Ouzande marcha de excursión::

Mañá domingo, Ouzande marcha de excursión. A Fervenza de Ouzande organizou a tan agardada saída anual con destino á terceira cidade máis grande de Galicia, Ourense. O inicio está previsto para as 9 da mañá con chegada ao "outro OU" aló polas 10.30h. A primeira das visitas será para a cidade histórica e inclúe o paso polo Museo das Termas  e un roteiro guiado polas principais rúas. O xantar está previsto para as 14:00h no Campo da Feira de Ourense. Trala comida a excursión trasládase ao veciño concello de Bande onde se visitará a igrexa de Santa Comba (século VIII, visigótica), única desta tipoloxía que se conserva en toda Europa. A última das visitas será no campamento militar de Aquis Querquenis, os restos romanos dun asentamento que tiñan as tropas romanas ao pé da Vía XVIII ou Vía Nova que unía Bracara Augusta con Asturica Augusta. Ao remate vólvese para Ouzande, agardando estar aquí de volta ás nove do serán.

"Pedegree" obtén o terceiro premio en "Filmar para Cambiar":::

A curtametraxe "Pedegree" xa vai colleitando os seus premios, desta volta conseguiu o terceiro premio na primeira edición do concurso "Filmar para cambiar" organizado por Verdegaia, A Xuntanza e Amarante. No festival de Cine de Ourense xa gañara o segundo premio e tamén está proposto en máis certames, como o "Acción Magistral" ou o Festival de Cine Jove de Valencia.

A Aula de Creación artística do IES Manuel García Barros é a produtora desta curta, os profesores Carlos Loureiro, Xoán Xosé Pérez e Miguel Carbajal acudiron a recoller o diploma canda a Abel e Laura Carbajal.

Carlos Loureiro, Abel Carbajal, Xoán Xosé Pérez, Miguel Carbajal e Laura Abalde no acto de entrega

diploma acreditativo do premio



Tatuaxes, de Manuel Pereira, tamén en Madrid:::

Manuel Pereira presentará o próximo mércores 5 de xuño o seu libro Tatuaxes no Ateneo de Madrid. Esta obra fora publicada por Follas Novas en outubro de 2011 mais agora presenta unha edición bilingüe galego-castelán pois así como Inventario de Fragmentos falaba da súa estancia en Zaragoza, Tatuaxes reflicte momentos da súa vida en Madrid. Nesta ocasión publícaa a editorial Amargord e no acto han intervir o editor Luís Luna e os escritores Vicente Araguas e Luz Pichel.

imaxe da presentación de Inventario de Fragmentos o pasado mes de xaneiro en Ouzande

Manuel Pereira recitando un poema de Inventario de Fragmentos

Video-resumo da VIII Ruta das Letras:::

A "Ruta das Letras" desafiou ao mal tempo e coroou a Pedralba:::

A VIII Ruta das Letras desafiou esta mañá ás condicións metereolóxicas e foi capaz de subir ao alto do Monte da Somoza. Pasadas as 9:30h da mañá partían da igrexa de Ouzande uns 25 camiñantes cara ao Picoto para ascender polos camiños do monte cara ao alto de Pedralba, a uns 630 metros de altitude. As previsións de mal tempo non frearon aos camiñantes que se defenderon con chuvasqueiros e paraugas das ameazas de treboada. Durante a ruta houbo varios momentos de emoción, como cando unha importante manda de cabalos se cruzou no seu camiño ou no momento en que unha treboada de auga e sarabia quixo frear aos sendeiristas a poucos metros do punto xeodésico da Pedralba. O regreso fíxose polos camiños das carballeiras da Somoza coa melloría do tempo. Xa no adro da igrexa de Ouzande, os organizadores agasallaron aos participantes con libros para celebrar o Día das Letras, pero tamén tiñan unha sorpresa preparada para honrar ao autor teatral Roberto Vidal Bolaño, a quen se lle dedica este día. Fixeron a lectura dun anaco da Bailadela da Morte Ditosa, escenificando a historia dun mozo que se encontra coa morte e que lle pide que cando teña que ir para onda ela, que o avise.

Con esta ruta, A Fervenza de Ouzande vai avanzando na programación cultural da primavera, as próximas citas son o día 2 de xuño coa excursión anual e o día 9 con unha nova ruta a pé, desta vez por terras de Tabeirós.

Foto de grupo antes da saída

Camiño do alto da Pedralba

Foto da Victoria, no punto xeodésico do monte

Un momento de aventura entre grandes toxos

Lendo a Roberto Vidal Bolaño

e de premio, libros

"Pedegree" concursará en "Filmar para cambiar" e "Cinema Jove de València":::

A curtametraxe "PEDEGREE" foi preseleccionada para participar nestes dous concursos logo de levar o segundo premio no Festival de Cinema de Ourense, tamén foi finalista aos Premios da Acción Maxistral, polo que o día 22 deste mes ha ser proxectado no marco de Filmar para Cambiar e contra finais de xuño no encontro audiovisual Cinema Jove de València, un certame de novos artistas do audiovisual que xa vai pola edición 28 e que se celebra anualmente en Valencia.

Pedegree é un proxecto benéfico do IES Manuel García Barros no que colaboran persoeiros da literatura e do deseño e que aportará fondos para a Cruz Vermella.

A Ruta das Letras sobe á Pedralba:::

O Monte da Pedralba será o destino deste ano no día das LETRAS GALEGAS. Así o vén de anunciar a Fervenza de Ouzande, organizadora da actividade e quen, cada ano mestura natureza, deporte e letras galegas. Desta volta o homenaxeado é o autor teatral Roberto Vidal Bolaño. A saída é algo máis cedo que de costume pois a ruta é un pouco máis longa que o habitual xa que ten como obxectivo subir ao alto do monte da Somoza para gozar dunhas vistas espectaculares, será algo así como subir ao cumio da Estrada para vela dende o aire ao mesmo tempo que se goza das vistas sobre a Ría de Arousa, dos montes da provincia de Ponteveda, da área do Deza e Trasdeza, da conca fluvial do Ulla e do Liñares e, mesmo, se o tempo está claro poderáse adiviñar boa parte da provincia da Coruña. Para chegar alí usaranse camiños cubertos de pólas de carballo e acivros. Á volta agasallarán aos camiñantes con libros e non descartan algunha que outra sorpresa. Esta é a segunda das rutas a pé desta primavera e unha das que máis espectación levanta pois achégase xente de distintos lugares que queren aproveitar esta data festiva para coñecer un pouco máis a nosa zona e gozar co mundo das letras desde unha perspectiva lúdica. Pódense consultar todos os datos técnicos no blog da asociación cultural A Fervenza de Ouzande.

vistas desde a Pedralba

bestas pacendo no monte da Somoza

A Estrada desde a Pedralba

Xa está a venda "Pedegree", un proxecto benéfico do IES Manuel García Barros:::

Trátase dun proxecto benéfico no que colabora moita xente, así o mostraron onte no MOME da Estrada na súa presentación membros do IES García Barros que son os promotores da iniciativa. A portada foi cousa de Rosa Herraiz e os deseños interiores de alumnado do centro educativo. Os textos son de distintos autores galegos como Suso de Toro, pero a maioría teñen selo da zona, coma dous textos de Xosé Manuel Martínez Oca ou un de Manuel Pereira Valcárcel.

Este proxecto consiste nun conxunto de relatos entrelazados por un tema común, o maltrato animal. inclúe un DVD feito polo grupo de creación artística que dirixe Miguel Carbajal e xa está nas librerías da Estrada. O diñeiro que se recaude coas vendas estará destinado á Cruz Vermella. Son mil exemplares a 10€ a unidade que buscarán un fondo de 10.000€, o froito material e benéfico deste proxecto coral.  

O maio arrancou en Ouzande cunha ruta a pé polos camiños e carreiros da parroquia:::

Hoxe comezou o mes de maio en Ouzande cunha camiñata organizada pola Fervenza de Ouzande. Ás dez da mañá dábanse cita na igrexa parroquial unha quincena de persoas preparadas para botarse a andar pola parroquia. En total foron uns 10km de ruta que se prolongou ata a unha do mediodía.  Arrancaron pola parte de atrás da igrexa para observar de preto a ábsida románica do templo parroquial e logo foron cara ao Formigueiro por disintas pistas e camiños da parte leste da parroquia. Subiron cara ao monte de Ouzande desde a Moroza para desviarse por distintas pistas forestais da zona da Somoza e volver  para o medio da parroquia polos Muíños da Fervenza e maila Fonte do Redondo. Posteriormente baixaron do Picoto pola calzada cara ao Redondo e así deron fin á ruta ao pé da centenaria igrexa que fora o punto de saída. As boas condicións atmosféricas do día de hoxe foron favorables para a realización desta ruta, aínda que os ceos estaban totalmente cubertos e tiraba un pouco de aire frío, ao botarse a andar de contado se entrou en calor. A próxima "Ruta a pé" ha ser o vindeiro día 17 de maio, coincidindo coa celebración do Día das Letras Galegas.

Pouco despois da saída, polos camiños cara ao Formigueiro

O grupo atravesa unha zona de eucaliptos no Monte de Ouzande

Houbo tempo para recrearse