da memoria histórica. Esta primavera e coa axuda da Xunta Parroquial veránse as primeiras obras no Muíño do Rubio. Xa se fixeron as reunións previas para deseñar a actuación. De momento cóntase con tellalo e adecentalo. Conseguiuse material subencionado polo Concello, persoal cualificado para a obra e en breve Ouzande dará un paso adiante na recuperación do seu patrimonio; O Muíño do Rubio.

8 de xuño de 2010

O Concello da Estrada anuncia unhas obras moi necesarias no local social:::


O Concello estradense vén de anunciar na súa páxina web a aprobación das obras tanto do arranxo do local social da parroquia coma das instalacións do museo municipal.
A empresa adxudicataria destas dúas intervencións é Construcións Cutrín Castro SL, o montante total desta operación ascende a 61.268 euros a repartir entre a mellora do Museo do Pobo Estradense e a adecuación do local veciñal.
Este inmoble foi rematado en 1976. Durante os primeiros anos foi usado con relativa frecuencia para actividades sociais, culturais e mesmo como vestiario para actividades deportivas, pois conta con dúas duchas e un aseo. A finais dos anos 80 caeu en desuso, cun proceso de deterioro agravado polas humidades que lle afectan. É a primeira vez que algunha administración amosa interese por esta contrución, posto que se leva pedido en numerosas ocasións axuda para dignificar o que posiblemente sexa o local deste estilo máis utilizado en todo o municipio.
A obra ten como finalidade non só proporcionar á parroquia un espazo digno para instalar unha sala de ordenadores ou realizar xuntanzas de moitos tipos, senón tamén recuperar unha construción que no momento actual non se aproveita en toda a súa posible utilidade. Ademais, o seu adecentamento exterior é preciso pola súa proximidade á igrexa románica do lugar.
O proxecto de rehabilitación consiste, por un lado, na realización dunha drenaxe perimetral e impermeabilización para evitar entradas de humidade. Ademais, pecharase a parte superior do palco, que pasará a contar con dúas estancias, unha para conter os ordenadores e a biblioteca, e outra para calquera uso que requira a parroquia.
Tamén se realizará unha explanada exterior, cun pavimento de lousas de formigón. Esta explanada, por un lado, contribuirá á estanqueidade do edificio, e por outro, será un espazo útil para actividades no exterior e actuacións. As escaleiras actuais serán demolidas e o acceso aos locais será a través dunha escaleira e dunha rampla, para mellorar a accesibilidade.

7 de xuño de 2010

Primavera chea de actividades na parroquia:::

A primavera de 2010 está a ser en Ouzande un fervedoiro de actividades. A asociación cultural vén de realizar dous roteiros a pé (un pola parroquia e outro pola Somoza) e maila excursión ás Terras de Monterrei, a Xunta Parroquial aínda está recollendo trala festa do Santo Antonio e xa se nos anuncian máis actividades. A primeira esta mesma semana, a ruta de sendeirismo ao Monte de Arcos. É o domingo de 10 a 1 e media da mañá e percorrerá os montes de Ouzande cara a Ferreiros para subir ao fermoso Castro de Arcos, desde o que ademais hai unhas vistas impresionantes. Nestes días esta zona está libre de maleza polo que a saída pode ser moi agradable. Na parte inferior desta información pódese ver unha foto de hai tres anos cando A Fervenza de Ouzande fixo por vez primeira esta saída con motivo do Día das Letras Galegas.
A próxima semana clausúranse os cursos de música e baile de Ouzande cunha festa en que o alumnado exhibirá todas as súas aprendizaxes do inverno. Será o día 19 ás 8 da tarde e a festa irá acompañada dunha boa merenda.
O mellor peche da primavera é o de Ouzande, a visita que todos os anos nos anuncia o Home do Saco e que sempre acaba no lume. Unha festa sinxela, máxica e divertida onde non faltará a música, os chourizos asados con varas de loureiro, a auga do San Xoan... e aquelas cousas das que nos queremos desfacer e que os festeiros anotan simbolicamente nun papel que meten no saco e posteriormente no lume. Será o 23 que cadra en mércores ao anoitecer.

O Santo Antonio celébrase en Ouzande a golpe de sardiñas e chourizos:::


As sardiñas e mailos chourizos con pan foron os protagonistas dunha velada, a organizada pola Xunta Parroquial, o pasado venres 4 de xuño. Un carro con bebida e un posto con comida ao que acudiron os festeiros para logo sentarse comodamente nas cadeiras e usar as mesas dispostas na parte central do campo. Contra a medianoite os acordes da orquestra Galilea que tocou máis de dúas horas e media para amenizar a velada. No transcurso deste festa fíxose o corteo dun cabrito procedente da cooperativa Monte Cabalar de Arca. A festa rematou sen incidentes a pesar de que se congregaron centos de persoas no Campo ouzandés.

1 de xuño de 2010

Monterrei acolle uns cincuenta veciños de Ouzande:::


Este domingo, 30 de maio 2010, A Fervenza de Ouzande emprendeu unha viaxe ás terras de Monterrei para celebrar a excursión anual.
Trátase dun val encaixado entre o Macizo Central Galego, a Serra do Larouco e os montes dos Riós. A primeira parada foi na Cidade-Fortaleza de Monterrei para visitar o recinto, especialmente o palacio renacentista, a igrexa gótica de Santa María e a Torre de Don Sancho, á que subiron os excursionistas para contemplar unhas vistas impresionantes sobre o val que se estende cara á Portugal; mesmo se podía ver ao lonxe a Torre de Monforte en Chaves. Chamou a atención o abandono das casas e o esquecemento ao que se relegou este enclave chave na nosa historia.
O segundo destino foi o casco vello de Verín, realizouse un pequeno roteiro urbano que pasou polos lugares máis emblemáticos da vila; casas ilustres, convento da Mercede, estatua do Cigarrón, Praza de García Barbón, capela de San Lázaro, Casa do Escudo...
Como a fame apretaba, tomouse rumbo a unha área recreativa chamada "das Balocas", á beira do Río Támega, en Castrelo do Val. Alí houbo tempo para degustar o viño e a auga da zona, así como a famosa Bica do Val de Laza.
Xa pola tarde fíxose unha visita ao recinto de Cabreiroá para probar as augas na fonte do minarete creado a principios do Século XX polo emprendedor Xosé García Barbón e para pasear polas inmediacións do antigo balneario e parque, con máis de 2000 exemplares arbóreos procedentes de todo o mundo. A visita ás terras do Támega rematou ás sete da tarde, tomando rumbo cara a Ouzande con gratos recordos e unha convivencia para repetir.

Sígueme por correo electrónico:::