Música e animación nas festas patronais de Ouzande:::

Dos 7 días de festa que hai en Ouzande, esta fin de semana pasada celebráronse as patronais, na honra a San Lourenzo e ao Santísimo Sacramento. Houbo celebracións relixiosas, con cinco primeiras comuñóns, verbenas con orquesta e polbeiro e mesmo animación coas IV Oulimpiadas.

Aínda que o día propio de San Lourenzo, patrón da parroquia, é o 10 de agosto, é tradición celebralo na fin de semana seguinte. Así o venres 12 comezaban os festexos cunha verbena. Houbo orquestra, polbeiro, inchables e festa ata ben entrada a madrugada. O sábado 13 pola mañá actuaron Os Ke Hai de Callobre no adro da igrexa antes dunha misa na que tres nenos da parroquia celebraron as súas primeiras comuñóns, procesión e sesión vermouth cun trío musical no Campo da Festa. Pola noite máis festa con dous tríos e inchables no mesmo lugar. A festa do domingo 14 había levar a Ouzande á Banda de Música Municipal da Estrada que ofreceu pasarrúas por distintos lugares da parroquia e concerto na igrexa. Houbo misa e procesión, nas celebracións eucarísticas outros dous cativos da parroquia celebraron as primeiras comuñóns. Tralo merecido descanso e xantares familiares chegou o momento dos IV Xogos Oulímpicos que convertiron o Campo da Festa nunha auténtica catedral da deportividade. Agora queda agardar pola romería do Socorro que se celebrará os vindeiros 9, 10 e 11 de setembro.

Noticia relaciondada: OUZANDE MOSTRA O AUTÉNTICO ESPÍRITO OULÍMPICO:::

 

  

Ouzande mostra o auténtico espírito olímpico:::

Non foi en Río de Janeiro nin houbo perdedores, as OUlimpiadas celebráronse o pasado domingo 13 en Ouzande e todo o mundo saíu gañando. Así é o espírito oulímpico, os máis de 30 rapaces e rapazas que participaron nesta orixinal actividade demostraronlle aos adultos os valores do esforzo, da constancia, do compañeirismo e da superación. Algún non levantaba máis dun metro do chan pero todos foron capaces de cumprir os obxectivos, convertíndose en auténticos medallistas oulímpicos.

Ás 18.30h comezaron coas inscricións e os preparativos. A organización, chamada COU (comité oulímpico) estableceu para as 19h o acto de inauguración; as delegacións das cinco cores oulímpicas encheron o campo da festa de Ouzande, foron atrás do fachico oulímpico ata o seu espectacular encendido e ante a atenta mirada de pais, nais, veciños e festeiros. A continuación as distintas probas, cada equipo tiña 15 minutos que o COU ía marcando para facer os xogos: unha xincana cunha carreta, outra saltando unha pista con pavóns do millo, outra na que había que encestar un balón nunha canasta pero cos ollos vendados, outra proba consistía en transportar auga usando só a boca, mesmo había carreiras de biciclestas nas que había que chegar o último... mesmo houbo unha proba de levantar torres de carozos... moita actividade que os máis de 30 participantes superaron con moito ánimo e dedicación. Ao remate había unha sorpresa, mentres que os moitos xuíces que controlaban as probas foron deliberar, cada equipo tivo un momento libre para xogar ao Pikachocú, unha caza de pokemons sen móbiles, correndo ata a igrexa e procurando o pokemon da cor de cada equipo. Ao regreso un gran podium, posto que todos os equipos levaron algún premio: compañeirismo, superación, simpatía... foron loureados con coroas de oliveira e fíxoselle entrega dunha enorme medalla de chocolate a cadaquen e unha pegatina de recordo das IV Oulimpiadas, o acto de clausura rematou cunha fermosa foto de grupo que quedará como recordo do auténtico espírito oulímpico, o de Ouzande.

Foto do acto de clausura 

foto do encendido do fachico oulímpico

100 metros pavón

xincarreta e biciclentas

100m pavón

xincarreta

cazando pokemon

Barcala presume de praia:::

Cando as altas temperaturas de agosto se alían co tempo de lecer, as praias convértense nun cobizado destino que non todos teñen ao pé da porta. A Estrada presume de ter o Concello dos mil ríos, desde o Umia ao Ulla pasando polo Liñares, Vea, Curantes... pero curiosamente é un municipio con poucas áreas de recreo debidamente acondicionadas. En Barcala hai un pequeno gran paraíso chamado O Bao e que ofrece todos os ingredientes para gozar dunha xornada de desconexión en contacto coa natureza. Ata hai pouco, os usuarios eran os veciños máis próximos, pero estes queren compartir o lugar e presumen do seu. Hai anos o Concello da Estrada, a través dun Obradoiro de Emprego, realizou uns traballos de mellora, dotando o lugar dun pequeno parque infantil e unha pontella de madeira, tamén desbrozou a zona. Pero estes espazos precisan un mantemento constante que, ata o momento, realizan os propios usuarios. Son eles quen o limpan e promocionan, crearon unha páxina en facebook na que dan información sobre a temperatura da auga ou comparten fotos ou anuncian actividades que alí se desenvolven. 

O pasado mes de xullo, un usuario comezou unha campaña para que o Concello da Estrada asuma máis responsabilidades en relación ao Bao, creando unha petición pública en change.org  Aínda que recoñecen que o municipio achega o tractor de desbroce ata a pista de acceso, afirman que son necesarios labores de poda e limpeza do areal. Así a petición baséase en catro puntos. O primeiro é a limpeza de maleza e restos que xere, o segundo a poda das árbores próximas á zona de baño, a terceira é o arranxo da zona infantil posto que falta un columpio e o chan está roto, facéndose perigoso para os nenos e nenas que alí se dispoñan a xogar. O último refírese aos accesos, a pista que une a área coa estrada Sinde-Couso non está asfaltada, xéranse buracos coa chuvia e ten certa pendente polo que a baixada en coche queda restrinxida só para valentes.  

A Praia do Bao sitúase preto da Ponte Colgante de Couso, catro quilómetros río abaixo. Pódese acceder desde a estrada que une Couso con Barcala, Sinde ou Padrón pero hai que tomar unha estrada forestal non asfaltada e non está sinalizada. Esta área xérase pola existencia no lugar dun vello  muíño hoxe totalmente abandonado pero que ten un gran muro que encora a auga do Ulla, creando un enorme estanque e que é o que propicia a existencia desta zona de baño. As ríadas do inverno enchen as ribeiras de area e a vexetación frondosa crea zonas de sombra moi apetecibles nos días de calor. Tamén é posible o paseo grazas aos camiños de pescadores que os propios usuarios da praia acondicionan para uso e desfrute de todo o mundo.Un dos aspectos a mellorar para o acceso a esta praia é a sinaléctica, pois actualmente non hai ningún tipo de cartel que indique como se pode acceder a este recuncho marabilloso.

zona de corte do muro do encoro

restos do vello muíño

Praia do Bao

Pontella que salva un dos carreiros polos que se pode pasear

A zona infantil precisa de mantemento

Guimarei reclama a mellora dos seus viais:::

Veciños de Guimarei analizan o estado dos seus viais e reclaman a mellora dalgúns deles ante as administracións. O que centra todas as atencións é a pista de acceso á parroquia desde o casco urbano da Estrada, non na súa totalidade, pois desde o lugar da Torre ata a igrexa está en bo estado. A zona que os veciños definen como "intransitable" é o tramo máis próximo á vila, a Avenida da Torre e a pista que pasa por diante da área feiral desta parroquia ata o lugar da Torre. Insisten que a administración municipal fai constantes arranxos de bacheado, pero que xa precisa dunha nova capa de firme posto que actualmente son moitos os veciños que buscan outras formas de acceder á parroquia. Outras pistas secundarias tamén se atopan en mal estado, polo que a veciñanza está chamando a atención do Concello para que subsanen estas deficiencias.

Estrada ao paso polo lugar da Torre, ao lado da fonte e do pazo

zona máis próxima ao casco urbano, dispón de farois e beirarrúas, pero o firme presenta irregularidades

Ouzande réndese ante o encanto dos Xogos Oulímpicos:::

Cada catro anos o mundo estremece e emociónase ante o encanto dos Xogos Oulímpicos que teñen o seu epicentro no Campo da Festa de Ouzande, desta volta conmemórase a cuarta edición. Será este domingo ás 18.30h e con modalidades deportivas aptas para todos os públicos.

O importante non é gañar, que as medallas son para quen se divirte. O importante é realmente participar e vivir a emoción dos xogos máis orixinais de todas as eiras, pois é a eira comunitaria da parroquia ouzandesa a que acolle o verdadeiro espírito de tan ancestrais xogos. 

Segundo informou A Fervenza de Ouzande, organizadora dos xogos, terán probas clásicas moi exitosas en edicións precedentes, pero tamén novas modalidades adaptadas aos tempos que corren. Nunha delas, e baixo o nome de "Baixada de augas mansas" pretenden que o público ademais de participar se refresque pois teñen a dureza de seren probas baixo o sol de agosto. Outras son máis enxeñosas, coma o "levantamento de carazo" onde hai que ter reflexos e equilibrio. Pericia tamén é necesaria para a xincana dos oulímpicos, chamada "100 metros pavón". E nestras probas os que teñan puntería levan vantaxe, sobre todo no "balóncegho". O motor estará apagado nas modalidades con rodas, coma a "xincarreta" ou as "biciclentas" onde o mérito non reside precisamente na velocidade. Non faltarán os "saltos sincronizados"ou o "Rebola, bóla" e neste ano un misterioso personaxe non quere perder a oportunidade de colarse nos xogos, será o "Pikachocú".

Toda a emoción do xogo estará aderezada por un estrito protocolo que fará a velada do máis lucida con desfile oulímpico incluído. 

Os participantes, de todas as idades, teñen que estar no Campo Oulímpico de Ouzande ás 18.30h para proceder á inscrición que é gratuíta. Será rápida pois o desfile da chegada do facho oulímpico arranca ás 19h para pouco despois ter o desfile e incio do xogo. Ás 21h remata a actividade coa entrega de medallas e coroas oulímpicas. A organización ten previsto un bebedoiro oulímpico para a hidratación de participantes e público e mesmo venderán camisetas conmemorativas, pois estes IV xogos oulímpicos coinciden co XV aniversario da Fervenza de Ouzande.

Os XOGOS OULÍMPICOS forman parte do programa das FESTAS PATRONAIS DE OUZANDE (ler programación)

imaxes de arquivo III Xogos Oulímpicos

VIDEO III XOGOS OULÍMPICOS

 

Ouzande celebra esta fin de semana as súas festas patronais:::

Este venres día 12 e ata o domingo 14 Ouzande engalánase de festa para honrar a San Lourenzo, patrón da parroquia. O programa festivo inclúe verbena, sesións vermouth e a gran atracción dos "Xogos Oulímpicos".  Venres 12 e a partir das 22h acturará no Campo da Festa a orquestra Galilea e haberá un posto de polbo e churrasco. Xa o sábado 13 celébrase a festa do patrón, San Lourenzo con misa de primeiras comuñóns ás 13:15h e festa con Os Ke Hai e o Trío Diseño. Pola noite haberá festa con dous tríos; Diseño e Savoy. Xa no domingo e ás 13:15h festa na honra do Santísimo Sacramento con misa e concerto da Banda de Música Municipal da Estrada, que durante a mañá fará pasacorredoiras pola parroquia. Ás 18:30h comezan os "Xogos Oulímpicos" no Campo da Festa, con diferentes modalidades deportivas para todas as idades e acto de inauguración e clausura. Con esta actividade que se repite cada catro anos, Ouzande pechas as súas festas patronais, agardando pola romería do Socorro que se celebrará os días 9, 10 e 11 de setembro. 

San Lourenzo na procesión

Orquesta Galilea nunha actuación anterior en OUzande

Os Ke Hai nunha actuación anterior en Ouzande 

Presentan en Pontevedra a revista "Olga":::

O pasado sábado 20 de xullo, a Casa das Campás de Pontevedra acollía ás 20:30h a presentación da Revista Olga, un proxecto promovido por Sabino Torres, xornalista membro da RAG falecido hai escasamente dous meses. Esta revista nace dos proxectos do grupo Bilbao de galegos en Madrid e recolle textos poéticos dos distintos autores que comparten unha circunstancia vital, ser galegos en Madrid. Este número fora presentado na capital hispánica e agora dáse a coñecer por terras galegas da man de Vicente Araguas, Rafael Yañez , Manuel Pereira e Ana Acuña. Contaron coa participación da filla e neta de Sabino Torres. O ouzandés Manuel Pereira é o secretario desta entidade e foi o encargado de ler uns textos de Luz Pichel e Begoña Regueiro ademais dun moi sentido poema, "Pontevedra" dedicado ao propio Sabino Torres. Os deseños da portada e contraportada son do propio Manuel Pereira. O prezo da revista é de 8 euros.